IIT JEE Failure: కొడుకు నీట్ ర్యాంకు కొట్టాలి. కుమార్తె జేఈఈ మెయిన్స్ లో సత్తా చూపించాలి. వాళ్ళు ఎలా కష్టపడినా పర్వాలేదు.. ఇలాంటి ఇబ్బందులు ఎదుర్కొన్న పర్వాలేదు.. అవసరమైతే 24 గంటల పాటు చదవాలి. మార్కులు నూటికి నూరు శాతం రావాలి. మెజారిటీ తల్లిదండ్రుల అభిప్రాయం మొత్తం ఇలానే ఉంటుంది. అభిప్రాయం మాత్రమే కాదు పిల్లల మీద పెంచే ఒత్తిడి ఒక రేంజ్ లో ఉంటుంది. పదిమందిలో చెప్పుకోవడానికి.. తమకంటూ స్టేటస్ మైంటైన్ చేయడానికి.. ఇలా పేరెంట్స్ పిల్లల మీద అకారణమైన ఒత్తిడి తీసుకొస్తూ ఉంటారు. ఈ ఒత్తిడి పిల్లలను చాలా ఇబ్బందికి గురి చేస్తూ ఉంటుంది. కొన్ని సందర్భాలలో పిల్లలు ఆ ఒత్తిడి తట్టుకోలేక.. తల్లిదండ్రుల అంచనాలు నిజం చేయలేక దారుణమైన నిర్ణయాలకు పాల్పడుతుంటారు.
మనదేశంలో ప్రతి ఏడాది ప్రవేశ పరీక్షలు జరుగుతూనే ఉంటాయి. జాతీయస్థాయిలో నిర్వహించే ప్రవేశ పరీక్షల్లో విద్యార్థులు విపరీతంగా పోటీ పడుతూ ఉంటారు. జాతీయస్థాయి విద్యాసంస్థలు.. వైద్య కళాశాలలో ప్రవేశాలు పొందడం అంత సులభం కాదు. అందువల్లే పోటీ అధికంగా ఉంటుంది. ఆ పోటీని తట్టుకోవాలంటే విద్యార్థులు తీవ్రంగా కష్టపడాల్సి ఉంటుంది. అయితే అను సందర్భాల్లో పడిన కష్టానికి ప్రతిఫలం లభించదు. కొన్ని సందర్భాలలోనే అనుకున్నది సాధించడానికి అవకాశం ఉంటుంది. ఎంత కష్టపడినప్పటికీ అనుకున్న స్థాయిలో మార్కులు రాకపోతే విద్యార్థులు డీలా పడిపోతుంటారు. కోరుకున్న ర్యాంకు రాక ఇబ్బంది పడతారు .. అలాంటప్పుడు కూడా పిల్లల మీద ఒత్తిడి తీసుకొస్తుంటారు. అన్ని డబ్బులు పోసి చదివించాం.. నీకు ర్యాంకు రాకపోతే ఎలా అంటూ మరింత ఇబ్బంది పెడుతుంటారు. అటువంటి తల్లిదండ్రులు ఇదిగో ఇలా మారిపోవాలి.. ఇలా మారితే పిల్లలు ఎంతటి ఫలితాలు సాధిస్తారో తర్వాత గాని అర్థం కాదు.
ఉత్తరప్రదేశ్ రాష్ట్రంలోని మీరట్ నగరానికి చెందిన సంకేత్ 2021లో జేఈఈ మెయిన్స్ రాసాడు. అప్పుడు రెండు మార్కుల తేడాతో సీట్ కోల్పోయాడు. దీంతో అతడు కుంగిపోలేదు. తల్లిదండ్రులు కూడా అతడి మీద ఒత్తిడి తీసుకురాలేదు. 2022 నుంచి యూట్యూబ్లో పాఠాలు వినడం మొదలుపెట్టాడు. అతడి కష్టం వృధాగా పోలేదు. అంతేకాదు అతడు ఐ సి టి కేరళలో సీట్ సాధించాడు. అందులో అకౌస్టిక్, వైబ్రేషన్ కోర్సులను తీసుకున్నాడు. అందులో అత్యుత్తమ మార్కులు సాధించాడు. ఫలితంగా ఇస్రో సైంటిస్ట్ గా ఇప్పుడు ఉద్యోగం సాధించాడు.. సంకేత్ మొదట్లో జేఈఈ మెయిన్స్ రాసినప్పుడు రెండు మార్కుల తేడాతో సీట్ కోల్పోయినప్పుడు తల్లిదండ్రులు పెద్దగా అతనిని ఇబ్బంది పెట్టలేదు. ఒత్తిడి తీసుకురాలేదు. మరోసారి ప్రయత్నించు అని కూడా చెప్పలేదు. నీకు నచ్చితే చదువు.. లేకుంటే మానేయి అన్నారు. ఇబ్బందిగా ఉంటే చదువు పక్కన పెట్టి వేరే నీకు నచ్చిన రంగంలో దూసుకుపో అన్నారు. తల్లిదండ్రులు ఆ స్థాయిలో స్వేచ్ఛ ఇవ్వడంతో అతడు యూట్యూబ్ లోనే పాఠాలు విన్నాడు. ఇప్పుడు ఏకంగా ఇస్రో సైంటిస్టు అయ్యాడు.
