Bandi Sanjay Love Jihad: వరంగల్ కాకతీయ మెడికల్ కళాశాల పీజీ విద్యార్థిని ప్రీతి ఆత్మహత్యా ప్రయత్నం క్రమంగా రాజకీయ రంగు పులుము కుంటుంది. సీనియర్ ర్యాగింగ్, వేదీపుల కారణంగా ఆత్మహత్యా ప్రయత్నం చేసినట్లు ఆమె తండ్రి ఆరోపిస్తున్నారు. తాజాగా తెలంగాణ బీజేపీ అధ్యక్షుడు బండి సంజయ్ చేసిన వ్యాఖ్యలు దుమారం రేపుతున్నాయి.
ముందూ వెనుకా చూసుకోకుండా..
బండి సంజయ్ కొన్ని విషయాల్లో వెనకా ముందు చూడకుండా రాజకీయాలు చేస్తున్నారు. ఎన్ని సార్లు సోషల్ మీడియాలో ట్రోలింగ్ కు గురైనా తీరు మార్చుకోడం లేదు. తాజాగా ఆయన మరోసారి లవ్ జీహాద్ అనే కాన్సెప్ట్ ను తెరపైకి తెచ్చారు. దీంతో అందరూ ఆయన్ను విచిత్రంగా చూస్తున్నారు. వరంగల్ మెడికల్ కాలేజీలో చదువుకున్న ప్రీతి అనే మెడికో ఆత్మహత్యాయత్నం చేసింది. దానికి కారణం సైఫ్ అనే సీనియర్ స్టూడెంట్ అనే ఆరోపణలు వచ్చాయి. వేధించారన్నదానికి సాక్ష్యాలు లభించడంతో పోలీసులు సైఫ్ ను అరెస్ట్ చేశారు.
ప్రేమ కోణం లేదు..
అయితే ప్రీతి ఆత్మహత్య యత్నంలో ప్రేమ అనే కోణం లేదు. కానీ సైఫ్ అనే పేరు కనిపించడం.. ప్రీతి అనే అమ్మాయి ఆత్మహత్యాయత్నం చేయడంతో ఇదేదో బాగుందని బండి సంజయ్ లవ్ జీహాద్ అనేశారు. ఇది రాగింగ్ అండ్ లవ్ జీహాద్ కేసని తేల్చేశారు. హిందు అమ్మాయిలను టార్గెట్ చేసి వేధిస్తున్నారని … నిందితుడు బయట ఉంటే కొడతారని చిన్న కేసు పెట్టి జైలుకు పంపారని ఆరోపించారు. దీని వెనక రాష్ట్ర ప్రభుత్వమే ఉందని కీలక వ్యాఖ్యలు చేశారు.
తండ్రి ఆవేదన..
సూసైడ్ అటెంప్ట్ వెనక సీనియర్ వేధింపులే కారణమని ప్రీతి తల్లిదండ్రులు. ఆరోపిస్తున్నా.. తండ్రి అయితే హత్య చేయాలని బలవంతంగా ఇంజక్షన్ వేసి ఉంటారని ఆరోపిస్తున్నారు. దీన్ని చిన్న కేసుగా చూపిస్తున్నారని మండిపడ్డారు. మరోవైపు ప్రీతి కేసును సిట్టింగ్ జడ్జితో విచారణ జరిపించాలని బండి సంజయ్ అంటున్నారు.
రాజకీయం కోసం తప్పుడు ఆరోపణ..
రాజకీయాలు చేయవచ్చు కానీ.. ఇలా ప్రతీ దానికి మతానికి .. లవ్ జీహాద్ అంటూ లింక్ పెట్టి మాట్లాడితే కొన్ని వర్గాల ప్రజలను కించ పరిచినట్లవుతుంది. మరోవైపు బాధితురాలి తల్లిదండ్రులు కూడా ప్రేమ కోణం లేదంటున్నారు. అయితే వేధింపులు.. లేదంటే హత్యా యత్నం అని ఆరోపిస్తున్నారు. ఈ క్రమంలో సంజయ్ వ్యాఖ్యలతో తప్పుడు సంకేతాలు వెళతాయనీ పలువురు అభిప్రాయ పడుతున్నారు. ఆరోపణలు ఎదుర్కొంటున్న వారు ఓ వర్గం వారయినంత మాత్రాన.. ప్రతీది జీహాద్ లా చేస్తారని అనుకుంటే వారిని విడగొట్టడమే అవుతుంది. అసలు ప్రీతి ఇష్యూలో ప్రేమ అనే కోణం లేకపోయినా తీసుకు వచ్చి .. ఆత్మహత్యాయత్నం చేసుకున్న ఆమెను.. ఆమె కుటుంబాన్ని కూడా బండి సంజయ్ మానసికంగా ఇబ్బంది పెడుతున్నారన్న విమర్శలు వస్తున్నాయి.
