ఈ రెండేళ్లలో నలబై వేల కోట్లు పెట్టుబడులంటే ఆషామాషీ కాదు. భారీ స్థాయిలో వచ్చినట్లే. కియాపరిశ్రమను మొదటి దశలో పెట్టడానికి రూ.10 వేల కోట్లు మాత్రమే పెట్టుబడిగా పెట్టారు. అంటే కియా లాంటివి నాలుగు పరిశ్రమలు ఏపీకి వచ్చాయన్నమాట. అంత భారీ స్థాయి పెట్టుబడులు కాకపోయినా ఎంఎస్ఎఈ రంగంలో ఈ పెట్టుబడులు వచ్చాయనుకుంటే కొన్ని లక్షల మందికి కొత్తగా ఉపాధి లభించి ఉండేది.
అయితే ప్రభుత్వం ఈ విషయాన్నిప్రచారం చేసుకోవడంలో పూర్తిస్థాయిలో విఫలమైంది. ప్రతి పథకానికి ఫుల్ పేజీ ప్రకటన ఇచ్చినట్లుగా తాము వచ్చిన తర్వాత రాష్ర్టంలో పెట్టుబడులు పెట్టిన పరిశ్రమల వివరాలు వాటి ద్వారా ఎవరెవరికి ఎంత మందికి ఉఫాధి లభించిందో ప్రకటిస్తే ప్రతిపక్షాల ప్రచారాన్ని తిప్పికొట్టినట్లవుతుందన్న అంచనాలు ఉన్నాయి.
వైసీపీ ప్రభుత్వం ఏర్పడిన తరువాత ఓ ఇంటిలిజెంట్ తో పాటు పులివెందులలో కొన్ని పరిశ్రమలు అనంతపురంలో ఐస్ తయారీ పరిశ్రమ అంటూ కొన్ని ప్రకటనలు అప్పట్లో వచ్చాయి. వాటి సంగతి ఏమయిందో ఎవరికి తెలియదు. కొత్తగా పరిశ్రమకైనా శంకుస్థాపన జరిగినట్లుగా ఎక్కడా లేదు. చివరికి లాక్ డౌన్ కారణంగా పెద్ద ఎత్తున చిన్నతరహా పరిశ్రమలు మూతపడ్డాయని లెక్కలు వెలుగులోకి వచ్చాయి.
