Vaibhav Team India jersey: భారత క్రికెట్ బోర్డు జూన్ 23, 2026న సోషల్ మీడియాలో ఒక వీడియోను విడుదల చేసింది. ఇందులో 15 ఏళ్ల వైభవ్ సూర్యవంశీ భారత జట్టు జెర్సీని స్వీకరించిన సన్నివేశాలు ఉన్నాయి. ఆ జెర్సీని ప్రముఖ థ్రోడౌన్ స్పెషలిస్ట్ రఘు అతని చేతికి అందించాడు. వైభవ్ ఆ క్షణంలో రఘు కాళ్లకు నమస్కరించి గౌరవం చూపించారు. బోర్డు ఆ వీడియోకు ‘‘లేడీస్ అండ్ జెంటిల్మెన్.. దేశం మొత్తం ఎదురుచూస్తున్న క్షణం వచ్చేసింది. వైభవ్ సూర్యవంశీ టీమ్ ఇండియా జెర్సీలో.. ఈ అద్భుతమైన క్షణాలను చూడండి’’ అని క్యాప్షన్ ఇచ్చింది.
వైభవ్ ఆనంద హేల…
వైభవ్ బ్యాట్ పట్టుకుని మొదటిసారి మైదానంలో అభ్యాసం చేసిన రోజు నుంచే భారత జట్టు జెర్సీ వేసుకోవాలని కలలు కంటున్నానని చెప్పాడు. ఆ కల నేడు నెరవేరిందని, తన క్రికెట్ ప్రయాణంలో ఒక ముఖ్యమైన దశ మొదలైందని అన్నాడు. ఆ సంతోషం మాటల్లో వర్ణించలేనంతగా ఉందని, ఇదంతా కలలాగా అనిపిస్తోందని, జెర్సీ చూసిన క్షణంలో సంతోషం పట్టలేకపోయానని, నవ్వు ఆగలేదని తన భావాలను పంచుకున్నాడు. కొన్ని సార్లు ఊహించని అద్భుతాలు జరుగుతాయని, అలాంటి సమయంలో ఎలా స్పందించాలో కూడా అర్థం కాదని అన్నాడు.
వైభవ్ సూర్యవంశీ నేపథ్యం
సూర్యవంశీ బీహార్కు చెందిన లెఫ్ట్హ్యాండ్ బ్యాట్స్మెన్. 2011 మార్చి 27న జన్మించాడు. ఇప్పుడు కేవలం 15 ఏళ్ల వయసులోనే సీనియర్ భారత జట్టుకు ఎంపికయ్యాడు. ఐపీఎల్లో రాజస్థాన్ రాయల్స్కు ప్రాతినిధ్యం వహిస్తున్నాడు. గల్లీ క్రికెట్ నుంచి ప్రారంభమైన అతని ప్రయాణం వేగంగా ఎదిగింది. 2025 మెగా వేలంలో రాయల్స్ అతన్ని రూ.1.1 కోట్లకు కొనుగోలు చేసింది. ఐపీఎల్లో అతి పిన్న వయసు ఆటగాడిగా అరంగేట్రం చేసి, అనేక రికార్డులు సృష్టించాడు.
రికార్డ్ బ్రేకింగ్ ప్రదర్శనలు ఇవీ..
2026 ఐపీఎల్ సీజన్లో రాయల్స్ తరఫున 16 ఇన్నింగ్స్లలో 776 పరుగులు చేసి ఆరెంజ్ క్యాప్ సాధించాడు. ఒక సెంచరీ, ఐదు అర్ధసెంచరీలు, 72 సిక్సర్లు కొట్టాడు. స్ట్రైక్ రేట్ 237.30గా నిలిచింది. ఐపీఎల్ చరిత్రలో అత్యంత వేగంగా 1000 పరుగులు (440 బంతుల్లో) చేసిన ఆటగాడిగా రికార్డు సృష్టించాడు. ప్లేఆఫ్లో 29 బంతుల్లో 97, 47 బంతుల్లో 96 పరుగులు చేశాడు. 2026 ప్రారంభంలో భారత అండర్–19 వరల్డ్ కప్లో ప్లేయర్ ఆఫ్ ది టోర్నమెంట్గా నిలిచి, ఫైనల్లో ఇంగ్లండ్పై 80 బంతుల్లో 175 పరుగులు చేశాడు. ఇటీవల శ్రీలంకతో జరిగిన ట్రై–నేషన్ సిరీస్ ఫైనల్లో 29 బంతుల్లో 94 పరుగులు చేసి, లిస్ట్ అ క్రికెట్లో అత్యంత వేగవంతమైన ఫిఫ్టీ (11 బంతుల్లో) సాధించాడు. ఆ ప్రదర్శనతో భారత ఏ 66 పరుగుల తేడాతో విజయం సాధించింది.
నంబర్ 3 జెర్సీ ప్రత్యేకత…
వైభవ్కు బీసీసీఐ నంబర్ 3 జర్సీ కేటాయించింది. గతంలో హర్భజన్ సింగ్, సురేశ్ రైనా వంటి ఆటగాళ్లు ఈ నంబర్తో భారత జట్టుకు ప్రాతినిధ్యం వహించారు. వారి రిటైర్మెంట్ తర్వాత ఇప్పుడు వైభవ్కు ఈ నంబర్ కేటాయించారు. అండర్–19 వరల్డ్ కప్ సమయంలో కూడా అతను నంబర్ 3 జెర్సీనే ధరించాడు.
రాబోయే టూర్లో అవకాశాలు..
ఐర్లాండ్, ఇంగ్లాండ్తో జరగనున్న టీ20 సిరీస్లకు వైభవ్ను ఎంపీక చేశారు. జూన్ 26, 28 తేదీల్లో బెల్ఫాస్ట్లో ఐర్లాండ్తో రెండు టీ20 మ్యాచ్లు, జూలై 1 నుంచి 11 వరకు ఇంగ్లాండ్తో ఐదు టీ20 మ్యాచ్లు జరగనున్నాయి. అతను ఓపెనింగ్లో అభిషేక్ శర్మతో కలిసి బ్యాటింగ్ చేయనున్నాడు. సీనియర్ భారత జట్టుకు ఎంపికైన అతి పిన్న వయసు ఆటగాడిగా(15 సంవత్సరాల 87 రోజులు) సచిన్ టెండూల్కర్ రికార్డును బద్దలు కొట్టాడు. తుది జట్టులో చోటు ఖాయమని భావిస్తున్నారు. 2026 ఆసియన్ గేమ్స్కు కూడా అతని ఎంపిక ఉంది.
ఈ యువ సంచలనం ఇంకా చాలా ఎదగాల్సి ఉంది. అతని ప్రతిభ, ఆటగారి మనస్తత్వం, ఫిట్నెస్పై దృష్టి పెట్టి బీసీసీఐ జాగ్రత్తగా నిర్వహిస్తోంది. రాబోయే రోజుల్లో వైభవ్ ఎలా ప్రదర్శన ఇస్తాడో క్రికెట్ ప్రేమికులు ఆసక్తిగా ఎదురుచూస్తున్నారు.
View this post on Instagram
