Chandrababu Singapore Tour : ఆంధ్రప్రదేశ్కు భారీ ఎత్తున పెట్టుబడులను ఆకర్షించే లక్ష్యంతో ముఖ్యమంత్రి చంద్రబాబు నాయుడు ఐదు రోజుల సింగపూర్ పర్యటనను ప్రారంభించారు. శనివారం రాత్రి హైదరాబాద్ నుండి బయలుదేరిన ఆయన, జూలై 27 ఉదయం సింగపూర్ చేరుకుంటారు. ఈ పర్యటనలో మొత్తం 29 కార్యక్రమాలలో సీఎం పాల్గొననున్నారు.
పర్యటనలో భాగంగా, తొలి రోజు ‘తెలుగు డయాస్పోరా’ సమావేశంలో సీఎం పాల్గొంటారు. ఈ సమావేశంలో సుమారు 1,500 మంది ప్రవాసాంధ్రులతో ఆంధ్రప్రదేశ్ అభివృద్ధి ప్రణాళికలపై ఆయన చర్చించనున్నారు. అనంతరం సింగపూర్ పారిశ్రామికవేత్తలు, భారత హైకమీషనర్తో సమావేశాలు జరపనున్నారు.
జూలై 28న సింగపూర్ ట్రేడ్ అండ్ ఇండస్ట్రీ మంత్రితో చంద్రబాబు భేటీ అవుతారు. అదే రోజు, రాష్ట్రంలో మౌలిక సదుపాయాల కల్పనకు అనుగుణంగా సింగపూర్లో చేపట్టిన పలు మౌలిక సదుపాయాల ప్రాజెక్టులను ఆయన అధ్యయనం చేయనున్నారు. వీటితో పాటు, ఒక స్పోర్ట్స్ స్కూల్ను సందర్శించి, క్రీడా రంగంలో పెట్టుబడుల అవకాశాలపై దృష్టి సారించనున్నారు. అలాగే, అత్యాధునిక టువాస్ పోర్ట్ను పర్యటించి, రాష్ట్రంలో పోర్టుల అభివృద్ధికి సంబంధించిన అంశాలపై అవగాహన పెంచుకుంటారు.
జూలై 29న సింగపూర్ దేశాధ్యక్షుడు, మాజీ ప్రధానమంత్రితో ముఖ్యమంత్రి భేటీ కానున్నారు. ఈ సమావేశాల అనంతరం, ఐటీ, ఫిన్టెక్ రంగాలలో పెట్టుబడులను ఆకర్షించే లక్ష్యంతో ఆయా రంగాలకు చెందిన ప్రముఖులతో చర్చలు జరపనున్నారు.
పర్యటన చివరి రెండు రోజులు, జూలై 30, 31 తేదీలలో, వివిధ అంతర్జాతీయ సంస్థల ప్రతినిధులతో సీఎం కీలక సమావేశాలు నిర్వహించనున్నారు. ఈ సమావేశాల ద్వారా రాష్ట్రానికి పెద్ద ఎత్తున పెట్టుబడులను తీసుకురావాలని ప్రభుత్వం ఆశిస్తోంది. ఈ పర్యటన రాష్ట్రానికి పెట్టుబడుల ప్రవాహానికి మైలురాయిగా నిలవనుందని ఆంధ్రప్రదేశ్ ప్రభుత్వం విశ్వసిస్తోంది.
