Vice President Election: భారత రాజకీయ వేదికపై ఉపరాష్ట్రపతి ఎన్నికలు ఒక ఆసక్తికరమైన పోటీగా మారాయి. జగదీప్ ధన్ఖడ్ రాజీనామాతో ఖాళీ అయిన ఈ పదవికి సెప్టెంబర్ 9, 2025న జరగనున్న ఎన్నికల్లో ఎన్డీఏ అభ్యర్థిగా తమిళనాడుకు చెందిన పీసీ. రాధాకృష్ణన్, ఇండియా కూటమి అభ్యర్థిగా తెలంగాణకు చెందిన సుప్రీం కోర్టు రిటైర్డ్ జడ్జి బీ. సుదర్శన్రెడ్డి బరిలో నిలిచారు. ఈ ఎన్నికలు కేవలం రాజకీయ పోటీగానే కాక, తెలుగు–తమిళ ప్రాంతీయ గుర్తింపుల సమ్మేళనంగా మారాయి. ఆసక్తికరంగా, తెలుగు రాష్ట్రాల ఎంపీలు తమిళ అభ్యర్థికి, తమిళనాడు ఎంపీలు తెలుగు అభ్యర్థికి మద్దతు ఇవ్వనున్న నేపథ్యంలో ఈ ఎన్నికలు దేశ రాజకీయ వర్గాల్లో చర్చనీయాంశంగా మారాయి.
Also Read: రేవంత్ రెడ్డి విన్నపం పనిచేస్తుందా?
ఎన్నికల రాజకీయ లెక్కలు ఇలా..
ఉపరాష్ట్రపతి ఎన్నికల్లో ఓటింగ్ హక్కు ఉన్నది పార్లమెంటు ఉభయ సభల సభ్యులు. ఈ ఎన్నికల్లో ఎన్డీఏ, ఇండియా కూటమి మధ్య ఓట్ల లెక్కలు కీలక పాత్ర పోషిస్తాయి. తెలుగు రాష్ట్రాలైన ఆంధ్రప్రదేశ్, తెలంగాణలో ఎన్డీఏకు గణనీయమైన బలం ఉంది. తెలంగాణలో బీజేపీకి 10 ఎంపీలు, కాంగ్రెస్కు 8 ఎంపీలు ఉండగా, ఆంధ్రప్రదేశ్లో టీడీపీ, జనసేన, బీజేపీ కూటమికి 21 ఎంపీలు ఉన్నారు. దీని ప్రకారం, తెలుగు రాష్ట్రాల నుంచి ఎన్డీఏ అభ్యర్థి పీసీ రాధాకృష్ణన్కు 31 ఓట్లు దాదాపు ఖాయం. అదనంగా, వైఎస్సార్సీపీ (11 ఎంపీలు) ఎన్డీఏకు మద్దతు ఇవ్వనుందని సమాచారం, దీంతో ఎన్డీఏకు తెలుగు రాష్ట్రాల నుంచి 42 ఓట్లు రావొచ్చు. బీఆర్ఎస్ (3 ఎంపీలు) ఇంకా తమ మద్దతును ప్రకటించలేదు, కానీ వారి నిర్ణయం కూడా ఎన్డీఏకు అనుకూలంగా మారే అవకాశం ఉంది. మరోవైపు, తమిళనాడులో డీఎంకే, కాంగ్రెస్ నేతృత్వంలోని ఇండియా కూటమికి బలమైన పట్టు ఉంది. 2024 లోక్సభ ఎన్నికల్లో డీఎంకే నేతృత్వంలోని ఇండియా కూటమి తమిళనాడులోని 39 స్థానాలను సాధించింది. దీంతో, తమిళనాడు ఎంపీలు ఇండియా కూటమి అభ్యర్థి సుదర్శన్రెడ్డికి మద్దతు ఇవ్వనున్నారు. ఈ ప్రాంతీయ ఓట్ల మార్పిడి తెలుగు రాష్ట్రాల ఎంపీలు తమిళ అభ్యర్థికి, తమిళనాడు ఎంపీలు తెలుగు అభ్యర్థికి మద్దతు ఈ ఎన్నికలకు ప్రత్యేక ఆకర్షణను జోడించింది.
ఇద్దరూ ఉద్దండులే..
ఈ ఎన్నికల్లో పోటీ చేస్తున్న ఇద్దరు అభ్యర్థులూ తమ రంగాల్లో ఉద్దండులు. ఎన్డీఏ అభ్యర్థి పీసీ రాధాకృష్ణన్ తమిళనాడు రాజకీయాల్లో బీజేపీకి ప్రముఖ ముఖం. ఆర్ఎస్ఎస్ నేపథ్యం కలిగిన రాధాకృష్ణన్, కోయంబత్తూర్ నుంచి రెండుసార్లు ఎంపీగా గెలిచారు. బీజేపీ బలహీనంగా ఉన్న తమిళనాడులో పార్టీ స్థానాన్ని బలోపేతం చేయడానికి 19 వేల కిలోమీటర్ల పాదయాత్ర చేసిన ఘనత ఆయన సొంతం. 1998లో కోయంబత్తూర్లో జరిగిన బాంబు దాడిలో 80 మందికి పైగా మరణించగా, రాధాకృష్ణన్, అప్పటి బీజేపీ నేత అధ్వానీ తృటిలో ప్రాణాలతో బయటపడ్డారు. ప్రస్తుతం మహారాష్ట్ర గవర్నర్గా ఉన్న ఆయన, రాజకీయ అనుభవం, సామాజిక సేవలో తనదైన ముద్ర వేశారు.
ఇండియా కూటమి అభ్యర్థి బిసుదర్శన్ రెడ్డి తెలంగాణకు చెందిన ప్రముఖ న్యాయమూర్తి. సుప్రీం కోర్టు జడ్జిగా, గోవా లోకాయుక్తగా పనిచేసిన ఆయన, ముక్కుసూటి తీర్పులతో పేరు పొందారు. గోవా మొదటి లోకాయుక్తగా నియమితులైన సుదర్శన్, మొదటి విచారణలోనే అప్పటి ముఖ్యమంత్రి మనోహర్ పారీకర్ను ప్రశ్నించి సంచలనం సృష్టించారు. రాజకీయ పార్టీలతో సంబంధం లేని నిష్పాక్షిక వ్యక్తిగా గుర్తింపు పొందిన ఆయన, తెలంగాణలో బీసీ కులగణన కమిటీకి నేతృత్వం వహిస్తున్నారు. ఆయన న్యాయమూర్తి నేపథ్యం, నిష్పాక్షికత ఈ ఎన్నికల్లో ఇండియా కూటమికి కొంత బలాన్ని ఇస్తోంది.
తెలుగు–తమిళ ఓట్ల మార్పిడి
ఈ ఎన్నికల్లో తెలుగు రాష్ట్రాల ఎంపీలు తమిళ అభ్యర్థికి, తమిళనాడు ఎంపీలు తెలుగు అభ్యర్థికి మద్దతు ఇవ్వడం రాజకీయ వ్యూహాలకు సంబంధించిన లెక్కలే కాక, ప్రాంతీయ రాజకీయ డైనమిక్స్ను కూడా ప్రతిబింబిస్తుంది. తెలుగు రాష్ట్రాల్లో ఎన్డీఏ బలం ఎక్కువగా ఉండటం, వైఎస్సార్సీపీ మద్దతు అవకాశం ఉండటంతో పీసీ.రాధాకృష్ణన్కు ఈ ప్రాంతం నుంచి గణనీయమైన ఓట్లు రానున్నాయి. ఇక తమిళనాడులో డీఎంకే నేతృత్వంలోని ఇండియా కూటమి ఆధిపత్యం కారణంగా సుదర్శన్ రెడ్డికి బలమైన మద్దతు లభించనుంది.
Also Read: అంత భద్రత ఉన్నా.. ఢిల్లీ ముఖ్యమంత్రిపై దాడి ఎలా జరిగింది?
ఎన్డీఏ, ఇండియా కూటమి మధ్య ఓట్ల లెక్కలు ఈ ఎన్నికల ఫలితాన్ని నిర్ణయిస్తాయి. ఎన్డీఏకు లోక్సభ, రాజ్యసభలో సంఖ్యాబలం ఎక్కువగా ఉండటం వల్ల పీసీ రాధాకృష్ణన్కు అవకాశాలు ఎక్కువగా కనిపిస్తున్నాయి. అయితే, ఇండియా కూటమి సుదర్శన్రెడ్డి వంటి నిష్పాక్షిక, గౌరవనీయ వ్యక్తిని ఎంచుకోవడం ద్వారా కొంతమంది ఎన్డీఏ సభ్యులను ఆకర్షించే అవకాశం ఉంది.
