Sanjay Dutt Injured: నటుడు సంజయ్ దత్ ప్రమాదం బారిన పడ్డారు. షూటింగ్ లో ఆయనకు తీవ్ర గాయాలయ్యాయి. వెంటనే యూనిట్ సభ్యులు సంజయ్ దత్ ని ఆసుపత్రికి తరలించారు. కర్ణాటకలో ఈ సంఘటన చోటు చేసుకుంది. సీనియర్ హీరో అర్జున్ మేనల్లుడు ధృవ్ సర్జా హీరోగా కేడి టైటిల్ తో ఓ చిత్రం రూపొందుతుంది. ఈ కన్నడ చిత్రానికి ప్రేమ్ దర్శకుడు. నేడు ఓ భారీ యాక్షన్ సీక్వెన్స్ ప్లాన్ చేశారట. అందులో భాగంగా బ్లాస్టింగ్ జరిపారు. అనూహ్యంగా ఈ బ్లాసింగ్ లో సంజయ్ దత్ చిక్కుకున్నారు.
పేలుడు కారణంగా రాళ్ళు, వస్తువులు వేగంగా వచ్చి సంజయ్ దత్ శరీరాన్ని తాకాయట. దీంతో ఆయన చేతులు, కాళ్లపై, భుజాల మీద గాయాలు అయ్యాయట. ఊహించని ఈ పరిణామానికి యూనిట్ దిగ్భ్రాంతికి గురయ్యారట. వెంటనే సంజయ్ దత్ ని స్థానిక ఆసుపత్రికి తరలించారట. వైద్యులు పరీక్షలు జరిపి ఆందోళన చెందాల్సిన అవసరం లేదని వెల్లడించినట్లు సమాచారం. ప్రస్తుతం ఆయనకు చికిత్స జరుగుతుంది.
ఆయనకు తగిలిన గాయాలకు చికిత్స అందిస్తున్నారు. సంజయ్ దత్ కొన్నాళ్లుగా అనారోగ్య సమస్యలు ఎదుర్కొంటున్నారు. క్యాన్సర్ బారిన పడిన సంజయ్ దత్ అమెరికాలో చికిత్స తీసుకున్నారు. కోలుకున్న అనంతరం నటుడిగా వరుస చిత్రాలు చేస్తున్నారు. సంజయ్ దత్ కెజిఎఫ్ మూవీలో విలన్ రోల్ చేసిన విషయం తెలిసిందే. యష్-ప్రశాంత్ నీల్ తెరకెక్కించిన కెజిఎఫ్ 2 లో సంజయ్ దత్ అధీరా పాత్రలో భయపెట్టారు.
2022కి గానూ కెజిఎఫ్ 2 అతిపెద్ద ఇండియన్ బ్లాక్ బస్టర్ గా అవతరించింది. రూ. 1200 కోట్లకు పైగా వసూళ్లు రాబట్టింది. హీరోగా రిటైర్ అయిన సంజయ్ దత్ విలన్ అండ క్యారెక్టర్ రోల్స్ చేస్తున్నారు. సౌత్ ఇండియాలో ఆయన బిజీ అవుతున్నారు. ఇక సంజయ్ దత్ జీవితంలో అనేక ఒడిదుడుకులు ఉన్నాయి. 1993 ముంబై పేలుళ్ల కేసులో సంజయ్ దత్ జైలు శిక్ష అనుభవించాడు. సంజూ టైటిల్ తో దర్శకుడు రాజ్ కుమార్ హిరాణి బయోపిక్ తీశారు.
