Great Green Wall Project: థార్ ఎడారి విస్తరణను నియంత్రించేందుకు కేంద్ర, రాష్ట్ర ప్రభుత్వాలు ఏటా కోట్ల రూపాయలు ఖర్చు చేస్తున్నాయి. ఫలితంగా అక్కడక్కడ గడి, చెట్టు పెరుగుతున్నాయి. ఇక గల్ఫ్ దేశాలు కూడా తమ దేశాల్లో వర్షం కురిసేందుకు అనేక ప్రయత్నాలు చేస్తున్నాయి. దుబాయ్లో ప్రయత్నం కొంత ఫలించి వర్షాలు కురుస్తున్నాయి. ఇలాగే ఆఫ్రికా యూనియన్ కూడా ఎడారిని పచ్చగా మార్చేందుకు 2007లో మహత్తర ప్రాజెక్టును చేపట్టింది. సెనెగల్ నుంచి జిబూటి వరకు సహెల్ ప్రాంతం గుండా విస్తరించిన ఎడారి విస్తరణను అరికట్టడానికి దీనిని రూపొందించారు. మొదట్లో ఇది కేవలం చెట్ల గోడగా భావించబడినప్పటికీ, కాలక్రమేణా ఇది ఒక సమగ్ర “మొజాయిక్” విధానంగా మారింది. అంటే కేవలం చెట్లు నాటడం మాత్రమే కాకుండా, స్థానిక సాంప్రదాయ పద్ధతులు, నీటి నిర్వహణ, వ్యవసాయ పద్ధతుల మార్పు, జీవవైవిధ్య పరిరక్షణ వంటి అనేక అంశాలను కలిపి అమలు చేస్తున్నారు.
భారీ విస్తీర్ణంలో..
ఈ ప్రాజెక్టు సుమారు 8 వేల కిలోమీటర్ల పొడవు, 15 కిలోమీటర్ల వెడల్పుతో అభివృద్ధి చేయబడుతోంది. ఇది అనేక దేశాల సరిహద్దులను కలిపి ఒకే లక్ష్యం వైపు నడుస్తోంది. ప్రధానంగా 11 దేశాలు ఈ ప్రాజెక్టులో కీలక పాత్ర పోషిస్తున్నాయి. సెనెగల్, మౌరిటానియా, మాలి, బుర్కినా ఫాసో, నైజర్, నైజీరియా, చాద్, సుడాన్, ఎరిట్రియా, ఇథియోపియా, జిబూటి మొదట ఇందులో ఉండగా, తర్వాత ఇతర దేశాలు కూడా జత కలిపాయి. మొత్తం 20కి పైగా ఆఫ్రికా దేశాలు ఇందులో భాగమయ్యాయి. ఈ సహకారం ద్వారా సరిహద్దు సమస్యలు, వనరుల పంపిణీ, సాంకేతిక జ్ఞానం భాగస్వామ్యం సాధ్యమవుతోంది.
ప్రాజెక్టు ప్రధాన లక్ష్యాలు..
ఈ ప్రాజెక్టు కేవలం ఎడారిని అరికట్టడం మాత్రమే కాదు పర్యావరణం, ఆర్థికం, సామాజిక అంశాలను ఒకే వేదికపైకి తీసుకురావడానికి రూపొందించబడ్డాయి. దీనికి బహుముఖ లక్ష్యాలు ఉన్నాయి. 100 మిలియన్ హెక్టార్లు(సుమారు 24.7 కోట్ల ఎకరాలు) భూమిని సారవంతం చేయడం. కోటి(10 మిలియన్) ఆకుపచ్చ ఉద్యోగాలు కల్పించడం, 250 మిలియన్ టన్నుల కార్బన్ డయాక్సైడ్ను సంగ్రహించడం, వాతావరణ మార్పుల ప్రభావాలను తగ్గించడం, ఆహార భద్రతను పెంపొందించడం, లక్షలాది కుటుంబాలకు ఆదాయం, స్థిరత్వం కల్పించడం
సాధించిన విజయాలు..
ఇప్పటికి సుమారు 7.41 కోట్ల ఎకరాల (సుమారు 30 మిలియన్ హెక్టార్లు) భూమి సారవంతం చేయబడింది. ఇది గణనీయమైన పురోగతి. చెట్ల నాటడం, నేల పరిరక్షణ, స్థానిక మొక్కల పెంపకం ద్వారా భూమి యొక్క సహజ సామర్థ్యం తిరిగి వస్తోంది. లక్షలాది మందికి తాత్కాలిక, శాశ్వత ఉద్యోగాలు లభించాయి. స్త్రీలు, యువత ఈ కార్యకలాపాల్లో చురుకుగా పాల్గొంటున్నారు. ఆహార ఉత్పత్తి పెరగడం, నీటి నిల్వలు మెరుగుపడటం వంటి ప్రయోజనాలు కనిపిస్తున్నాయి. కొన్ని ప్రాంతాల్లో జీవవైవిధ్యం కూడా పెరిగింది.
సవాళ్లను ఎదుర్కొంటూ..
ఈ ప్రాజెక్టు విజయవంతం కావడానికి అనేక సవాళ్లు ఉన్నాయి. నిధులు పూర్తిగా అందకపోవడం, దేశాల మధ్య సమన్వయం లోపం, కొన్ని ప్రాంతాల్లో భద్రతా సమస్యలు, చెట్లు బతకడం తక్కువగా ఉండడం వంటివి ఎదురయ్యాయి. అవుతున్నాయి. 2021లో “గ్రేట్ గ్రీన్ వాల్ అక్సిలరేటర్” అనే కొత్త వ్యూహం ద్వారా నిధులు, పర్యవేక్షణ, సహకారాన్ని మెరుగుపరచడానికి ప్రయత్నాలు జరుగుతున్నాయి.
ప్రపంచానికి ఆదర్శంగా..
ఈ ప్రాజెక్టు విజయం సాధిస్తే ఆఫ్రికాకు మాత్రమే కాకుండా ప్రపంచానికి ఒక ఆదర్శంగా నిలుస్తుంది. ఎడారి విస్తరణతో వలసలు, ఆహార కొరత, వనరుల కోసం సంఘర్షణలు తగ్గుతాయి. అయితే, స్థానిక సమాజాల భాగస్వామ్యం, సుస్థిర నిధులు, శాస్త్రీయ పర్యవేక్షణ లేకుండా లక్ష్యాలు చేరుకోవడం కష్టం. ఇది “ఆఫ్రికా కోసం ఆఫ్రికా” అనే స్ఫూర్తిని ప్రతిబింబిస్తుంది.
టార్గెట్ 2030..
2030 నాటికి పూర్తి లక్ష్యం చేరుకోవాలంటే ఏటా సగటున కోట్ల ఎకరాల భూమిని సారవంతం చేయాలి. కొత్త సాంకేతికతలు (డ్రోన్లు, స్మార్ట్ ఇరిగేషన్), అంతర్జాతీయ సహకారం, స్థానిక జ్ఞానం కలపడం ద్వారా ఇది సాధ్యం. ఈ ప్రాజెక్టు విజయవంతమైతే వాతావరణ మార్పులతో పోరాడేందుకు ప్రపంచానికి ఒక మార్గదర్శకంగా మారుతుంది.
గ్రేట్ గ్రీన్ వాల్ పర్యావరణ పునరుజ్జీవనం, ఆర్థిక సాధికారత, సామాజిక స్థిరత్వాన్ని కలిపిన ఒక సమగ్ర విప్లవం. ఎడారిని జయించడం అంటే భవిష్యత్ తరాలకు మెరుగైన భూమి, ఆహారం, ఉపాధి అందించడం. ఈ ప్రయత్నం విజయవంతం కావాలంటే అన్ని దేశాలు, సంస్థలు, స్థానిక ప్రజలు ఏకమవ్వాలి. ఈ పచ్చని గోడ ఆశను, సహకారాన్ని, స్థిరమైన అభివృద్ధిని సూచిస్తోంది.
