KCR: కేసీఆర్ ప్రభుత్వ అవినీతిపై సైలెంట్గా మరో విచారణ ప్రారంభమైంది. ఇప్పటికే కాళేశ్వరం నిర్మాణంలో అవినీతిపై విచారణకు రిటైర్డ్ జడ్జిని నియమించింది. తాజాగా విద్యుత్ కేంద్రాల నిర్మాణం, ఛత్తీస్గఢ్ ఒప్పందాల్లో అవకతవకల్ని బయటపెట్టేందుకు ప్రభుత్వం నియమించిన కమిటీ పని మొదలుపెట్టింది. గత ప్రభుత్వం కాంపిటేటివ్ బిడ్డింగ్కు వెళ్లకుండా నామినేషన్ల ప్రాతిపదికన పనులను కాంట్రాక్టర్లకు అప్పగించడం, ఛత్తీస్గఢ్ డిస్కంల నుంచి వెయ్యి మెగావాట్ల విద్యుత్ కొనుగోలు ఒప్పందంలో భారీగా అవినీతి జరిగిందన్న ఆరోపణలు ఉన్నాయి.
రిటైర్డ్ జడ్జి ఆధ్వర్యంలో..
అక్రమాలపై న్యాయ విచారణ జరిపేందుకు పాట్నా హైకోర్టు రిటైర్డ్ చీఫ్ జస్టిస్ ఎల్.నరసింహారెడ్డిని ‘కమిషన్ ఆఫ్ ఎంక్వైరీ’గా రేవంత్రెడ్డి ప్రభుత్వం ఇప్పటికే నియమించింది. ఈమేరకు జస్టిస్ ఎల్.నరసింహారెడ్డి న్యాయ విచారణ ప్రారంభించారు. సమాచారం, సాక్ష్యాలు, ఆధారాలను ఎవరైనా కమిషన్ దృష్టికి తీసుకురావచ్చని విచారణ కమిటీ చైర్మన్ ప్రకటించారు.
అనుమానం వస్తే విచారణ..
ఇక విద్యుత్ కొనుగోలు ఒప్పందం, విద్యుత్ కేంద్రాల నిర్మాణానికి సంబంధించిన టెండర్లు, పనుల అప్పగింతతో సంబంధం ఉందని కమిషన్ భావిస్తే మాజీ ముఖ్యమంత్రి, మాజీ మంత్రులను కూడా విచారణకు పిలుస్తామని జస్టిస్ ఎల్.నరసింహారెడ్డి తెలిపారు. మొదట రిక్వెస్ట్ లెటర్స్ రాస్తామని, వాటికి స్పందించకుంటే సమన్లు పంపుతామని స్పష్టం చేశారు. ఇక మూడు విద్యుత్ ఒప్పందాలకు సంబంధించిన ఫైళ్లను ఇప్పటికే స్వాధీనం చేసుకున్నట్లు వెల్లడించారు.
అనేక నిర్ణయాలపై విచారణ..
గత ప్రభుత్వ హయాంలో మాజీ సీఎం కేసీఆర్ తీసుకున్న నిర్ణయాలపై ఇప్పటికే అనేక రకాల విచారణలు జరుగుతున్నాయి. సచివాలయం నిర్మాణంలో అక్రమాలు వంటివి పక్కన భారీ స్కాములపైనే కాంగ్రెస్ ప్రభుత్వం దృష్టి పెట్టారు. కాళేశ్వరం.. విద్యుత్ ఒప్పందాలు అలాంటి కోవలోకే వస్తాయి. డబ్బులతో సంబంధం లేకపోయినా.. ఫోన్ ట్యాపింగ్ అత్యంత కీలకంగా మారింది. ఆ కేసు కూడా కేసీఆర్, కేటీఆర్ మెడకు చుట్టుకోవడం ఖాయంగా కనిపిస్తోంది.
