Lion Hunting Viral Video: అది గుజరాత్లోని ప్రసిద్ధ గిర్ అభయారణ్యం. పర్యాటకులు సఫారీ వాహనాల్లో ప్రకృతిని, వన్యప్రాణులను వీక్షిస్తూ ఉత్సాహంగా సాగిపోయే ప్రదేశం. చుట్టూ దట్టమైన పొదలు, ఎండ వేడికి ఎండుతున్న గడ్డి.. వాతావరణం అంతా ప్రశాంతంగా కనిపిస్తోంది. కానీ ఆ ప్రశాంతత వెనుక ఒక భయంకరమైన వేట దాగి ఉందని అక్కడ ఉన్న పర్యాటకులు ఊహించలేదు. ఈ వేటను చూసి పర్యాటకులు ఒక్కసారిగా విస్మయానికి గురయ్యారు. ఈ వీడియో ఇప్పుడు సోషల్ మీడియాలో వైరల్ అవుతోంది.
సఫారీలో ఉన్న పర్యాటకు తమ చూట్టూ ప్రదేశాలను చూస్తూ ఎంజాయ్ చేస్తున్నారు. కానీ ఇదే సమయంలో వీరి వైపు ఒక ఓ జంతువు ఏమరపాటుగా వచ్చింది. ఆ జంతువు రాకను ముందే పసిగట్టిన ఒక ఆడసింహం, అత్యంత వ్యూహాత్మకంగా పర్యాటకుల సఫారీ వాహనం వెనుక దాక్కుంది.ఈ వాహనం అడ్డుగోడలా మారడంతో, వేటాడే జంతువుకు సింహం ఉనికి అస్సలు తెలియలేదు. సింహం తన శరీరాన్ని భూమికి ఆనించి, శ్వాసను కూడా నియంత్రించుకుంటూ సరైన సమయం కోసం వేచి చూసింది.
ఆ జంతువు వాహనానికి అతి దగ్గరగా రాగానే, ఆడసింహం మెరుపు వేగంతో దానిపైకి ఎగిరిపడింది. ఈ దాడికి ఆ జంతువు కోలుకునేలోపే, సమీపంలోనే పొంచి ఉన్న మగసింహం కూడా రంగ ప్రవేశం చేసింది. గంభీరమైన గర్జనతో మగసింహం ఒక్కసారిగా దానిపైకి దూకి, పదునైన పళ్ళతో జంతువు గొంతును గట్టిగా పట్టుకుంది. కేవలం కొన్ని సెకన్ల వ్యవధిలోనే ఆ భీకర వేట ముగిసిపోయింది.
తమ కళ్లముందే అతి తక్కువ దూరంలో జరిగిన ఈ సహజసిద్ధమైన వేటను చూసి పర్యాటకులు ఒక్కసారిగా నిర్ఘాంతపోయారు. కొందరు భయంతో వణికిపోగా, మరికొందరు ఆ దృశ్యాలను తమ కెమెరాల్లో బంధించారు. ప్రకృతిలో ‘బలవంతుడిదే రాజ్యం’ అనే సూత్రానికి ఈ ఘటన సజీవ సాక్ష్యంగా నిలిచింది. ప్రస్తుతం ఈ భీకర వేటకు సంబంధించిన వీడియో సోషల్ మీడియాలో వైరల్గా మారి నెటిజన్లను ఆశ్చర్యానికి గురిచేస్తోంది.
