Universe Secret: అనంత విశ్వంలో భూమి మాత్రమే జీవులకు నిలయమా, లేక మరెక్కడైనా జీవం ఉందా? ఈ ప్రశ్న శాస్త్రవేత్తలను శతాబ్దాలుగా కలవరపెడుతోంది. ఇప్పుడు, మన సౌర వ్యవస్థకు వెలుపల, 124 కాంతి సంవత్సరాల దూరంలో ఉన్న ‘కే2–18బీ’ అనే గ్రహంపై జీవసంబంధ ప్రక్రియల సూచనలు ఉన్నట్లు యూనివర్సిటీ ఆఫ్ కేంబ్రిడ్జ్(Kame bridge) పరిశోధకులు వెల్లడించారు. ఈ ఆవిష్కరణ గ్రహాంతర జీవం గురించిన చర్చలకు కొత్త ఊపిరి పోసింది, విశ్వంలో మనం ఒంటరివాళ్లం కాదని సూచిస్తోంది.
Also Read: AI మరింత చొచ్చుకు వస్తోంది.. ఇప్పుడు వంటింట్లోకీ ప్రవేశించి బిర్యానీ చేసేసింది.. వీడియో వైరల్
కే2–18బీ అనేది సబ్–నెప్ట్యూన్ తరగతి ఎక్సోప్లానెట్, ఇది భూమి కంటే 8.5 రెట్లు పెద్దది. దాని నక్షత్రం చుట్టూ నివాసయోగ్యమైన కక్ష్యలో పరిభ్రమిస్తుంది. అమెరికా అంతరిక్ష పరిశోధనా కేంద్రం నాసాకు చెందిన జేమ్స్ వెబ్ స్పేస్ టెలిస్కోప్తో ఈ గ్రహం వాతావరణంలో డైమిథెల్ సల్ఫైడ్ (డీఎంఎస్), డైమిథెల్ డైసల్ఫైడ్ (డీఎండీఎస్) వాయువులను గుర్తించారు. ఈ వాయువులు భూమిపై సముద్ర ఆల్గే, ఫైటోప్లాంక్టన్ వంటి జీవుల ద్వారా ఉత్పత్తి అవుతాయి, ఇవి జీవసంబంధ ప్రక్రియలకు సూచనగా భావించబడతాయి. ఈ ఆవిష్కరణ కే2–18బీపై సూక్ష్మజీవుల లేదా ఇతర జీవరూపాల ఉనికిని సూచిస్తుంది, అయితే ఇది భూమిలాంటి సంక్లిష్ట జీవులను కలిగి ఉండకపోవచ్చు.
నీటి సముద్రాల రహస్యం
కే2–18బీ(K2-18B)ని శాస్త్రవేత్తలు ‘హైసియన్ ప్రపంచం’గా వర్గీకరించారు, దీని ఉపరితలం ద్రవ నీటి సముద్రాలతో కప్పబడి ఉండవచ్చు. హైడ్రోజన్–సమృద్ధ వాతావరణం కలిగి ఉంటుంది. ఇక 2023లో ఈ గ్రహంపై మిథేన్, కార్బన్ డైఆక్సైడ్ వంటి వాయువులతోపాటు డీఎంఎస్, డీఎండీఎస్ ఉనికిని గుర్తించారు. ఈ గ్రహం ఎలా ఏర్పడింది, దాని భౌగోళిక నిర్మాణం ఎలా ఉంది అనే అంశాలు ఇప్పటికీ అన్వేషణలో ఉన్నాయి. హైసియన్ గ్రహాలు జీవం కలిగి ఉండేందుకు అనుకూలమైన వాతావరణాన్ని కలిగి ఉంటాయని శాస్త్రవేత్తలు భావిస్తున్నారు, ఇవి సౌర వ్యవస్థ వెలుపల జీవం గుర్తించే కీలక స్థానాలుగా పరిగణించబడుతున్నాయి.
గ్రహాంతర జీవం అన్వేషణలో దిగ్గజం
ఈ పరిశోధనకు నాయకత్వం వహించిన యూనివర్సిటీ ఆఫ్ కేంబ్రిడ్జ్ ప్రొఫెసర్ నిక్కు మధుసూదన్(Madhusudan), భారత సంతతికి చెందిన బ్రిటిష్ శాస్త్రవేత్త. ఐఐటీ–వారణాసిలో బీటెక్, ఎంఐటీలో ఎంఎస్, పీహెచ్డీ పూర్తి చేసిన మధుసూదన్, ఎక్సోప్లానెట్ పరిశోధనలో అంతర్జాతీయ గుర్తింపు పొందారు. 2020లో వాస్–19బీ గ్రహంపై టైటానియం ఆక్సైడ్ గుర్తించిన బృందంలో ఆయన కీలక సభ్యుడు. ‘‘కే2–18బీపై జీవం సంకేతాలు కనిపెట్టడం సౌర వ్యవస్థ వెలుపల జీవం ఉనికిని అన్వేషించడంలో కీలక మలుపు. మనం విశ్వంలో ఒంటరివాళ్లం కాదు, రాబోయే సంవత్సరాల్లో ఇతర గ్రహాలపై జీవులను కచ్చితంగా గుర్తిస్తాం’’ అని మధుసూదన్ ఆశాభావం వ్యక్తం చేశారు.
విశ్వంలో జీవం అన్వేషణ
1990 నుంచి ఇప్పటివరకు సౌర వ్యవస్థ వెలుపల 5,800 ఎక్సోప్లానెట్స్ను శాస్త్రవేత్తలు గుర్తించారు. వీటిలో చాలా వరకు జీవం సాధ్యమయ్యే పరిస్థితులను కలిగి ఉన్నట్లు భావిస్తున్నారు. ఈ గ్రహాలు తరచుగా ద్రవ నీటి సముద్రాలు.. హైడ్రోజన్–సమృద్ధ వాతావరణంతో ఉంటాయి. ఇవి జీవం మనుగడకు అనుకూలమైనవిగా పరిగణించబడతాయి. కే2–18బీ ఈ గ్రహాలలో ఒకటిగా, జీవసంబంధ వాయువుల ఉనికి ద్వారా శాస్త్రవేత్తల దష్టిని ఆకర్షించింది. అయితే, ఈ గ్రహంపై జీవం రూపం, దాని స్వభావం గురించి మరింత లోతైన అధ్యయనం అవసరమని పరిశోధకులు సూచిస్తున్నారు.
గ్రహాంతర జీవం దగ్గరగా
కే2–18బీపై గుర్తించిన డీఎంఎస్, డీఎండీఎస్ వాయువులు జీవసంబంధ ప్రక్రియలకు సంబంధించినవైనప్పటికీ, ఈ వాయువులు ఇతర రసాయన ప్రక్రియల ద్వారా ఉత్పత్తి అయ్యే అవకాశాన్ని కూడా పరిశోధకులు పరిగణనలోకి తీసుకుంటున్నారు. ఈ గ్రహం వాతావరణం, ఉపరితల పరిస్థితులను మరింత విశ్లేషించడానికి జేమ్స్ వెబ్ టెలిస్కోప్ ద్వారా పరిశీలనలు అవసరం. ఈ ఆవిష్కరణ గ్రహాంతర జీవం అన్వేషణలో ఒక మైలురాయిగా భావించబడుతోంది, ఇది రాబోయే దశాబ్దాల్లో ఇతర గ్రహాలపై జీవం గుర్తించే అవకాశాలను పెంచుతోంది.
Also Read: గూగుల్ యాడ్స్ సేఫ్టీ: భారత్లో 247.4 మిలియన్ ప్రకటనల తొలగింపు
