Delhi Pollution:‘ఎవరైనా ఊపిరి పీల్చుకో అంటారు.. కానీ ఈ నగరంలో ఊపిరి పీల్చితే పోయేలా పరిస్థితులు దాపురించాయి. హర్యానా, పంజాబ్ లలో గోధుమ, వరి పంటలను కాల్చివేతతో కమ్ముకొచ్చిన పొగ ఢిల్లీకి శాపంగా మారింది. ఊపిరి కూడా తీసుకోలేనంత కలుషితమైంది. ఢిల్లీలో పెరిగిపోయిన వాహనాల వల్ల కాలుష్యం కూడా ఇప్పుడు ఢిల్లీ ప్రజలకు ప్రాణసంకటంగా మారింది. వాహనాలపై కుడి ఎడమ అంటూ ఎంత నిబంధనలు పెట్టినా.. చలికాలం వచ్చిందంటే శ్వాస అందక ఉక్కిరిబిక్కిరి అవుతున్న పరిస్థితులు దాపురించాయి.. ఢిల్లీలో కాలుష్యం ప్రమాదకర స్థాయికి చేరింది. భయంకర పరిస్థితులు నెలకొన్నాయి. తర్వాత ఏం జరుగుతుందోనన్న భయం ఢిల్లీ వాసులను వెంటాడుతోంది..
శీతాకాలం రాకముందే దేశ రాజధాని ఢిల్లీలో వాయుకాలుష్యం భయపెడుతోంది. గత నాలుగైదు రోజులుగా గాలి నాణ్యత సూచీ దారుణంగా దిగజారుతోంది. దీపావళి పండుగకు వారం రోజుల ముందే ఢిల్లీలో గాలి నాణ్యత మరీ దారుణంగా మారింది. గాలి నాణ్యత సూచిక (AQI) స్థాయి ‘చాలా పేలవమైన’ కేటగిరీకి చేరుకుంది. మునుపటి రోజు అంటే సోమవారం (అక్టోబర్ 21), ఢిల్లీలో 24 గంటల సగటు AQI 310 వద్ద నమోదైంది, ఇది ఆదివారం (అక్టోబర్ 20) 277 AQI కంటే ఎక్కువ నమోదైంది. సెంట్రల్ పొల్యూషన్ కంట్రోల్ బోర్డ్ (CPCB) ఎయిర్ క్వాలిటీ బులెటిన్లో పరిస్థితి రికార్డ్ అయింది. రాజధానిలో కాలుష్యాన్ని పర్యవేక్షించే కమిషన్ ఫర్ ఎయిర్ క్వాలిటీ మేనేజ్మెంట్ (CAQM) అధికారులు రెండవ దశ గ్రేడెడ్ రెస్పాన్స్ యాక్షన్ ప్లాన్(GRAP)ను అమలు చేయమని కోరారు. ప్రస్తుతం ఢిల్లీలో కాలుష్యం పెరగడానికి ప్రతికూల వాతావరణం, అధిక స్థానిక ఉద్గారాలు, బాణాసంచా అక్రమ వినియోగం వంటి అనేక కారణాలు ఉన్నాయి. దీని కారణంగా గాలిలో పొగమంచు ఏర్పడింది. ఇది చాలా రోజులు కొనసాగుతుంది. ఢిల్లీలోని గాలి నాణ్యత రోజు రోజుకు దిగజారిపోతుందని నిపుణులు చెబుతున్నారు. దీని కారణంగా పరిస్థితి మరింత దిగజారవచ్చని ఆందోళన వ్యక్తం చేస్తున్నారు.
ఎయిర్ క్వాలిటీ-అట్మాస్ఫియరిక్ అసెస్మెంట్ రీసెర్చ్ (SAFAR) డేటా ప్రకారం.. ఈ రోజు ఉదయం 7 గంటలకు గాలి నాణ్యత 349గా నమోదైంది. ఇది చాలా తీవ్రమైన కేటగిరీగా పరిగణించబడుతుంది. 0-50 మధ్య గాలి నాణ్యత సంతృప్తికరంగా ఉంది, 51 – 100 మధ్య అది స్వచ్ఛమైనదిగా ఉంటుంది, 101 – 200 మధ్య మధ్యస్థంగా ఉంటుంది, 201 – 300 మధ్య అది ప్రమాదకరం, 400 మరియు 450 మధ్య ఇది చాలా ప్రమాదకరంగా విభజించింది.
GRAP రెండవ దశ ఏమిటి?
* డీజిల్ జనరేటర్లపై నిషేధం: ఉద్గార తగ్గింపు కారణంగా డీజిల్ జనరేటర్ల వినియోగాన్ని నిషేధిస్తుంది.
* పార్కింగ్ ఛార్జీల పెంపు: ప్రైవేట్ రవాణా వినియోగాన్ని నిరుత్సాహపరిచేందుకు పార్కింగ్ చార్జీలను రెట్టింపు చేస్తున్నారు. సాధారణ స్లాబ్ కింద, నాలుగు చక్రాల వాహనాలకు గంటకు రూ.20, ద్విచక్ర వాహనాలకు రూ.10 వసూలు చేస్తున్నారు. ఇది ఇప్పుడు రెండింతలకు పెంచనున్నారు.
* పెరగనున్న ప్రజా రవాణా : ఢిల్లీ మెట్రో తన రూట్లలో 40 అదనపు ట్రిప్పులను నడపాలని నిర్ణయించింది. మూడవ దశ కాలుష్యం అమలులోకి వస్తే మరో 20 ట్రిప్పులు జోడించబడతాయి.
ఆరోగ్యంపై వాయు కాలుష్యం ప్రభావాలు
ఢిల్లీ గాలిలో ఉండే ధూళి కణాలు ఊపిరితిత్తులకు చాలా హాని కలిగిస్తాయి. ఈ నలుసు పదార్థం (PM 2.5 – PM 10) ఊపిరితిత్తులలోకి లోతుగా చేరి ఆస్తమా, ఊపిరితిత్తుల క్యాన్సర్, గుండె జబ్బులు మొదలైన అనేక ఆరోగ్య సమస్యలను కలిగిస్తుంది. ముఖ్యంగా పిల్లలు, వృద్ధులు ఎక్కువ ప్రమాదంలో పడతారని నిపుణులు చెబుతున్నారు.
అక్టోబర్ 24 వరకు ఢిల్లీ గాలి విషపూరితమే!
వాతావరణ శాఖ ఎయిర్ క్వాలిటీ మేనేజ్మెంట్ కమిషన్ (CAQM) ప్రకారం, రాబోయే రోజుల్లో గాలి నాణ్యత మరింత దిగజారవచ్చు. అక్టోబరు 24 వరకు AQI ‘వెరీ పూర్’ కేటగిరీలోనే ఉంటుందని అంచనా. వాతావరణ పరిస్థితులలో పెద్దగా మెరుగుదల కనిపించడం లేదు. గాలుల కారణంగా కాలుష్య కారకాలు వాతావరణంలో కలిసిపోతాయి. శ్వాసకోశ వ్యాధులు ఉన్నవారు ఇంటి లోపలే ఉండాలని, మాస్క్లు ధరించాలని, వీలైనంత వరకు దుమ్ము ధూళికి దూరంగా ఉండాలని నిపుణులు సూచిస్తున్నారు.
ఢిల్లీలో గాలి నాణ్యత తీవ్రంగా క్షీణించి, దీని కారణంగా ప్రజల ఆరోగ్యంపై ప్రతికూల ప్రభావం పడుతోంది. GRAP కింద ప్రభుత్వం అనేక కఠినమైన చర్యలు తీసుకుంది. అయితే పౌరులు కూడా తగు జాగ్రత్తలు తీసుకోవాలి. కాలుష్యాన్ని త్వరగా నియంత్రించకపోతే ఆరోగ్య సమస్యలు మరింత పెరిగే అవకాశం ఉంది.
