woman
woman : ఒక వ్యక్తి వ్యాపారంలో విజయం సాధించాలని నిశ్చయించుకుంటే, ఆ వ్యక్తి దానిని కొనసాగించాలి. దీని వల్ల సక్సెస్ సాధిస్తాడు. ఎన్ని ఆటంకాలు వచ్చినా సరే పట్టుదల విడవకుండా కృషి చేయాలి. ఇక కొన్ని వస్తువులు, విషయాల పట్ల ప్రతికూల ప్రభావం ఉంటుంది. ఇలాంటివి పట్టించుకుంటే మాత్రం మీరు అసలు సక్సెస్ కాలేరు. అనుకున్న పని మీతో అవుతుంది అని నిరూపించాలి అంటే చాలా సమయం పడుతుంది కానీ సాధిస్తే విజయం మాత్రం పక్కా వస్తుంది. కొందరికి లోదుస్తులను ఇతరుల ముందు కొనడం అంటేనే చాలా ఇబ్బంది. కానీ ఓ మహిళ వాటి ద్వారా బిజినెస్ చేసి ఏకంగా వార్తల్లో నిలిచింది.
వ్యాపారంలో తన తెలివితో ప్రయత్నించి విజయవంతమైన వ్యాపారవేత్తగా మారింది రిచా కర్. మరి ఆమె గురించి ఇప్పుడు తెలుసుకుందామా? ఈ లో దుస్తుల వ్యాపారాన్ని తనకు తానే ప్యాషన్‌గా తీసుకుంది రిచా కర్. ఇప్పుడు ఏకంగా ఇన్నర్‌వేర్ సెగ్మెంట్ వ్యాపారంలో రూ.1300 కోట్ల విలువైన సామ్రాజ్యాన్ని నిర్మించింది. ఈ జర్నీలో కొన్ని సంవత్సరాల తర్వాత, ముఖేష్ అంబానీకి చెందిన రిలయన్స్ రిటైల్ ఆమె కంపెనీని కొనుగోలు చేసింది. ప్రజలు తరచుగా ఇన్నర్‌వేర్ వ్యాపారంలోకి రావడానికి చాలా సిగ్గు పడటం ఆమె గమనించింది.
కానీ అందరూ గణనీయమైన లాభాలను ఆర్జించే అవకాశాన్ని కోల్పోతున్నారు అని అనుకుంది. సేల్స్‌మెన్‌లు మగవారైతే మహిళలు షాప్‌ను సంప్రదించడానికి ఇష్టపడరని గుర్తించిన రిచా దీనిని ఒక అవకాశంగా భావించింది. ఆమె ఈ ఛాలెంజ్‌ని ఒక పెద్ద స్టిగ్మాగా భావించింది. ఏకంగా Zivame అనే ఆన్‌లైన్ బ్రాండ్‌ను ప్రారంభించింది. ఇక రిచా తన కుటుంబ సభ్యులు, స్నేహితుల నుంచి చాలా వ్యతిరేకతను ఎదుర్కొంది. ఆమెను సమీప బంధువులు ఎగతాళి చేశారు. కానీ, మొండిగా ఉన్న రిచా వ్యాపారాన్ని స్థాపించాలని నిర్ణయించుకుంది. చివరకు ఆమె చేసింది. సక్సెస్ పర్సన్ గా నిలిచింది.
ఆమె తల్లి కూడా మొదట్లో ఆమె ఆలోచనను వ్యతిరేకించింది, కానీ ఆమె అంకితభావం, స్థితిస్థాపకత ముందు వ్యతిరేకత లొంగిపోయింది. తన కూతురు ఇన్నర్‌వేర్ వ్యాపారం ప్రారంభించిందని తన స్నేహితులు, బంధువులకు చెప్పడంతో రిచా తల్లి చాలా కలత చెందింది. తన కలను సాకారం చేసుకోవడానికి రిచా తన ఉద్యోగాన్ని కూడా వదులుకుంది. తన స్నేహితులు, సన్నిహితుల వద్ద అప్పు తీసుకుని ఆన్‌లైన్‌లో కంపెనీని ప్రారంభించింది. ఆమె దీక్షకు మహిళలు కూడా మద్దతు పలికారు. వ్యాపారం ప్రారంభించడానికి ఆమె రూ. 35 లక్షలు పెట్టుబడి పెట్టింది. 2011లో జివామే బ్యానర్‌లో లోదుస్తుల వ్యాపారాన్ని ప్రారంభించింది.
మొదట్లో, రిచా వ్యాపారానికి స్పందన లభించలేదు. కానీ కొంత కాలానికి దానికి మహిళల మద్దతు లభించింది. రిలయన్స్ రిటైల్ 2020లో బ్రాండ్‌ను కొనుగోలు చేసింది. నేడు, ఈ బ్రాండ్ 5000 కంటే ఎక్కువ లోదుస్తుల స్టైల్‌లను కలిగి ఉంది. 50 కంటే ఎక్కువ బ్రాండ్‌లను కలిగి ఉంది. 100 కంటే ఎక్కువ పరిమాణాలలో అందుబాటులో ఉంది. ఆమె సాధించిన విజయం వల్ల 2014లో రిచా పేరు ‘అండర్ 40’ జాబితాలో కూడా చేరడం గమనార్హం.
