KTR – Formula E Case : హైదరాబాద్ ఫార్ములా ఈ-రేస్ కేసులో మాజీ మంత్రి కేటీఆర్ను ఇప్పటికే ఏసీబీ ప్రశ్నించిన సంగతి తెలిసిందే. మళ్లీ ఇప్పుడు ఎన్ఫోర్స్మెంట్ డైరెక్టరేట్ కూడా ఆయనను ప్రశ్నించడానికి సిద్ధంగా ఉంది. కేటీఆర్ ఉదయం 10.30 గంటలకు ఈడీ ఆఫీసుకు వెళ్లనున్నారు. ఫెమా నిబంధనలను ఉల్లంఘించి కేటీఆర్ రూ. 55 కోట్లు విదేశాలకు బదిలీ చేశారని ఆయన అభియోగం ఉంది. ఈ కేసులో ఫెమా ఉల్లంఘనతో పాటు, కేటీఆర్పై మనీలాండరింగ్ కేసు కూడా ఉంది. ఈ కేసులో కేటీఆర్ నే ఏ-1. ఈ కేసులో సీనియర్ ఐఏఎస్ అరవింద్ కుమార్, బీఎన్ఎల్ రెడ్డి ఇప్పటికే ఈడీకి తమ తమ వాంగ్మూలాలు ఇచ్చారు. వాటి ఆధారంగా ఈడీ నేడు కేటీఆర్ను ప్రశ్నించనుంది. తాము నిర్దోషులమని, కేటీఆర్ బలవంతం చేయడం వల్లే అలా చేశామని ఇద్దరు అధికారులు ఈడీ ఎదుట వాపోయారు. నేడు ఈడీ ఎదుట కేటీఆర్ ఏం చెబుతారో చూడాలి. కేబినెట్కు తెలియజేయకుండా కేటీఆర్ స్వయంగా నిర్ణయం తీసుకుని విదేశీ కంపెనీకి రూ. 55 కోట్లు చెల్లించారని, తద్వారా నిధుల దుర్వినియోగానికి పాల్పడ్డారని ఆయనపై ఉన్న అభియోగం. దీంతో ఇవాళ జరిగే పరిణామాలపై ప్రతి ఒక్కరి లోనూ ఆసక్తి నెలకొంది. ఈడీ విచారణ అనంతరం అరెస్ట్ చేసే అవకాశం ఉన్నట్లు తెలుస్తోంది.
ఈ సందర్భంలో మాజీ మంత్రి కేటీఆర్ సొంత నిర్ణయాలు తీసుకోవడం, రహస్య డీల్స్ కుదుర్చుకోవడం ఆయనకు సమస్యగా మారుతోంది. . క్యాబినెట్ అనుమతి లేకుండా నిర్ణయాలు తీసుకున్నందున అతను ఇబ్బందుల్లో పడ్డారు. ఈ విషయాన్ని ఆయన స్వయంగా అంగీకరించారు. కానీ ఇందులో అవినీతి లేదని, హైదరాబాద్ ఖ్యాతిని పెంచడానికే తాను ఇదంతా చేశానని ఆయన అంటున్నారు. ఆయన చేసినదంతా కేబినెట్ ఆమోదంతో జరిగి ఉంటే, ఇది జరిగేది కాదని విశ్లేషకులు అంటున్నారు. రిజర్వ్ బ్యాంక్ నిబంధనలను ఉల్లంఘించి విదేశీ కంపెనీకి డాలర్లలో చెల్లింపు చేయాలనే కేటీఆర్ నిర్ణయం FEMA నిబంధనల ఉల్లంఘన అని ఈడీ చెబుతోంది. ఏ ప్రభుత్వం అధికారంలో ఉన్నా, తీసుకున్న నిర్ణయాలు చట్టం ప్రకారం తీసుకోవాలి. ప్రతిదానికీ లెక్క చెప్పాలి. ఈ విషయంలో ఆయన సొంత నిర్ణయాలు తీసుకుంటే, అది చట్ట విరుద్ధం అవుతుంది. ఈ అంశం నేటి ఈడీ దర్యాప్తులో కీలకం కానుంది.
ఫార్ములా-ఇ కార్ల రేసులో తనపై ఏసీబీ నమోదు చేసిన ఎఫ్ఐఆర్ను రద్దు చేయాలని కోరుతూ కేటీఆర్ సుప్రీంకోర్టులో పిటిషన్ దాఖలు చేశారు. ఈ విషయాన్ని జనవరి 15, 2025న విచారణకు స్వీకరించిన సుప్రీంకోర్టు ఆ పిటిషన్ను కొట్టివేసింది. హైకోర్టు ఆదేశాలపై జోక్యం చేసుకోలేమని స్పష్టం చేసింది. అంతేకాకుండా, ఈ కేసును పూర్తిగా దర్యాప్తు చేయాలని సుప్రీంకోర్టు అభిప్రాయపడింది. దీనితో కేటీఆర్ ఈ కేసులో విచారణను ఎదుర్కొంటారు. ఇంతలో కేటీఆర్ ఇప్పటికే తెలంగాణ హైకోర్టులో నిరాశను ఎదుర్కొన్నారు. కేటీఆర్ దాఖలు చేసిన క్వాష్ పిటిషన్ను కొట్టివేస్తూ జనవరి 7న ఉత్తర్వులు జారీ అయ్యాయి. దీన్ని సవాలు చేస్తూ కేటీఆర్ సుప్రీంకోర్టులో పిటిషన్ దాఖలు చేశారు. ప్రస్తుతం కేటీఆర్ తనకు అన్ని మార్గాలు మూసుకుపోయినందున విచారణకు హాజరు కాక తప్పని పరిస్థితిలో ఉన్నారు. ఏసీబీ ఇప్పటికే ఆయనను 7 గంటల పాటు విచారించింది.
