Narayanpet Hanumanthu: చిన్నప్పుడు ఆడుకుంటూనో.. ఊరికి వెళ్ళినప్పుడో ఓ పిల్లాడు తప్పిపోతాడు. అతడి కోసం తల్లిదండ్రులు తీవ్రంగా వెతుకుతారు. చివరికి ఏదో ఒకచోట ఆ బాబు దొరుకుతాడు. అతడిని పోల్చుకోవడానికి తల్లిదండ్రులు ప్రయత్నిస్తారు. తమ కొడుకే అని దగ్గరికి తీసుకుంటారు. కథ సుఖాంతం అవుతుంది.. ఇలాంటి సినిమాలు చాలానే చూశాం కదా.. ఇటువంటిది రియల్ లైఫ్ లో జరగడం కష్టం కదా.. కానీ ఇతడి జీవితంలో జరిగింది. జరగడం మాత్రమే కాదు అది మొత్తం సినిమాను తలపించింది.
Also Read: వాళ్ల వల్లే టీమిండియా చెత్త ప్రదర్శన.. టి20 చరిత్రలో ఇదే ఫస్ట్ టైం..
అతడి పేరు హనుమంతు. ఇతడిది నారాయణపేట జిల్లా ఊట్కూరు మండలం తీప్రాస్ పల్లి. హనుమంతు తల్లిదండ్రుల పేరు బీరప్ప, అంజమ్మ. బీరప్ప అంజమ్మ దంపతులకు ముగ్గురు సంతానం. ఇందులో హనుమంతు చిన్నవాడు. 11 సంవత్సరాల క్రితం హనుమంతు ఆంధ్రప్రదేశ్ రాష్ట్రంలోని కర్నూలు జిల్లా ఆదోని ప్రాంతంలో గొర్రెలు మేపడానికి వెళ్ళాడు. ఆ ప్రాంతంలో గొర్రెలు మేపుతుండగా ఒకరోజు హనుమంతు తప్పిపోయాడు.
ఈ విషయం గొర్రెలు మేపడానికి తీసుకెళ్లిన వ్యక్తి బీరప్ప, అంజమ్మ దంపతుల దృష్టికి తీసుకెళ్లాడు. దీంతో వారంతా అతడి కోసం గాలించారు. బంధువుల ఇళ్ల నుంచి మొదలు పెడితే.. అన్ని గ్రామాలలో తిరిగారు. ఇంత చేసినప్పటికీ అతడి ఆచూకీ లభించలేదు. దీంతో హనుమంతు మీద వారు ఆశలు వదిలేసుకున్నారు. అంతేకాదు హనుమంతు తప్పిపోయాడని.. అతడి ఆచూకీ తెలిస్తే సమాచారం ఇవ్వాలని పలు ప్రాంతాలలో పోస్టర్లు అంటించారు. పోస్టర్ల కింద తమ ఫోన్ నెంబర్లు నమోదు చేశారు.
నాడు తప్పిపోయిన హనుమంతు తమిళనాడు వెళ్ళాడు. చెన్నైలోని అనాధ ఆశ్రమంలో వసతి పొందాడు. ఈ నేపథ్యంలో ఇటీవల మనసు స్వచ్ఛంద సంస్థ సభ్యులు హనుమంతు వివరాలు తెలుసుకున్నారు. అంతేకాదు ఈనెల 25న తిప్రాస్ పల్లి సర్పంచ్ విజయలక్ష్మి కి ఫోన్ చేసి జరిగిన విషయాన్ని చెప్పారు. దీంతో టిప్రాస్ పల్లి గ్రామానికి చెందిన నర్సింహ అనే రాజకీయ నాయకుడు.. బీరప్ప. అంజమ్మ దంపతులు చెన్నై వెళ్లారు. హనుమంతును కలుసుకొని కన్నీటి పర్యంతమయ్యారు. అతడిని మనసారా హత్తుకుని.. బోరున ఏడ్చారు. దాదాపు 11 సంవత్సరాల తర్వాత హనుమంతు కుటుంబ సభ్యులను కలుసుకోవడంతో అతడి ఆనందానికి అవధులు లేవు. ఈ నేపథ్యంలో మనసు అనే స్వచ్చంద సంస్థ నిర్వాహకులకు బీరప్ప కుటుంబ సభ్యులు కృతజ్ఞతలు తెలియజేశారు.కాగా, హనుమంతు తప్పిపోయిన తీరు, మళ్లీ దొరికిన విధానం అచ్చం పాపం పసివాడు సినిమాను తలపిస్తోందని తిప్రాస్ పల్లి వాసులు చెబుతున్నారు.
