Vijay CM Oath Ceremony: గంట గంటకు ట్విస్టులు, గడిచిన ఆరు రోజుల నుండి తమిళనాడు రాజకీయాలు ఎంత ఉత్కంఠ భరితంగా సాగాయో అందరికీ తెలిసిందే. ఈ ఆరు రోజుల్లో జరిగిన సంఘటనలను ఆధారంగా చేసుకొని సినిమా తీస్తే బంపర్ హిట్ అవుతుంది అనడంలో ఎలాంటి అతిశయోక్తి లేదేమో. సినిమాల్లో కూడా సాధ్యపడని అరుదైన సంఘటనలు తమిళనాడులో చోటు చేసుకుంది. అయితే ఎట్టకేలకు విజయ్ సీఎం అయ్యేందుకు మార్గం మొత్తం క్లియర్ అయ్యింది. నిన్నటితో 116 ఎమ్మెల్యేల మద్దతుతో గవర్నర్ వద్దకు వెళ్లిన విజయ్ కి , మిగిలిన ఇద్దరు ఎమ్మెల్యేల లెటర్స్ చేరలేదని ప్రశ్నించగా, విజయ్ వద్ద సమాధానం రాలేదని , దాంతో ప్రభుత్వ ఏర్పాటుకి గవర్నర్ అనుమతిని ఇవ్వలేదని మీడియా లో ప్రచారం జరిగింది. అయితే నేడు VCK , IUML పార్టీలు టీవీకే పార్టీ ప్రభుత్వ ఏర్పాటుకి మద్దతు ఇవ్వడంతో, ఇన్ని రోజులు నడిచిన రాజకీయ హై డ్రామాకు తెరపడింది.
రేపు మధ్యాహ్నం 3 గంటలకు విజయ్ చెన్నై లోని నెహ్రు స్టేడియం లో గవర్నర్ సమక్షంలో తమిళనాడు రాష్ట్ర ముఖ్యమంత్రిగా ప్రమాణ స్వీకారం చేయబోతున్నాడు. ఈ కార్యక్రమానికి ఇండియా పార్టీ కూటమికి సంబంధించిన ముఖ్య నాయకులంతా హాజరు అవ్వబోతున్నారని టాక్. విజయ్ తో పాటుగా , ఆయన మంత్రివర్గం కూడా రేపే ప్రమాణస్వీకారం చేయబోతున్నారు. కాంగ్రెస్ పార్టీ కి రెండు మంత్రి పదవులు ఇవ్వగా, VCK పార్టీ లో ఒకరికి ఉప ముఖ్యమంత్రి పదవి ఇచ్చేందుకు విజయ్ గ్రీన్ సిగ్నల్ ఇచ్చాడని తెలుస్తోంది. కానీ సీపీఐ , సీపీఎం పార్టీలు మాత్రం ప్రభుత్వం లో భాగం అవ్వడం లేదని , కేవలం ప్రభుత్వ ఏర్పాటుకి మాత్రమే అనుమతి ఇచ్చిందని తెలుస్తోంది. నిన్న విజయ్ సీపీఎం పార్టీ ఆఫీస్ కి వెళ్లి , అక్కడి నాయకులకు కృతఙ్ఞతలు తెలియజేసిన సంగతి తెలిసిందే.
ఇదంతా పక్కన పెడితే రేపు ఉదయం విజయ్ సూపర్ స్టార్ రజినీకాంత్ ఇంటికి వెళ్లి, తన ప్రమాణ స్వీకార కార్యక్రమానికి హాజరు కావాల్సిందిగా ఆహ్వానించబోతున్నట్టు తెలుస్తోంది. ప్రస్తుతం ఈ వార్త సోషల్ మీడియా లో హాట్ టాపిక్ గా మారింది. చాలా కాలం నుండి విజయ్ , రజిని మధ్య కోల్డ్ వార్ నడుస్తుంది అనేది కోలీవుడ్ లో ప్రధానంగా వినిపిస్తున్న వార్త. అలాంటిది రజినీకాంత్ ని విజయ్ స్వయంగా తన ప్రమాణస్వీకారోత్సవానికి హాజరు కావాల్సిందిగా ఆహ్వానించబోతుండడం అందరినీ ఆశ్చర్యానికి గురి చేస్తున్న విషయం. మరి రజినీకాంత్ వస్తాడో లేదో చూడాలి. ఏది ఏమైనా కోట్లాది మంది అభిమానుల ఆకాంక్ష ని నెరవేరుస్తూ , రేపు విజయ్ ప్రమాణస్వీకారం చేయబోయే ఘట్టం, ఆయన అభిమానులకు జీవితాంతం గుర్తుండిపోతుంది అనడంలో ఎలాంటి సందేహం లేదు.
