Vaibhav Suryavanshi : సచిన్ కంటే చిన్న వయసులోనే టీమ్ ఇండియాలోకి అడుగుపెట్టాడు వైభవ్ సూర్య వంశీ. తద్వారా తన పేరు మీద ఎవరు ఇప్పట్లో బద్దలు కొట్టలేని రికార్డును సృష్టించుకున్నాడు. వైభవ్ సూర్య వంశీ కి రికార్డులు కొత్త కాదు. ఘనతలు కూడా కొత్త కాదు. తను ఏమిటో అండర్ 19 వరల్డ్ కప్ లో తెలిసింది. ఐపీఎల్ లో తెలిసింది. తాజాగా శ్రీలంక వేదికగా జరిగిన ట్రై సిరీస్ లో కూడా తెలిసింది. లెజెండ్ సినిమాలో.. బాలకృష్ణ.. నీకు నరుకుతుంటే అలుపు వస్తదేమో.. నాకు ఊపు వస్తుంది.. అని జగపతిబాబును ఉద్దేశించి అంటాడు గుర్తుంది కదా.. క్రికెట్లో సూర్య వంశీ బ్యాటింగ్ కూడా అలానే ఉంటుంది. అన్ని రకాల బంతులు వేసి బౌలర్లకు అలుపు వస్తుందేమో.. కానీ కొడుతుంటే మాత్రం అతడికి ఊపు వస్తుంది. ఐపీఎల్ లో అదే కదా అతడు చూపించింది..
తాజాగా ఇంగ్లాండ్ తో జరుగుతున్న టి20 సిరీస్లో రెండో మ్యాచ్ ద్వారా ఇంటర్నేషనల్ క్రికెట్లోకి అడుగు పెట్టాడు సూర్య వంశీ. అత్యంత చిన్న వయసులోనే టీమ్ ఇండియాలో ప్రవేశించిన ఆటగాడిగా రికార్డ్ సృష్టించాడు. తొలి మ్యాచ్లో అతడు కేవలం 14 పరుగులు మాత్రమే చేయవచ్చు గాక.. కానీ ఆర్చర్ బౌలింగ్లో కొట్టిన సిక్సర్ ఎప్పటికీ మర్చిపోరు. అతడు ఒళ్ళును విల్లులాగా వంచి కొట్టిన తీరు కు ఆర్చర్ కూడా ఫిదా అయిపోయాడు. కేవలం పది బంతుల్లోనే అతడు 14 పరుగులు చేసి అవుట్ అయినప్పటికీ.. టీమిండియా ఈ మ్యాచ్లో ఓడిపోయినప్పటికీ.. సూర్య వంశీ మీద అంచనాలు ఏమాత్రం తగ్గలేదు. పైగా అతడు సోషల్ మీడియాలో పెట్టిన ఒక పోస్ట్ ఇప్పుడు మొత్తం సంచలనంగా మారింది.
సూర్య వంశీ కి ఇప్పటికే మిలియన్లలో ఫ్యాన్స్ ఉన్నారు. వారంతా కూడా సోషల్ మీడియాలో అతడిని అనుసరిస్తున్నారు. సోషల్ మీడియాలో ఇప్పటివరకు కేవలం తన ఫోటోలు మాత్రమే పెట్టేవాడు సూర్య వంశీ. తొలిసారిగా ఒక పోస్ట్ పెట్టాడు. అది ఇప్పుడు సోషల్ మీడియాను మొత్తం దున్నేస్తోంది…”మీ ద్వారా వస్తున్న సందేశాలు నన్ను ఉద్వేగానికి గురిచేస్తున్నాయి. వాటిని చూసి నేను తన్మయత్వానికి గురవుతున్నాను. అది నాకు ఆనందాన్ని కలిగిస్తోంది. నాకు మీరు మద్దతు ఇస్తున్నారు. అండగా నిలబడుతున్నారు. మీ ప్రేమకు.. మీ ఆప్యాయతకు ధన్యవాదాలు.. నా సీనియర్లకు.. శ్రేయోభిలాషులకు పేరుపేరునా కృతజ్ఞతలు. దేశానికి ఆడే అవకాశం రావడం ఒక జీవితకాల అదృష్టం. ప్రతి సందర్భంలోనూ దేశం కోసం అన్న అత్యుత్తమ ఆటతీరు అందించాలని కోరుకుంటాను. మీ అందరికీ నా ధన్యవాదాలు” అంటూ సూర్య వంశీ తన ఇన్ స్టా స్టోరీలో పేర్కొన్నాడు.
1989లో సచిన్ టెండూల్కర్ 16 సంవత్సరాల 205 రోజుల వయసులో టీమిండియాలో చోటు సంపాదించాడు. పాకిస్తాన్ జట్టుతో టెస్ట్ ఆడి సరికొత్త రికార్డు సృష్టించాడు. మళ్లీ ఇన్ని సంవత్సరాలకు ఆ రికార్డును వైభవ్ బద్దలు కొట్టాడు. 35 సంవత్సరాలుగా చెక్కుచెదరని విధంగా ఉన్న సచిన్ రికార్డును అతడు బ్రేక్ చేశాడు. 10 సంవత్సరాల 99 రోజుల వయసులో వైభవ్ సూర్య వంశీ జాతీయ జట్టులోకి ప్రవేశించాడు.
