Slow walking and Hearing loss link: సాధారణంగా ఎవరైనా నెమ్మదిగా నడుస్తుంటే దానికి వయసు పెరగడం.. మోకాళ్ల నొప్పులు.. కండరాల బలహీనత లేదా ఇతర శారీరక సమస్యలే కారణమని చాలామంది భావిస్తారు. అయితే తాజాగా వెలుగులోకి వచ్చిన ఒక పరిశోధన ఈ అభిప్రాయానికి కొత్త కోణాన్ని జోడించింది. వినికిడి శక్తి తగ్గిపోవడం కూడా ఒక వ్యక్తి నడక వేగాన్ని ప్రభావితం చేయగలదని శాస్త్రవేత్తలు గుర్తించారు. ఈ షాకింగ్ వివరాల్లోకి వెళితె..
అమెరికాలోని University of Michigan పరిశోధకులు ఒక ప్రముఖ టెక్నాలజీ సంస్థ సహకారంతో 57,000 మందికి పైగా ఐఫోన్ వినియోగదారుల ఆరోగ్య సంబంధిత డేటాను విశ్లేషించారు. ఇందులో పాల్గొన్న వారి వినికిడి సామర్థ్యం, నడక వేగం, శారీరక చురుకుదనం వంటి అంశాలను పరిశీలించారు. ఈ అధ్యయనం ద్వారా వినికిడి లోపం ఉన్న వ్యక్తులు సాధారణ వినికిడి కలిగిన వారికంటే గణనీయంగా నెమ్మదిగా నడుస్తున్నట్లు తేలింది.
వినికిడి అనేది కేవలం శబ్దాలను గుర్తించడానికే పరిమితం కాదు. మన శరీర సమతుల్యతను కాపాడడంలో కూడా చెవులలోని అంతర్గత వ్యవస్థ కీలక పాత్ర పోషిస్తుంది. చెవుల పనితీరు దెబ్బతింటే మెదడుకు వచ్చే సమాచారం తగ్గిపోతుంది. ఫలితంగా సమతుల్యత కోల్పోయే ప్రమాదం పెరుగుతుంది. దీంతో వ్యక్తులు జాగ్రత్తగా, నెమ్మదిగా నడవడం ప్రారంభిస్తారు.
పరిశోధకుల అభిప్రాయం ప్రకారం.. వినికిడి లోపం ఉన్నవారు చుట్టుపక్కల పరిస్థితులను అర్థం చేసుకోవడానికి మెదడును ఎక్కువగా ఉపయోగించాల్సి వస్తుంది. శబ్దాలను గుర్తించడం, సంభాషణలను అర్థం చేసుకోవడం వంటి పనులకే మెదడు అధిక శక్తిని ఖర్చు చేస్తుంది. దీంతో నడక వంటి ఇతర శారీరక కార్యకలాపాలపై దృష్టి కొంత తగ్గి, నడక వేగం మందగించవచ్చని వారు వివరించారు.
నడక వేగం తగ్గడం అనేది కేవలం ఒక చిన్న మార్పు మాత్రమే కాదు. ఇది భవిష్యత్తులో పడిపోవడం, ఎముకలు విరగడం, శారీరక చురుకుదనం తగ్గిపోవడం వంటి సమస్యలకు సంకేతంగా ఉండవచ్చని నిపుణులు చెబుతున్నారు. ముఖ్యంగా వృద్ధుల్లో ఈ ప్రమాదం మరింత ఎక్కువగా ఉంటుంది. అందుకే వినికిడి సమస్యలను నిర్లక్ష్యం చేయకూడదని సూచిస్తున్నారు.
వినికిడి సామర్థ్యం తగ్గుతున్నట్లు అనిపిస్తే వెంటనే పరీక్షలు చేయించుకోవడం మంచిది. అవసరమైతే హియరింగ్ ఎయిడ్స్ లేదా ఇతర వైద్య సలహాలను పాటించడం ద్వారా వినికిడి నాణ్యతను మెరుగుపరచుకోవచ్చు. ఇది కేవలం వినికిడిని మాత్రమే కాకుండా శారీరక చురుకుదనం, నడక వేగం మరియు జీవన నాణ్యతను కూడా మెరుగుపరచడంలో సహాయపడుతుంది.
వైద్య నిపుణుల అభిప్రాయం ప్రకారం.. నడక వేగం ఒక వ్యక్తి మొత్తం ఆరోగ్య స్థితిని సూచించే ముఖ్యమైన సూచికగా పరిగణించబడుతోంది. గుండె ఆరోగ్యం, కండరాల బలం, మెదడు పనితీరు, సమతుల్యత వంటి అంశాలపై ఇది ఆధారపడి ఉంటుంది. ఇప్పుడు తాజా అధ్యయనం వినికిడి ఆరోగ్యాన్ని కూడా ఈ జాబితాలో చేర్చింది.
