తమిళనాడు అసెంబ్లీ ఎన్నికల్లో పోటీచేసిన కమల్ హాసన్ కు, ఆయన పార్టీ అభ్యర్థులకు చుక్కెదురైంది. అంత పెద్ద స్టార్ అయ్యిండి.. క్రేజ్ ఉండి కూడా కమల్ హాసన్ కోయంబత్తూర్ దక్షిణ నియోజకవర్గంలో గెలవలేకపోయారు. బీజేపీ అభ్యర్థి చేతిలో ఓడిపోయారు. దీంతో ఇక రాజకీయాలపై కమల్ హాసన్ మనసు మార్చుకున్నట్టు తెలుస్తోంది.
రాజకీయాల కోసమే సినిమాలకు దూరమైన కమల్ హాసన్ ఇప్పుడు తిరిగి దీన్ని రీస్ట్రాట్ చేయడానికి సిద్ధమయ్యారు. ఆగిపోయిన ఇండియన్ -2 సినిమాను పూర్తి చేసే పనిలో పడ్డారు. ఈ సినిమా విషయంలో దర్శకుడు శంకర్, లైకా ప్రొడక్షన్స్ అధిపతులు గొడవ పడ్డారన్న విషయం అందరికీ తెలిసిందే. ఈ చిత్రాన్ని త్వరగా తిరిగి ప్రారంభించమని శంకర్ కోరినప్పుడు వారు స్పందించలేదు. తరువాత శంకర్ – రామ్ చరణ్ తో కొత్త చిత్రాన్ని ప్రకటించినప్పుడు నిర్మాతలు కోర్టులో కేసు వేసి తమ చిత్రాన్ని ముందు ముగించాలని డిమాండ్ చేశారు..
మరోవైపు హీరో కమల్ హాసన్ రాజకీయాలతో ‘ఇండియన్2’ సినిమాను పక్కనపెట్టాడు. ఇండియన్ -2 తిరిగి ప్రారంభించకపోవడానికి కమల్ హాసన్ నే అసలు కారణం. ఈ సినిమా షూటింగ్ లో క్రేన్ ప్రమాదం తరువాత అతను నిర్మాతలతో పెద్ద వాగ్వాదానికి దిగాడు. ఈ చిత్రం మళ్లీ ప్రారంభించకపోవడానికి అతడి రాజకీయ కట్టుబాట్లు కూడా కారణం. అతను ఇండియన్ -2 ను క్లియర్ చేయకుండా బిగ్ బాస్ షో చేయడం ప్రారంభించాడని, విక్రమ్ అనే మరో చిత్రాన్ని కూడా ప్రారంభించాడని తెలిసింది.
అయితే, ఇటీవల జరిగిన తమిళనాడు అసెంబ్లీ ఎన్నికల్లో కమల్ హాసన్ పార్టీకి ఒక్క సీటు కూడా రాలేదు. ఇప్పుడు కమల్ తన రాజకీయ గమ్యం గురించి అయోమయంలో ఉన్నారు. ప్రస్తుతానికి ఆయనకు రాజకీయాలతో సంబంధం లేదు. దీంతో కమల్ మళ్లీ అభిమానుల కోరిక మేరకు సినిమాల్లో బిజీగా ఉండాలని నిర్ణయించుకున్నాడు.
ఈ నేపథ్యంలో ‘ఇండియన్ -2’ వివాదాన్ని పరిష్కరించడానికి.. సినిమాను పున ప్రారంభించడానికి కమల్ చొరవ తీసుకున్నారు. కోలీవుడ్ మీడియాలో వచ్చిన కథనాల ప్రకారం, ఇండియన్ -2 ను వీలైనంత త్వరగా తిరిగి లాంచ్ చేయాలని కమల్ హాసన్ ప్రత్యేకంగా శంకర్‌ను అభ్యర్థించారు. ఇప్పుడు కమల్ ఏకకాలంలో ఇండియన్ -2, విక్రమ్ షూటింగులలో పాల్గొంటాడు. ఘోర ఓటములతో ఇక రాజకీయాలకు స్వస్తి చెప్పి సినిమాలపైనే కమల్ హాసన్ దృష్టి పెట్టనున్నాడు.