Pilot Meals: విమానం అనేది వేగంగా, సురక్షితంగా ఒక చోటు నుంచి మరొక చోటుకు చేర్చే మార్గం. కానీ ప్రయాణికులు చూసే సాధారణ విషయాల వెనుక ఎన్నో జాగ్రత్తలు, శాస్త్రీయ ప్రణాళికలు దాగి ఉంటాయి. ప్రతీ చిన్న చర్య కూడా ప్రయాణికుల ప్రాణాలను రక్షించడానికే రూపొందించబడింది.
ఆక్సిజన్ మాస్కులు ఎందుకు?
అత్యవసర సమయంలో పై నుంచి వస్తున్న ఆక్సిజన్ మాస్కులు కేవలం 12 నుంచి 20 నిమిషాలపాటు మాత్రమే పని చేస్తాయి. ఇది సరిపోతుంది, ఎందుకంటే ఆ సమయంలోనే పైలట్లు విమానాన్ని సుమారు 10 వేల అడుగుల ఎత్తుకు దించేస్తారు. ఆ స్థాయిలో సాధారణ గాలి సురక్షితంగా పీల్చవచ్చు. అందుకే ఎక్కువ ఆక్సిజన్ నిల్వ అవసరం ఉండదు.
పైలట్, కో–పైలట్కు వేర్వేరు భోజనం..
చాలా విమాన సంస్థలు పైలట్, కోపైలట్కు ఒకే రకమైన ఆహారం ఇవ్వవు. ఒకవేళ ఆహారంలో ఏదైనా సమస్య ఉంటే ఇద్దరూ ఒకేసారి అస్వస్థతకు గురికాకుండా ఉండాలని ఈ జాగ్రత్త తీసుకుంటారు. ఇది విమానం నడిపే వారి ఆరోగ్యాన్ని కాపాడే ముఖ్యమైన భద్రతా నియమం.
టేకాఫ్, ల్యాండింగ్ మసకబార్చడం..
విమానం ఎక్కేటప్పుడు, దించేటప్పుడు క్యాబిన్ లైట్లను కొంత తక్కువ చేస్తారు. ఇది కేవలం సౌకర్యం కోసం కాదు. అత్యవసరంగా విమానం ఖాళీ చేయాల్సి వస్తే, చీకటికి కళ్లు ముందుగానే అలవాటు పడాలని ఇలా చేస్తారు. అప్పుడు అత్యవసర ద్వారాలు సులభంగా కనిపిస్తాయి, ప్రయాణికులు వేగంగా బయటకు వెళ్లగలుగుతారు.
క్యాబిన్ సిబ్బంది రహస్య పనులు..
క్యాబిన్ క్రూ సభ్యులు ప్రయాణికులను స్వాగతించడమే కాదు. అత్యవసర పరిస్థితి వచ్చినప్పుడు సహాయం చేయగల వ్యక్తులను నిశ్శబ్దంగా గుర్తిస్తుంటారు. అలాగే టాయిలెట్ తలుపులను బయట నుంచి కూడా తెరవగలిగేలా ప్రత్యేక వ్యవస్థ ఉంటుంది. లోపల ఎవరైనా అపస్మారక స్థితికి వెళ్లినా వెంటనే సహాయం అందించడానికి ఇది ఉపయోగపడుతుంది.
నీళ్ల విషయంలో ఎక్కువ జాగ్రత్త..
విమానంలోని నీటి వ్యవస్థ అంతర్జాతీయ నిబంధనల ప్రకారం ఉంటుంది. అయినప్పటికీ చాలా మంది పైలట్లు, క్యాబిన్ సిబ్బంది బాటిల్ వాటర్నే ఎంచుకుంటారు. ఇది అదనపు జాగ్రత్తగా భావిస్తారు.
ఆధునిక విమానాల్లో బ్యాకప్ వ్యవస్థలు, కఠినమైన తనిఖీలు, నిరంతర శిక్షణ, అంతర్జాతీయ నిబంధనలు వంటి అనేక రక్షణ పొరలు ఉంటాయి. అందుకే ప్రయాణికులకు సులభంగా అనిపించినా, ప్రతీక్షణం అత్యున్నత స్థాయి భద్రతా ప్రణాళిక పని చేస్తూనే ఉంటుంది.
