Youth Bike Stunt : రోడ్డు ప్రమాదం అంటే ఓ కారో, బైకో రోడ్డు మీద పడటం కాదు.. ఓ కుటుంబం రోడ్డు మీద పడటం” రోడ్డు ప్రమాదాల గురించి.. వాటి వల్ల బాధితులైన వారి గురించి.. సన్ ఆఫ్ సత్యమూర్తి సినిమాలో త్రివిక్రమ్ రాసిన డైలాగ్ ఇది. ఆ డైలాగులో ఎంత గాఢత ఉందో… ఆ ప్రమాదం తాలూకు బాధను అనుభవిస్తే గాని తెలియదు. అందుకే జూనియర్ ఎన్టీఆర్ కూడా తన సినిమా ప్రారంభంలో “రోడ్డు మీద వెళ్తున్నప్పుడు జాగ్రత్తగా వెళ్ళండి. ఎందుకంటే మీ ఇంట్లో మీకోసం మీ వాళ్ళు ఎదురు చూస్తూ ఉంటారు.. మా ఇంట్లో జరిగిన విషాదం మీ ఇంట్లో జరగకూడదు” అని విన్నపం లాంటి హెచ్చరిక జారీ చేస్తాడు. ప్రముఖులే కాదు ప్రభుత్వం చెప్పినా ఎవరూ వినిపించుకోవడం లేదు. అందుకే రోడ్డు ప్రమాదాలు ఏటికేడు పెరుగుతున్నాయి. వ్యాధుల వల్ల చనిపోయే వారి కంటే ఏటా రోడ్డు ప్రమాదాల వల్ల కన్నుమూస్తున్న వారి సంఖ్యే ఎక్కువ.
ప్రభుత్వం జరిమానాలు విధిస్తున్నా, ట్రాఫిక్ పోలీసులు కఠినమైన శిక్షలు విధిస్తున్నప్పటికీ జనంలో మార్పు రావడం లేదు.. పైగా రెచ్చిపోయి డ్రైవింగ్ చేస్తున్నారు. మద్యం తాగి నానా హంగామా చేస్తున్నారు.. జూబ్లీహిల్స్ లో డ్రంక్ అండ్ డ్రైవ్ పరీక్షలు నిర్వహిస్తే అందులో 90 శాతం వరకు మద్యం తాగే ఉంటున్నారు. వారిలో అధిక శాతం యువతలు ఉండడం ఆందోళనకు గురిచేస్తోంది. పైగా డ్రంక్ అండ్ డ్రైవ్ పరీక్షలు నిర్వహించే సమయంలో పోలీసులతో సదరు యువతులు వాగ్వాదానికి దిగుతున్నారు. ఇదంతా పక్కన పెడితే దేశ ఆర్థిక రాజధానిలో ఓ యువకుడు.. అది కూడా రద్దీగా ఉన్న రోడ్డులో బైక్ పై విన్యాసాలు చేశాడు. తాగి ఉన్నాడో లేక ఇంకేదైనా పీల్చి ఉన్నాడు తెలియదు కానీ.. ముందు ఒక యువతిని, వెనుక ఒక యువతిని బైక్ పై కూర్చోబెట్టుకొని వికృత చేష్టలకు పాల్పడ్డాడు. చూసేవారికి ఈ విన్యాసం ఒళ్ళు గగుర్పాటుకు గురి చేసింది.
బైక్ వెనుక చక్రం ఆధారంగా వాహనాన్ని అమాంతం గాల్లోకి లేపాడు. ముంబాయి నగరంలో గురువారం ఈ సంఘటన జరిగింది. ఈ వీడియో ప్రస్తుతం సామాజిక మాధ్యమాల్లో వైరల్ గా మారింది. దీనిపై బికేసి పోలీస్ స్టేషన్లో శుక్రవారం కేసు నమోదు అయింది. కేవలం జరిమానా తోనే సరిపెట్టకుండా బైక్ తోలుతున్న వ్యక్తిపై, ముందు, వెనుక కూర్చున్న యువతులపై కేసు నమోదు చేస్తామని ముంబై పోలీసులు అంటున్నారు. ఈ వీడియోను ముంబై ట్రాఫిక్ పోలీసులు ట్విట్టర్లో షేర్ చేశారు. నిందితుల ఆచూకీ కోసం వారు ఆరా తీస్తున్నారు.. మరోవైపు సదరు యువకుడు చేసిన బైక్ విన్యాసాలపై నెటిజెన్లు ఒక్కో రకంగా కామెంట్ చేస్తున్నారు. ” ముందు ఒకరిని, వెనుక ఒకరిని కూర్చోబెట్టుకున్నప్పుడు హెల్మెట్ వాడాలని తెలియదా?” అంటూ చురకలు అంటిస్తున్నారు.
dangerous Stunt with 2 pillion rider one in front & one at rear,
no helmet & doing whilly !they know that Mumbai roads hv became #PotholesFree now…!
pls catch him @MTPHereToHelp
bike reg no. is Mh01DH5987 pic.twitter.com/tvYeRMDR39
— @PotholeWarriors Foundation💙 #RoadSafety🇮🇳🛵🛣 (@PotholeWarriors) March 30, 2023
