Vijay CM Oath Ceremony: తమిళనాడు ముఖ్యమంత్రిగా విజయ్ ప్రమాణస్వీకారం చేస్తున్నారు. దాదాపు వారం రోజులపాటు సాగిన ఉత్కంఠ శనివారం రాత్రికి తెర పడింది. కాంగ్రెస్, కమ్యూనిస్టులు, వీసీకే, ఐ ఎం యు ఎల్ పార్టీలు సపోర్ట్ ఇవ్వడంతో విజయ్ కి ప్రభుత్వాన్ని ఏర్పాటు చేసేందుకు అవకాశం ఏర్పడింది. నిన్న కేరళ వెళ్తున్న గవర్నర్ విజయ్ అపాయింట్మెంట్ కోరితే ఇవ్వలేదు. ఆ తర్వాత చివర క్షణంలో ఇచ్చారు. దీంతో అన్ని పార్టీల ఎమ్మెల్యేలు ఇచ్చిన మద్దతు లేఖలను గవర్నర్ కు విజయ్ సమర్పించారు. దీంతో టి వి కే ఆధ్వర్యంలో ప్రభుత్వాన్ని ఏర్పాటు చేసేందుకు అన్ని పరిస్థితులు అనుకూలించాయి.
ఆదివారం ఉదయం 10 గంటలకు విజయ్ ప్రమాణస్వీకారం ప్రారంభమైంది. “విజయ్ అనే నేను” అనే పదంతో మొదలుపెట్టిన దళపతి.. తమిళనాడు ముఖ్యమంత్రిగా ప్రమాణ స్వీకారం చేశారు. విజయ్ కేవలం ముఖ్యమంత్రి అనే కాకుండా.. హోం శాఖ, ప్రజా పాలన, మంత్రులకు కేటాయించిన శాఖలు మొత్తం తన వద్ద పెట్టుకున్నారు. అత్యంత ముఖ్యమైన పబ్లిక్ వర్క్స్ డిపార్ట్మెంట్ కు సెంగొట్టయన్ ను మంత్రిగా నియమించారు. పాఠశాల విద్యాశాఖను వెంకట రామన్ కు కేటాయించారు. మున్సిపల్ అడ్మినిస్ట్రేషన్ బాధ్యతలను ఎన్ ఆనంద్ కు కేటాయించారు. కీలకమైన విద్యుత్ శాఖ సిటిఆర్ నిర్మల్ కుమార్ కు దక్కింది. ఆది ద్రావిడ సంక్షేమ శాఖ రాజమోహన్ కు కేటాయించారు. కమర్షియల్ టాక్సెస్, రిజిస్ట్రేషన్ల శాఖను అరుణ్ రాజ్ కు కేటాయించారు.
మంత్రివర్గ ప్రమాణస్వీకారం మలివిడత కూడా ఉంటుందని ఇప్పటికే టీవీకే వర్గాలు ప్రకటించాయి. ప్రథమ దశలో భాగంగా కొన్ని కీలక శాఖలకు మంత్రులను కేటాయించిన విజయ్.. ఆ తర్వాత మిగతా శాఖలకు కూడా కేటాయిస్తారని తెలుస్తోంది. విజయ్ ప్రమాణ స్వీకారానికి అభిమానులు భారీగా తరలివచ్చారు. దీంతో చెన్నై లోని ప్రమాణ స్వీకార ప్రాంతం మొత్తం సందడిగా మారింది.. విజయ్ అభిమానులు టీవీకే జెండాలతో ఆ ప్రాంతాన్ని మొత్తం పసుపు, ఎరుపు రంగు మయం చేశారు. విజయ్ విజయ్ అంటూ నినాదాలతో హోరెత్తించారు. ముఖ్యంగా “విజయ్ అనే నేను” అని విజయ్ ప్రమాణ స్వీకారం చేస్తుంటే ఆ ప్రాంతంలో బాహుబలి సీన్ రిపీట్ అయింది.
