Trump Praises Modi: అగ్రరాజ్యాధినేత డొనాల్డ్ ట్రంప్ ఎప్పుడు ఎలా ఉంటారో.. ఎలా మాట్లాడతారో ఎవరికీ అర్థం కాదు. తనకు అనుకూలంగా ఉంటే పొగడ్తలతో ముంచెత్తుతారు. లేదంటే యుద్ధానికి సైతం వెనుకాడరు. ఇరాన్, వెనెజువెలా విషయంలో అదే జరిగింది. ఒకప్పుడు మోదీని, భారత్ను తీవ్రంగా విమర్శించారు. టారిఫ్లు విధించారు. అయితే తాజాగా ట్రంప్ భారత ప్రధాని నరేంద్ర మోదీని ఆకాశానికెత్తేశారు. నేను పీఎం మోదీకి పెద్ద ఫ్యాన్ని అని స్పష్టంగా చెప్పడం ద్వారా రెండు దేశాల మధ్య సంబంధాలు వ్యక్తిగత స్థాయిలోనూ బలంగా ఉన్నాయని తెలియజేశారు.
250వ స్వాతంత్య్ర వార్షికోత్సవం..
ఢిల్లీలో జరిగిన అమెరికా 250వ స్వాతంత్య్ర వార్షికోత్సవ కార్యక్రమంలో మార్కో రూబియో, యూఎస్ రాయబారి సెర్గియోలు పాల్గొన్న సందర్భంగా ట్రంప్ ఫోన్ ద్వారా మాట్లాడారు. ఈ సంభాషణలో భారత్–అమెరికా మైత్రి యొక్క వ్యూహాత్మక ప్రాముఖ్యతను ఆయన హైలైట్ చేశారు. ‘మనం ఇండియాతో చాలా క్లోజ్గా ఉన్నాం. వాళ్లు నాపై 100 శాతం ఆధారపడొచ్చు. భారత్కు ఏమైనా కావాలంటే అందుతుంది’ అని ట్రంప్ అన్న మాటలు రాజకీయంగా ముఖ్యమైనవి. ఇది కేవలం సాంప్రదాయిక మాటలు కాకుండా, రెండు దేశాల మధ్య రక్షణ, వాణిజ్యం, సాంకేతికత, ఇండో–పసిఫిక్ వ్యూహం వంటి రంగాల్లో లోతైన సహకారానికి సంకేతం. ట్రంప్ తన మొదటి అధ్యక్షత్వ కాలంలోనే మోదీతో వ్యక్తిగత స్నేహాన్ని పెంపొందించుకున్నారు.
గతంలో హౌడీ మోదీ.. నమస్తే ట్రంప్..
ట్రంప్ మొదటిసారి అధ్యక్షుడు అయిన సమయంలో నిర్వహించిన ‘‘హౌడీ మోదీ’’, ‘‘నమస్తే ట్రంప్’’ కార్యక్రమాలు ఆ స్నేహానికి ప్రతీకలు. ఇప్పుడు మళ్లీ అదే సందేశానిన వ్యక్తం చేయడం రాబోయే కాలంలో భారత్కు అనుకూలమైన వాతావరణం ఏర్పడవచ్చని సూచిస్తోంది. వ్యూహాత్మక ప్రాముఖ్యతచైనా పెరుగుతున్న ప్రభావం, ఇండో–పసిఫిక్ ప్రాంతంలో సమతుల్యం కావాల్సిన అవసరం నేపథ్యంలో భారత్–అమెరికా సంబంధాలు రక్షణ భాగస్వామ్యం నుంచి ఆర్థిక–సాంకేతిక భాగస్వామ్యం వరకు విస్తరిస్తున్నాయి.
అమెరికా ఫస్ట్ విధానంతో..
ట్రంప్ పాలనలో ‘అమెరికా ఫస్ట్’ విధానం ఉన్నప్పటికీ, భారత్ను వ్యూహాత్మక భాగస్వామిగా చూడడం ఆయన విధానంలో స్పష్టంగా కనిపించింది. ఈ సంభాషణలో ‘‘సాయం కోసం ఎవరికి ఫోన్ చేయాలో వారికి తెలుసు’’ అన్న మాటలు రెండు దేశాల మధ్య నమ్మకం, సులభమైన సంప్రదింపులను సూచిస్తున్నాయి. ఇది రక్షణ ఒప్పందాలు, సాంకేతిక బదలాయింపు, వాణిజ్య మాటలు వేగంగా ముందుకు సాగడానికి దోహదపడుతుంది. అయితే, వ్యక్తిగత స్నేహం ఒక్కటే సరిపోదు. భారత్ తన జాతీయ ఆసక్తులు – రష్యా నుంచి ఆయుధాలు కొనుగోలు, ఇరాన్తో శక్తి సహకారం, స్వయం సమృద్ధి విధానాలను కాపాడుకుంటూ అమెరికాతో సంబంధాలను మరింత బలోపేతం చేసుకోవాల్సి ఉంటుంది. వాణిజ్య ఉద్రిక్తతలు, హెచ్–1బి వీసా విధానాలు వంటి అంశాలు భారత్కు సవాల్గా మారవచ్చు.
ట్రంప్ ‘‘మోదీకి పెద్ద ఫ్యాన్’’ అని చెప్పడం రాజకీయ సౌజన్యం మాత్రమే కాదు. ఇది భారత్ను అమెరికా యొక్క ముఖ్యమైన భాగస్వామిగా గుర్తించడానికి సంకేతం. సరైన వ్యూహాలతో భారత్ ఈ సానుకూలతను జాతీయ హితం కోసం సమర్థవంతంగా ఉపయోగించుకోగలిగితే, రాబోయే సంవత్సరాల్లో భారత్–అమెరికా సంబంధాలు కొత్త ఎత్తులు అందుకోవడం ఖాయం.
