AC Remote Energy Saving Tips: ప్రస్తుతం వర్షాకాలం ప్రారంభం అయినా కూడా వేడి తగ్గడం లేదు. దీంతో చాలా మంది ఏసీని ఇంకా వినియోగిస్తున్నారు. ఏసీ వినియోగంతో చల్లటి వాతావరణం నెలకొంటుంది. కానీ చల్లని గాలి ఎంత సౌకర్యాన్ని ఇస్తుందో, నెలాఖరులో వచ్చే విద్యుత్ బిల్లు అంతే ఆందోళన కలిగిస్తుంది. అయితే చాలా మందికి తెలియని విషయం ఏమిటంటే.. ఏసీ రిమోట్లో ఉండే రెండు బటన్స్ ద్వారా విద్యుత్ వినియోగాన్ని భారీగా తగ్గించుకోవచ్చు. దీంతో కరెంట్ బిల్లుపై కూడా ప్రభావం పడుతుంది. ఈ రెండు బటన్స్ గురించి పూర్తి వివరాల్లోకి వెళితె..
స్లీప్ మోడ్ (Sleep Mode):
చాలా మంది రాత్రంతా 18 లేదా 20 డిగ్రీల వద్ద ఏసీని నడుపుతుంటారు. కానీ ఇది అవసరానికి మించి విద్యుత్ను ఖర్చు చేస్తుంది. Sleep Modeలో ఏసీ పనిచేస్తే గది చల్లదనం, శరీరానికి అవసరమైన ఉష్ణోగ్రత మధ్య సమతుల్యతను కాపాడేలా టెంపరేచర్ను క్రమంగా సర్దుబాటు చేస్తుంది. దీంతో నిద్రకు ఇబ్బంది లేకుండా ఉండటమే కాకుండా విద్యుత్ ఖర్చు కూడా కొంత తగ్గుతుంది.రాత్రి పడుకునే సమయంలో శరీర ఉష్ణోగ్రత క్రమంగా తగ్గుతుంది. అందువల్ల మొదట అవసరమైనంత చల్లదనం ఉన్నా, అర్ధరాత్రి తర్వాత అదే స్థాయి కూలింగ్ అవసరం ఉండకపోవచ్చు. ఈ విషయాన్ని దృష్టిలో ఉంచుకుని ఏసీల్లో Sleep Mode ఫీచర్ను అందిస్తున్నారు. దీనిని ఆన్ చేస్తే ఏసీ గది ఉష్ణోగ్రతను బట్టి క్రమంగా 1 నుంచి 2 డిగ్రీల వరకు పెంచుతుంది. దీంతో కంప్రెసర్ నిరంతరం పనిచేయాల్సిన అవసరం తగ్గి విద్యుత్ వినియోగం కూడా తగ్గే అవకాశం ఉంటుంది.
టైమర్ (Timer):
చాలా సందర్భాల్లో తెల్లవారుజామున వాతావరణం చల్లబడినా ఏసీ అలాగే నడుస్తూనే ఉంటుంది. దీంతో అనవసరంగా కరెంట్ వృథా అవుతుంది. దీనిని నివారించేందుకు Timer ఫీచర్ను ఉపయోగించవచ్చు. ఉదాహరణకు రాత్రి పడుకునే ముందు ఉదయం 5 లేదా 6 గంటలకు ఏసీ ఆటోమేటిక్గా ఆఫ్ అయ్యేలా సెట్ చేస్తే, అవసరం లేని సమయంలో విద్యుత్ వినియోగం ఆగిపోతుంది.
వీటితో పాటు విద్యుత్ బిల్లును మరింత తగ్గించుకోవాలంటే ఏసీని 24 నుంచి 26 డిగ్రీల మధ్య ఉంచడం, గది తలుపులు, కిటికీలు బాగా మూసివేయడం, ఫిల్టర్లను తరచూ శుభ్రం చేయడం, నేరుగా సూర్యరశ్మి గదిలోకి రాకుండా చూడడం వంటి అలవాట్లు కూడా పాటించాలని నిపుణులు సూచిస్తున్నారు. అలాగే ఇన్వర్టర్ ఏసీలు సాధారణ ఏసీలతో పోలిస్తే తక్కువ విద్యుత్ను వినియోగించే అవకాశం ఉంటుంది.
Sleep Mode, Timer ఫీచర్లు విద్యుత్ వినియోగాన్ని తగ్గించడంలో సహాయపడతాయి. అయితే ఎంత మేర ఆదా అవుతుందనేది ఏసీ స్టార్ రేటింగ్, గది పరిమాణం, బయట ఉష్ణోగ్రత, మీరు ఎంచుకున్న టెంపరేచర్, వినియోగ సమయం వంటి అంశాలపై ఆధారపడి ఉంటుంది. ఈ ఫీచర్లను సరిగ్గా ఉపయోగిస్తే సౌకర్యంతో పాటు విద్యుత్ బిల్లుపై కూడా కొంత భారం తగ్గించుకోవచ్చు.
