IPL Media Rights: ఇప్పటికే ఎన్నో రికార్డులు బద్దలు కొట్టిన ఐపీఎల్.. తాజాగా మీడియా హక్కుల పరంగా మరో రికార్డును బద్దలు కొట్టింది. ప్రముఖ ఫుట్ బాల్ లీగ్ ఇంగ్లీస్ ప్రీమియర్ లీగ్ (ఈపీఎల్)ను వెనక్కి నెట్టిన ఐపీఎల్.. విలువ పరంగా ప్రపంచంలో టాప్ 2 లీగ్ గా నిలిచింది. తాజాగా వేలం ద్వారా భారత టీ20 విలువ ఒక్కసారిగా పెరిగింది. టీవీ, డిజిటల్ హక్కుల ద్వారా ఐపీఎల్ ఒక్కో మ్యాచ్ విలువ రూ.107.5 కోట్లకు చేరింది. ఈ జాబితాలో అమెరికన్ ఫుట్ బాల్ లీగ్ (ఎన్ఎఫ్ఎల్) ఐపీఎల్ కంటే ముందుంది. ఎన్ఎఫ్ఎల్ లో ఒక్కో మ్యాచ్ విలువ రూ.133 కోట్లు.
ఐపీఎల్ ప్రసార హక్కుల కోసం నిర్వహించిన ఈ-బిడ్డింగ్ ప్రక్రియలో బీసీసీఐపై కాసుల వర్షం కురిసింది. ఐపీఎల్ టీవీ ప్రసార హక్కులను స్టార్ ఇండియా దక్కించుకుందని.. స్టార్ ఇండియా అత్యధికంగా రూ.23575 కోట్లకు బిడ్ వేసిందని తెలిపారు.
ఐపీఎల్ డిజిటల్ హక్కులను వయాకామ్ 18 సంస్థ చేజిక్కించుకుంది. వయాకామ్18 మొత్తం రూ.23758 కోట్ల బిడ్డింగ్ తో డిజిటల్ ప్రసార హక్కులను సొంతం చేసుకుందని బీసీసీఐ కార్యదర్శి జైషా వెల్లడించారు. ఆస్ట్రేలియా, దక్షిణాఫ్రికా, యూకే ప్రాంతాల డిజిటల్ హక్కులు వయాకామ్ 18 కైవసం చేసుకుందని.. మధ్యప్రాచ్యం-ఉత్తర ఆఫ్రికా, అమెరికా, తదితర దేశాల డిజిటల్ ప్రసార హక్కులను టైమ్స్ ఇంటర్నెట్ చేజిక్కించుకుందని జైషా తెలిపారు.
మొత్తం మీద ఓవరాల్ గా ఐపీఎల్ ప్రసార హక్కుల విలువ ఏకంగా రూ.48390 కోట్లు అని జైషా వివరించారు. వరుసగా రెండేళ్లు కరోనా సంక్షోభం వేధించినప్పటికీ ఈ స్థాయిలో బిడ్డింగ్ రావడం బీసీసీఐ సామర్థ్యానికి గీటురాయిగా చెప్పవచ్చు.
ఓ మ్యాచ్ విలువను పరిగణలోకి తీసుకుంటే ఐపీఎల్ ప్రపంచంలోనే అత్యంత విలువైన స్పోర్టింగ్ లీగ్ ల్లో రెండో స్థానంలో ఉంటుందని తెలిపారు. కాగా ఐపీఎల్ ద్వారా సమకూరిన ఆదాయాన్ని బీసీసీఐ క్షేత్రస్థాయి నుంచి దేశవాళీ క్రికెట్ ను అభివృద్ధి చేసేందుకు ఉపయోగిస్తుందని వెల్లడించారు.
ఐపీఎల్ ప్రసారహక్కుల కోసం బిడ్డింగ్ లో వయాకామ్, డిస్నీ ప్లస్ హాట్ స్టార్, సోనీ పిక్చర్స్, అమెజాన్, జీ గ్రూప్, గూగుల్, స్కై స్పోర్ట్స్, సూపర్ స్పోర్ట్స్, ఫేస్ బుక్, యాపిల్ వంటి దిగ్గజ కంపెనీలు పోటీపడ్డాయి. అయితే చివరకు అమేజన్ ఐపీఎల్ మీడియా బిడ్డింగ్ నుంచి తప్పుకుంది. చివరకు వయాకామ్, డిస్నీ ప్లస్ హాట్ స్టార్ ఐపీఎల్ 2023-27 సీజన్ టీవీ, డిజిటల్ హక్కులను సొంతం చేసుకున్నాయి. డిజిటల్ రైట్స్ ను దక్కించుకున్న వయాకామ్ 18కి చెందిన వూట్ లో ఐపీఎల్ ప్రసారం కానుందని సమాచారం.
