Scam
Scam : ఇటీవల కాలంలో సైబర్ మోసాలు భారీగా పెరిగిపోయాయి. మోసగాళ్లు మోసాలు చేయడానికి కొత్త కొత్త టెక్నిక్స్ వాడుతున్నారు. అలా సైబర్ మోసగాళ్ల మోసానికి ఓ మహిళ బలైంది. AI , నకిలీ వీడియోలను ఉపయోగించి ఒక ఫ్రెంచ్ మహిళ మోసపోయింది. ఆ మహిళ హాలీవుడ్ నటుడు బ్రాడ్ పిట్ (బ్రాడ్ పిట్ AI స్కామ్) తో మాట్లాడుతున్నట్లు భావించింది. కానీ నిజం ఏమిటంటే ఆమె ఒక మోసగాడి ఉచ్చులో పడిపోయింది. ఈ స్కామ్‌లో ఆ మహిళ 8 లక్షల 30 వేల యూరోలు పోగొట్టుకున్నట్లు చెబుతున్నారు. భారత రూపాయలలో ఇది దాదాపు రూ. 7.36 కోట్లు. తన బ్యాంకు ఖాతాను ఖాళీ చేయడమే కాకుండా భర్తకు విడాకులు ఇవ్వాలని ఒత్తిడి చేసిన ఆన్‌లైన్ స్కామ్‌కు ఒక ఫ్రెంచ్ మహిళ బలైంది. అన్నీ అనే పేరున్న ఒక మహిళ ఫ్రెంచ్ న్యూస్ ఛానల్ TF1 “సెవెన్ టూ ఎయిట్” కార్యక్రమంలో పాల్గొని నెలల తరబడి తాను బ్రాడ్ పిట్ స్నేహితురాలిగా ఉంటున్నట్లు చెప్పింది. ఆ తర్వాత తాను మోసపోయానని గ్రహించినట్లు వెల్లడించింది.
నిజానికి స్కామర్లు స్త్రీని మోసం చేయడానికి ఒక కొత్త పద్ధతిని అనుసరించారు. హాలీవుడ్ స్టార్ బ్రాడ్ పిట్ పేరుతో నకిలీ సోషల్ మీడియా, వాట్సాప్ ఖాతాను సృష్టించి ఆ మహిళతో చాటింగ్ ప్రారంభించాడు. స్కామర్లు, AI ని ఉపయోగించి పిట్ సెల్ఫీని పంపారు. ఇది ఆ మహిళ నమ్మకాన్ని మరింత బలపరిచింది. బ్రాడ్ ఫిట్ నే నాతో మాట్లాడుతున్నాడని భావించింది.
ఆ మహిళ నుంచి డబ్బు ఎలా తీసుకున్నారు?
పిట్ తన మాజీ భార్య ఏంజెలీనా జోలీ నుండి విడాకులు తీసుకున్న కారణంగా అతని బ్యాంకు ఖాతాను స్తంభింపజేసినట్లు స్కామర్లు ఆ మహిళకు చెప్పారు. ఆ సమయంలో పిట్ తన భార్యతో విడాకుల కేసు నడుస్తోంది. అన్నీ ఈ ఉచ్చులో పడి బ్రాడ్ పిట్‌తో సంబంధం పెట్టుకోవడానికి తన భర్తకు విడాకులు ఇస్తానని చెప్పి 830,000 యూరోలు మోసగాళ్లకు బదిలీ చేసింది. మానసిక అనారోగ్యంతో బాధపడుతున్న అన్నీ, తాను పిట్‌తో మాట్లాడుతున్నానని దాదాపు ఒకటిన్నర సంవత్సరం పాటు నమ్ముతూనే ఉంది. కానీ పిట్ తన నిజ జీవిత స్నేహితురాలు ఇనెస్ డి రామన్‌తో ఉన్న సంబంధం గురించి వార్తలు వెలువడినప్పుడు ఆమె నిజం గ్రహించింది.
ఇంటర్వ్యూ తర్వాత ప్రజల స్పందన
TF1 ఛానెల్‌లో ప్రసారమైన ఈ ఇంటర్వ్యూ తర్వాత అన్నీ అనేక రకాల కామెంట్లను ఎదుర్కొంటుంది. చాలా మంది ఆమెను ఎగతాళి చేస్తున్నారు. అయితే చాలా మంది TF1 ఛానల్ షోను ఖండిస్తున్నారు. బాధితుల గోప్యతను ఛానెల్ పట్టించుకోలేదని అవంటున్నారు. “ఈ ఆదివారం ప్రసారం అయిన ఇంటర్వ్యూ ఫలితంగా అన్నె పై వేధింపులు మొదలయ్యాయి” అని TF1 హోస్ట్ హ్యారీ రోజెల్‌మాక్ మంగళవారం తన x ఖాతాలో రాశారు. అన్నీని రక్షించడానికి దానిని మా ప్లాట్‌ఫామ్ నుండి ఉపసంహరించుకోవాలని నిర్ణయించుకున్నట్లు తెలిపారు.
ఆందోళనలను రేకెత్తిస్తున్న స్కామ్‌లలో AI వాడకం
స్కామర్లు AI ని ఉపయోగించడం అందరిలోనూ ఆందోళనను పెంచింది. ఒకవైపు, AI టెక్నాలజీ మన దైనందిన జీవితాలను సులభతరం చేస్తోంది, మరోవైపు, దాని దుర్వినియోగం మన సమస్యలను పెంచింది.
