India Tech Growth: ఏఐ.. ఆర్టిఫీషియల్ ఇంటలిజెన్స్.. కృత్రిమ మేధస్సు.. పేరు ఏదైనా.. అన్నింటికి అర్థం ఒక్కటే. ఏ పని అయినా చిటికెలో చేస్తుంది. ఎంత రిస్క్ అయినా వెనుకాడదు.. ఎలాంటి సమాచారం కావాలన్నా క్షణాల్లో ఇస్తుంది. వాడుకోవాలే కానీ.. ఏది పడితే అది ఇచ్చేస్తుంది. అందుకే ప్రస్తుతం అంతా ఏఐ జనరేషన్. మనం తయారు చేసిన ఈ కృత్రిమ మేధస్సు ఇప్పుడు మనకే సవాల్గా మారింది. దీని కారణంగా వేల మంది ఉపాధికి దూరమవుతున్నారు. అన్నిరంగాల్లోకి వేగంగా విస్తరిస్తున్న ఈ ఏఐ రేసులో మనం ఎక్కడ ఉన్నామన్న ప్రశ్న ఇప్పుడు అందరి మదిలో మెదులుతోంది. ఏఐలో భారత్ గణనీయమైన సామర్థ్యం కలిగి ఉన్నప్పటికీ, ప్రపంచ ఏఐ రేసులో వెనుకబడి ఉంది. అమెరికా చాట్జీపీటీ, చైనా డీప్సీక్ వంటి ఫౌండేషనల్ ఏఐ మోడల్స్తో ఆధిపత్యం చెలాయిస్తుండగా, భారత్ ఇటీవలే సొంత ఏఐ మోడల్ రూపకల్పనకు ప్రతిపాదనలను ఆహ్వానించింది. కజఖ్స్థాన్ వంటి చిన్న దేశం స్థానిక భాషలో ‘కన్ఎల్ఎల్ఎం’ మోడల్ను సృష్టించగలిగితే, 140 కోట్ల జనాభా, 50 లక్షల ఐటీ నిపుణులు ఉన్న భారత్ ఇంకా సొంత ఏఐ ఫౌండేషనల్ మోడల్ను సమర్థవంతంగా రూపొందించలేదు.
Also Read: టర్కీ చేతిలో సరికొత్త ఆయుధం.. ఉలిక్కిపడిన ప్రపంచ దేశాలు!
వెనుకబడడానికి కారణాలు..
2024లో భారత్ తన జీడీపీలో కేవలం 0.65%ను పరిశోధన, అభివృద్ధికి కేటాయించింది, అమెరికా (3.5%), చైనా (2.68%)తో పోలిస్తే ఇది చాలా తక్కువ. అమెరికా ఏఐ మౌలిక సదుపాయాల కోసం 50 బిలియన్ డాలర్లు, చైనా 13.7 బిలియన్ డాలర్లు కేటాయిస్తుండగా, భారత్ జాతీయ ఏఐ మిషన్కు కేవలం 121 మిలియన్ డాలర్లు మాత్రమే కేటాయించింది. కొన్ని దశాబ్దాలుగా భారత్ ఐటీ సేవల అవుట్సోర్సింగ్పై దృష్టి సారించింది, కానీ సొంత ఉత్పత్తులు, ఏఐ ఫౌండేషనల్ మోడల్స్ రూపకల్పనపై తగిన శ్రద్ధ చూపలేదు. 2010–22 మధ్య ప్రపంచ ఏఐ పేటెంట్లలో అమెరికా (60%), చైనా (20%) ఆధిపత్యం చెలాయిస్తుండగా, భారత్ వాటా 0.5% కంటే తక్కువగా ఉంది. భారత్లో ఏఐ నిపుణులు పెద్ద సంఖ్యలో ఉన్నప్పటికీ, చాలామంది విదేశాలకు వలస వెళ్తున్నారు, దీనివల్ల స్థానిక ఏఐ అభివృద్ధి బలహీనమవుతోంది. భారతదేశంలో 22 అధికార భాషలు, వందలాది స్థానిక భాషలు ఉన్నాయి, కానీ ఆన్లైన్ కంటెంట్లో ఆంగ్లేతర భాషల వాటా 1% కంటే తక్కువ. ఇది భారతీయ భాషల్లో నాణ్యమైన డేటా సేకరణను కష్టతరం చేస్తోంది. ఇది ఏఐ మోడల్స్ శిక్షణకు ప్రధాన అడ్డంకి.
భారత్ బలాలు ఇవీ
ఆధార్, యూపీఐ వంటి డిజిటల్ వ్యవస్థలు భారత్ సాంకేతిక సామర్థ్యాన్ని నిరూపించాయి. యూపీఐ ద్వారా డిజిటల్ చెల్లింపుల విస్తృత వినియోగం భారత్ డిజిటల్ సత్తాను చాటుతోంది.: 50 లక్షల మంది ఐటీ నిపుణులతో, భారత్లో ఏఐ అభివృద్ధికి అవసరమైన మానవ వనరులు సమృద్ధిగా ఉన్నాయి. 7,114 జనరేటివ్ ఏఐ స్టార్టప్లు 2.3 బిలియన్ డాలర్ల మూలధనాన్ని సమీకరించాయి, సర్వం ఏఐ యొక్క ‘ఓపెన్ హాథీ’, కృత్రిమ్–2 ఏఐ వంటి ప్రాజెక్టులు భారతీయ భాషల్లో మోడల్స్ రూపొందిస్తున్నాయి.
Also Read: అమ్మాయి అనగానే సొల్లు కార్చాడు.. ఎకౌంటు చెక్ చేసుకుంటే షాక్!
రేసులో ముందుకు రావడానికి వ్యూహాలు
ఏఐ పరిశోధన, అభివృద్ధికి జీడీపీలో ఎక్కువ వాటా కేటాయించాలి. జాతీయ ఏఐ మిషన్కు అదనపు నిధులు, 15,916 జీపీయూలతో సహా 34,333 జీపీయూలను సమకూర్చినప్పటికీ, అత్యాధునిక హార్డ్వేర్, క్లౌడ్ కంప్యూటింగ్ వనరుల కొరతను అధిగమించాలి. భారతీయ భాషల్లో నాణ్యమైన డేటా సేకరణకు ప్రభుత్వం, ప్రైవేట్ సంస్థలు సహకరించాలి. ఓపెన్–సోర్స్ డేటా రిపోజిటరీలను సృష్టించడం ద్వారా ఈ సమస్యను పరిష్కరించవచ్చు. ఏఐ నిపుణులను స్వదేశంలో నిలుపుకోవడానికి ప్రోత్సాహకాలు, పరిశోధన అవకాశాలు, పోటీతత్వ వేతనాలు అందించాలి. ప్రభుత్వం, పరిశ్రమలు, విద్యాసంస్థల సమన్వయంతో ఏఐ ఎకోసిస్టమ్ను బలోపేతం చేయాలి. సోకెట్ ఏఐ, సర్వం ఏఐ, జ్ఞాన్ ఏఐ వంటి స్టార్టప్లకు మద్దతు ఇవ్వడం కీలకం. అమెరికా టెక్నాలజీపై ఆధారపడటం తగ్గించి, స్వదేశీ ఏఐ మోడల్స్, హార్డ్వేర్ను అభివృద్ధి చేయడం ద్వారా సాంకేతిక స్వాతంత్య్రం సాధించాలి.
భారత్ తన పరిమిత వనరులతోనూ అద్భుతాలు సృష్టించగల సామర్థ్యం కలిగి ఉంది, మంగళ్యాన్ వంటి ఉదాహరణలు దీనికి నిదర్శనం. ఆధార్, యూపీఐ వంటి డిజిటల్ విజయాలను ఏఐ రంగంలో పునరావృతం చేయవచ్చు. తక్కువ ఖర్చుతో గరిష్ఠ ఫలితాలను సాధించే భారత్ యొక్క సామర్థ్యం, బహుభాషా సందర్భంలో స్థానిక ఏఐ మోడల్స్ రూపకల్పనకు బలమైన పునాదిని అందిస్తుంది. సర్వం ఏఐ యొక్క ‘ఓపెన్ హాథీ’, కృత్రిమ్–2 ఏఐ వంటి ప్రయత్నాలు ఈ దిశలో ఆశాజనకమైన ఆరంభం.
