Whiskey from Urine: ఏంటి పైన హెడ్డింగ్ చూసి ఛీ అని అనుకుంటున్నారా.. వినడానికి వింతగా అనిపించినా ఇది నిజం. వ్యర్థాలను వనరులుగా మార్చడంలో మానవ మేధస్సు ఎంత క్రియేటివ్ గా ఆలోచిస్తుందో తెలియజేసే అద్భుత ప్రయోగం ఇది. యునైటెడ్ కింగ్డమ్కు చెందిన పరిశోధకుడు జేమ్స్ గిల్ఫిన్, డయాబెటీస్ ఉన్న వృద్ధుల మూత్రంలోని చక్కెరను ఉపయోగించి విస్కీని తయారుచేసే వినూత్న ప్రాజెక్టును ప్రారంభించారు. ప్రస్తుతం సొసైటీలో ఎన్నో పనికి రావు అనే వాటిల్లో కూడా ఎంత విలువైన వనరులు ఉంటాయో చూపించడమే ఈ ప్రాజెక్టు వెనుక ఉన్న ప్రధాన ఉద్దేశ్యం. వ్యర్థాల నిర్వహణ, పునర్వినియోగం ప్రాముఖ్యతపై ఇలా ఒక వినూత్న ప్రయోగాలతో అవగాహన కల్పిస్తున్నారు.
Also Read : నక్సలిజం దేశవ్యాప్త విస్తరణకు తెలుగు నేలే కారణం.. ఎవరెవరు కీలక భూమిక పోషించారంటే?
సాధారణంగా, మధుమేహం (డయాబెటీస్) ఉన్న వ్యక్తుల మూత్రంలో చక్కెర స్థాయిలు ఎక్కువగా ఉంటాయి. శరీరం చక్కెరను సరిగ్గా వినియోగించుకోలేకపోవడం వల్ల అది మూత్రం ద్వారా బయటకు వస్తుంది. జేమ్స్ గిల్ఫిన్ ఈ విషయాన్ని ఒక అవకాశంగా మార్చుకున్నారు. ఈ అధిక చక్కెర కంటెంట్ను ఉపయోగించుకుని పులియబెట్టే (fermentation) ప్రక్రియ ద్వారా ఆల్కహాల్ను ఉత్పత్తి చేయవచ్చని ఆయన కనుగొన్నారు.
ఈ ప్రాజెక్టు కేవలం విస్కీ తయారుచేయడం గురించే కాదు. వ్యర్థ పదార్థాలను కూడా విలువైన ఉత్పత్తులుగా మార్చగల సామర్థ్యాన్ని హైలైట్ చేయడం దీని ముఖ్య లక్ష్యం. వనరుల పునర్వినియోగం (resource recycling) ప్రాముఖ్యతపై దృష్టి సారించడమే పరిశోధకుడు జేమ్స్ గిల్ఫిన్ ఆలోచన. “సొసైటీ వేస్ట్ అని చూసే వాటిలో కూడా మనం ఊహించలేని విలువ దాగి ఉంటుంది” అనే సందేశాన్ని ఈ ప్రాజెక్టు ద్వారా బలంగా తెలియజేయాలనుకుంటున్నారు.
జేమ్స్ గిల్ఫిన్ ఒక పరిశోధకుడు మాత్రమే కాదు, కళాకారుడు కూడా. ఆయన ప్రాజెక్టులు సాధారణంగా సామాజిక, పర్యావరణ అంశాలను స్పృశిస్తాయి. ఈ ‘యూరిన్ విస్కీ’ ప్రాజెక్టు కూడా అదే కోవలోకి వస్తుంది. వ్యర్థాల నిర్వహణలో సరికొత్త ఆలోచనలు అవసరమని, పర్యావరణ సమస్యలను పరిష్కరించడానికి సంప్రదాయేతర విధానాలను అన్వేషించాలని ఆయన బలంగా నమ్ముతారు.
ఈ ప్రక్రియలో డయాబెటిక్ రోగుల మూత్రాన్ని సేకరించి అందులోని చక్కెరను వేరు చేసి శుద్ధి చేస్తారు. ఆ తర్వాత సాధారణ విస్కీ తయారీలో ఉపయోగించే పులియబెట్టే ప్రక్రియను (fermentation process) అనుసరిస్తారు. ఈ ప్రక్రియ ద్వారా ఉత్పత్తి అయిన ఆల్కహాల్ను డిస్టిల్ చేసి, విస్కీగా మారుస్తారు. ఇది ఒక ప్రయోగాత్మక ప్రాజెక్టు అయినప్పటికీ వ్యర్థాల నుండి శక్తి లేదా ఇతర విలువైన ఉత్పత్తులను సృష్టించే విస్తృత అవకాశాలకు ఇది ప్రాణం పోయనుంది. ఈ ప్రాజెక్టు వ్యర్థాలను చూసే విధానాన్ని మార్చడానికి , సుస్థిరమైన భవిష్యత్తు కోసం కొత్త పరిష్కారాలను కనుగొనడానికి ఉద్దేశించబడింది.
