విశాఖ ఎల్జీ సంఘటన తర్వాత వై ఎస్ జగన్ మోహన్ రెడ్డి ప్రభుత్వం అప్రమత్తమైంది. అందులో భాగంగా ప్రమాదం జరగటానికి ఆస్కారం ఉన్న పరిశ్రమలు రాష్ట్రంలో 86 ఉన్నాయని పరిశ్రమల శాఖ గుర్తించింది.
ఆయా పరిశ్రమల్లో భద్రతా ప్రమాణాలు అధికారులు స్వయంగా పరిశీలించిన తర్వాతే పునః ప్రారంభానికి అనుమతించాలని నిర్ణయించారు. ప్రమాదం జరగటానికి ఆస్కారం ఉన్న పరిశ్రమల జాబితాలో ఫార్మా, గ్యాస్, రసాయనాలు తయారు చేసే భారీ పరిశ్రమలను చేర్చింది.
మందు ఓపెన్.. గుడులు, పనులు బంద్ న్యాయమా?
జిల్లాల వారీగా ఆ పరిశ్రమల్లో యంత్రాలు, బాయిలర్లు, రసాయనాలు నిల్వ చేసే ట్యాంకుల వద్ద భద్రతా ప్రమాణాలు పరిశీలించి, రెండు రోజుల్లో నివేదిక పంపాలని పరిశ్రమల శాఖ ఆదేశించింది. కంపెనీ భద్రతా విభాగం అధికారులతో కలిసి పరిశ్రమల శాఖ, ఇన్స్పెక్టర్ ఆఫ్ ఫ్యాక్టరీస్, పోలీసుశాఖ తరఫున సభ్యులు వెళ్లి తనిఖీలు ప్రారంభించారు.
వీరు పరిశ్రమల యాజమాన్యం నుంచి భద్రతా ప్రమాణాలు పాటించినట్లు కచ్చితమైన హామీ పత్రాన్ని తీసుకోవాలి. భారీ పరిశ్రమల భద్రతా ప్రమాణాలు పరిశీలించాకే పునఃప్రారంభానికి అనుమతించాలని పరిశ్రమలశాఖ డైరెక్టర్ సుబ్రమణ్యం ఆదేశించారు. రెండు రోజుల్లో పరిశీలన పూర్తి చేయాలని జిల్లాల అధికారులకు సూచించారు.
కాగా, విశాఖపట్టణంలోని ఎల్జీ పాలిమర్స్ నుంచి లీకైన స్టెరిన్ గ్యాస్ను 60 శాతం పైగా న్యూట్రలైజ్ చేసినట్లు రాష్ట్ర పరిశ్రమల మంత్రి గౌతమ్ రెడ్డి తెలిపారు. రానున్న 48 గంటల్లో పూర్తి స్థాయిలో విషవాయువును నిర్వీర్యం చేస్తామని పేర్కొన్నారు.
