Israel Using Trump: ఇజ్రాయెల్–హమాస్ ఘర్షణలో కాల్పుల విరమణ ఒప్పందం కుదుర్చడంలో అమెరికా అధ్యక్షుడు డొనాల్డ్ ట్రంప్ కీలక పాత్ర పోషించారు. ఆయన కృషికి గుర్తింపుగా ఇజ్రాయెల్ ప్రధాని బెంజమిన్ నెతన్యాహు నేతృత్వంలోని ప్రభుత్వం ప్రత్యేక కృతజ్ఞతలు తెలిపింది. జెరూసలెంలోని చట్టసభ కనేసేట్లో సభ్యులు నిలబడి చప్పట్లు కొడుతూ ఆయనకు స్టాండింగ్ ఓవేషన్ ఇచ్చారు.
నోబెల్ శాంతి బహుమతికి మద్దతు
చట్టసభ స్పీకర్ అమిర్ ఒహనా, ట్రంప్ బందీల విడుదలకు చేసిన ప్రయత్నాలను యూదు ప్రజలు శతాబ్దాల తరబడి గుర్తుంచుకుంటారని ప్రశంసించారు. శాంతి స్థాపనలో ఆయన నాయకత్వాన్ని ప్రపంచంలో ఎవరు సరితూగలేరని పేర్కొన్నారు. వచ్చే ఏడాది నోబెల్ శాంతి బహుమతికి ట్రంప్ను ప్రతిపాదించేందుకు అంతర్జాతీయ మద్దతు సమకూర్చాలని తమ సంకల్పాన్ని వెల్లడించారు.
నెతన్యాహు అభినందనలు
నెతన్యాహు ప్రసంగంలో ట్రంప్ ధైర్యం, దృఢసంకల్పాన్ని ప్రత్యేకంగా ప్రశంసించారు. గాజాలో యుద్ధం నిలిపేందుకు ఆయన తీసుకున్న వేగవంతమైన నిర్ణయాలు ప్రపంచాన్ని కదిలించాయని చెప్పారు. నోబెల్ శాంతి బహుమతి ట్రంప్కి రాక తప్పదని విశ్వాసం వ్యక్తం చేశారు.
ప్రత్యేక కానుక
భేటీ సందర్భంగా నెతన్యాహు, ట్రంప్కి బంగారు పావురాన్ని బహుమతిగా అందించి శాంతి ప్రయత్నాల్ని గుర్తు చేశారు. ఈ కానుక, ప్రపంచ శాంతికి ఆయనకు ఉన్న కట్టుబాటును ప్రతిబింబిస్తున్నదిగా వ్యాఖ్యానించారు.
కాల్పుల విరమణ ఒప్పందంలో భాగంగా హమాస్ చెరలో ఉన్న ఇజ్రాయెల్ బందీలను విడుదల చేసింది. ప్రతిగా పాలస్తీనా ఖైదీలను ఇజ్రాయెల్ విడిచిపెట్టింది. ఇక రెండో దశ చర్చలు ఈజిప్టులో జరగనున్నాయి. ఈ సమావేశానికి నెతన్యాహు హాజరుకానున్నప్పటికీ, ట్రంప్ పాల్గొనడం నిర్దిష్టమైంది.
