Turkey: పాకిస్తాన్కు సాయం.. టర్కీలో భూకంపం.. ప్రకృతి శపించిందా?

Turkey: తుర్కియేలోని సెంట్రల్ అనటోలియా ప్రాంతంలోని కోన్యా ప్రావిన్స్‌లో మే 15న రిక్టర్ స్కేలుపై 5.2 తీవ్రతతో భూకంపం సంభవించింది. ఈ భూకంపం ఇస్తాంబుల్‌తో సహా దేశంలోని పలు ప్రాంతాల్లో బలమైన ప్రకంపనలను కలిగించింది. భయాందోళనకు గురైన ప్రజలు ఇళ్ల నుంచి రోడ్లపైకి పరుగెత్తారు, రహదారులపై వాహనాలు ఊగిపోయాయి. ఈ సంఘటనకు సంబంధించిన దృశ్యాలు సోషల్ మీడియాలో వైరల్‌గా మారాయి.

తుర్కియే ఎమర్జెన్సీ మేనేజ్‌మెంట్ ఏజెన్సీ (AFAD) ప్రకారం, భూకంపం స్థానిక సమయం రాత్రి 8:45 గంటలకు కోన్యా ప్రావిన్స్‌లోని మెరామ్ జిల్లాకు 10 కి.మీ లోతులో సంభవించింది. ఇస్తాంబుల్‌లోని బహుళ అంతస్తుల భవనాలు కంపించడంతో నివాసితులు భయంతో బయటకు పరుగెత్తారు. కొందరు భవనాల నుంచి దూకేందుకు ప్రయత్నించి, స్వల్ప గాయాలతో ఆసుపత్రిలో చికిత్స పొందుతున్నారు. అయితే, ప్రాణనష్టం లేదా పెద్ద ఎత్తున ఆస్తి నష్టం నమోదు కాలేదని అధికారులు తెలిపారు.

భూకంప సన్నద్ధత..
తుర్కియే భౌగోళికంగా బహుళ ఫాల్ట్ లైన్లపై ఉండటం వల్ల తరచూ భూకంపాలకు గురవుతుంది. 2023 ఫిబ్రవరిలో కహ్రమన్‌మారాస్‌లో సంభవించిన 7.8 తీవ్రత భూకంపం 50 వేల మంది మరణాలకు కారణమై, దేశంలో భూకంప నిరోధక భవన నిర్మాణాలపై చర్చను రేకెత్తించింది. ఈ నేపథ్యంలో, ప్రభుత్వం భూకంప సన్నద్ధత కోసం శిక్షణ కార్యక్రమాలు, రెస్క్యూ టీమ్‌లను బలోపేతం చేస్తోంది. ఈ ఘటన తర్వాత, ఇస్తాంబుల్‌లో అత్యవసర సేవలు అప్రమత్తమయ్యాయి.

సోషల్‌ మీడియాలో వైరల్‌..
సోషల్ మీడియాలో వైరల్ అయిన వీడియోల్లో రోడ్లపై గుమిగూడిన జనం, ఊగిసలాడిన వాహనాలు భయానక వాతావరణాన్ని చూపించాయి. నిపుణులు భవన నిర్మాణాలలో భూకంప నిరోధక ప్రమాణాలను కఠినతరం చేయాలని, ప్రజలకు అవగాహన కల్పించాలని సూచిస్తున్నారు. ఈ భూకంపం తుర్కియేకు మరో హెచ్చరికగా నిలిచింది.