చంద్రబాబును వాతలు పెట్టుకున్న వారంతా ఇప్పుడు కుక్కిన పేనులా పడి ఉంటున్నారు. ఎందుకంటే అధికారం మారింది. జగన్ భీకరంగా ఉన్నాడు. అందుకే నాడు టీడీపీలో కీలకంగా వ్యవహరించిన సుజనాచౌదరి, సీఎం రమేశ్, సహా చాలా మంది కేసులు, ఆర్థిక దాడుల నేపథ్యంలో సైలెంట్ అయ్యారు. అయితే అందరికంటే ముందుగా ఇబ్బందుల్లో పడే నేతగా సుజనా చౌదరి పేరు వినిపిస్తోంది. ఇప్పుడు ఆయన పదవీకాలం ముగుస్తుండడంతో తెగ టెన్షన్ పడిపోతున్నాడట..
2019 ఎన్నికల తరువాత బిజెపిలో చేరిన టిడిపి రాజ్యసభ ఎంపీలు ఇప్పుడు చాలా ఆందోళన చెందుతున్నారట.. వారి పదవీకాలం మరో సంవత్సరంలో ముగుస్తుంది. వారికి మళ్ళీ రాజ్యసభకు తిరిగి ఎన్నికయ్యే మార్గమే లేదు. ఎందుకంటే ఏపీలో టీడీపీ ఘోరంగా ఓడిపోయింది. వైసీపీ అత్యధిక సీట్లతో గెలిచింది. దీంతో తిరిగి వారిని రాజ్యసభకు పంపించడానికి అవసరమైన ఎమ్మెల్యేలు, బలం టిడిపికి లేవు. ఏపీలో బీజేపీకి కూడా ఒక్క ఎమ్మెల్యే, ఎంపీ సీటు లేదు. పీవీఎన్ మాధవ్ నాడు టీడీపీ ప్రభుత్వం నియమించిన ఒక ఎమ్మెల్సీ మాత్రమే ఇప్పటికీ బీజేపీ కలిగి ఉంది. కాబట్టి ఇది సుజన చౌదరి లేదా టిజి వెంకటేష్ ను రాజ్యసభకు మళ్లీ పంపే మార్గాలే లేవు.
సుజనా చౌదరి పరిస్థితి మరింత సమస్యాత్మకంగా మారింది. ఎందుకంటే ఆయనపై బ్యాంకులని మోసగించిన కేసులున్నాయి. బ్యాంకు రుణాల ఎగవేతలో సుజనా చౌదరి చాలా తీవ్రమైన ఆర్థిక కేసులను ఎదుర్కొంటున్నారు. ఫండ్ డైవర్షన్ కోసం షెల్ కంపెనీలను సృష్టించాడని కూడా ఆయనపై ఆరోపణలు ఉన్నాయి. అతనిపై బ్యాంక్ ఆఫ్ ఇండియా కూడా లుకౌట్ నోటీసు జారీ చేసింది. బీజేపీలో చేరాక చాలా ప్రయత్నాల తర్వాతే సుజనా చౌదరి తన కంపెనీల వేలం.. ఇతర ఆస్తులను నిలిపివేయగలిగాడు.
సుజనా చౌదరి బీజేపీ ఎంపీగా ఉండటం వల్ల ఇన్నాళ్లు ఈ సంక్షోభాన్ని అధిగమించడంలో సహాయపడింది. కానీ ఆయన పదవీకాలం ముగిసిన తర్వాత బిజెపి నిజంగా అతడికి సహాయం చేయకపోవచ్చు. బిజెపిలో ఉన్నప్పటికీ సుజనా చౌదరి టీడీపీకి పనిచేస్తున్నారని బీజేపీలో ఓ టాక్ ఉందట.. ముఖ్యంగా రాష్ట్ర మాజీ ఎన్నికల కమిషనర్ ఎన్ రమేష్ కుమార్ విషయంలో సుజనా చౌదరి టిడిపికి అనుకూలంగా చురుకుగా సహాయం చేస్తున్నారని బిజెపి కలత చెందింది. రమేష్‌కుమార్‌ను రహస్యంగా హోటళ్లలో సుజనా కలుసుకున్నాడు. రమేష్ కుమార్ కేసుపై పోరాడటానికి న్యాయవాదులను ఏర్పాటు చేశాడు.
ఇప్పుడు సుజనా చౌదరి పదవీకాలం చివరి దశలో ఉన్నందున మరోసారి రాజ్యసభలోకి ప్రవేశించే మార్గం లేదు. ఇది అతని చుట్టూ ఉన్న రక్షణ కవచాన్ని కూడా తొలగిస్తుంది. టిజి వెంకటేష్ కూడా అనిశ్చితి అయిన భవిష్యత్తును ఎదుర్కొంటున్నాడు.
ఆసక్తికరమైన విషయం ఏమిటంటే, సిఎం రమేష్.. కనకమెడల బీజేపీలో ఉన్నా కూడా వీరిద్దరి పదవీకాలం 2024లో ముగుస్తుంది. అప్పటికీ సార్వత్రిక ఎన్నికలు జరిగి బీజేపీ అధికారంలో ఉంటుందో ఉండదో తేలుతుంది కాబట్టి వారిద్దరూ సేఫ్ జోన్ లో ఉన్నట్టే.
