మైదానాల్లో ఆట సాధారణ విషయమే. కానీ.. వెండి తెరపై మాత్రం అరుదు. స్పోర్ట్స్ బ్యాక్ డ్రాప్ లో ఎప్పుడో.. ఒకటీ అరా చిత్రాలు వచ్చిపోతుంటాయి. కానీ, ఇప్పుడు ఒక‌టీరెండు కాదు.. ఏకంగా అర‌డ‌జ‌నుకు పైగా చిత్రాలు క్రీడానేప‌థ్యంలో తెర‌కెక్కుతున్నాయి. ఈ నెల నుంచే ఆట మొదలు కాబోతోంది. స్పోర్ట్స్ కు ఫ్యామిలీ, ప్రేమ అంశాల‌ను జోడించి, వెండితెర‌పై ఆవిష్క‌రిస్తున్నారు. మరి, ఆ సినిమాలు ఏంటీ..? ఏయే ఆట‌ల‌తో రూపొందుతున్నాయి? ఎప్పుడు రాబోతున్నాయి? అనేది చూద్దాం.
Also Read: నో లవ్ స్టోరీ.. యంగ్ హీరో సంచలన నిర్ణయం
లక్ష్య : నాగశౌర్య హీరోగా తెరకెక్కుతోన్న చిత్రం ‘లక్ష్య’. సంతోష్‌ జాగర్లపూడి దర్శకత్వం వహిస్తున్నారు. కేతిక శర్మ హీరోయిన్‌గా నటిస్తోన్న ఈ చిత్రంలో.. ఒక కీలక పాత్రలో విలక్షణ నటుడు జగపతి బాబు నటిస్తున్నారు. ప్రాచీన విలువిద్య నేపథ్యంలో.. ఈ సినిమా రాబోతోంది. క్రీడా నేపథ్యానికి ఫ్యామిలీ డ్రామాను యాడ్ చేశారు. జగపతి బాబు ప్రత్యేక పాత్రలో నటిస్తున్నారు.
‘ఎ1 ఎక్స్‌ప్రెస్’ : సందీప్‌కిషన్ ఈ హీరో గా హాకీ బ్యాక్‌డ్రాప్‌లో తెరకెక్కిన తొలి తెలుగు చిత్రమిది. డైరెక్టర్ డెన్నిస్ జీవన్ రూపొందించారు. లావ‌ణ్య త్రిపాఠి హీరోయిన్ గా నటిస్తోంది. ఫ‌స్ట్ లుక్ తోనే ఆడియ‌న్స్ ను ఆక‌ర్షించిన ఈ మూవీ.. త్వ‌ర‌లో రిలీజ్ కు సిద్ధ‌మ‌వుతోంది. దేశంలో రాజ‌కీయాలు క్రీడాకారుల జీవితాల‌ను కూడా ఇబ్బందుల‌కు గురిచేస్తున్నాయ‌నేకాన్సెప్ట్ తో ఈ చిత్రం తెర‌కెక్కింది. ఈ చిత్రాన్ని సందీప్ కిష‌న్ స్వ‌యంగా నిర్మించాడు. హిప్హాప్ తమీజా సంగీతం అందించారు. తమిళ చిత్రం ‘నాప్టే తునై’ రీమేక్ అయిన‌ప్ప‌టికీ.. 50 శాతం మార్పులు చేశారు. ఈ ఒరిజినల్ ను సైత డెన్నిస్ జీవన్ తెర‌కెక్కించ‌డం విశేషం. మార్చి 5న ఈ చిత్రం ప్రేక్ష‌కుల ముందుకు రాబోతోంది.
గుడ్ ల‌క్ స‌ఖి : ‘మ‌హాన‌టి’ కీర్తి సురేష్ న‌టిస్తున్న లేరీ ఓరియంటెడ్ మూవీ ఇది. నష్ట జాతకురాలిగా ముద్రపడిన ఓ యువతి.. అన్ని అడ్డంకులను అధిగమించి రైఫిల్ షూటర్ గా ఎలా విజయం సాధించిందనే ఇతివృత్తంతో ఈ సినిమా తెరకెక్కుతోంది. నగేష్ కుకునూర్ దర్శకత్వం వహిస్తున్నారు. ప్రముఖ నిర్మాత దిల్ రాజు సమర్పణలో వర్త్ ఎ షాట్ మోషన్ ఆర్ట్స్ బ్యానర్ పై సుధీర్ చంద్ర పాడిరి నిర్మిస్తున్నారు. ఆది పినిశెట్టి, జగపతి బాబు కీలక పాత్రల్లో నటిస్తున్నారు. దేవి శ్రీ ప్ర‌సాద్ సంగీతం అందిస్తున్నారు. జూన్ 3న ఈ చిత్రం విడుదల కానుంది.
గని : వరుణ్ తేజ్ హీరోగా కొత్త దర్శకుడు కిరణ్ కొర్రపాటి తెరకెక్కిస్తున్న సినిమా గని. పూర్తిగా బాక్సింగ్ బ్యాక్ డ్రాప్‌లో ఈ సినిమా తెరకెక్కుతోంది. ఇప్పటి వరకు బాక్సింగ్ నేపథ్యంలో చాలా చిత్రాలు వ‌చ్చాయి. అయితే.. ప్రొఫెష‌న‌ల్ బాక్స‌ర్ ఎలా ఉంటాడో వరుణ్ చూపించ‌బోతున్నాడు. ఈ సినిమాలో వరుణ్ స‌ర‌స‌న స‌యీ మంజ్రేక‌ర్ నటిస్తోంది. వ‌రుస విజ‌యాల‌తో దూసుకెళ్తున్న వరుణ్.. ఈ చిత్రం ఎలాంటి ఫ‌లితాన్నిస్తుందో చూడాలి. జూలై 30న ప్రపంచవ్యాప్తంగా విడుదలకానుంది.
Also Read: ల‌వ‌ర్ ఫొటో షేర్ చేసిన శ్రీముఖి.. క్ర‌ష్ మొత్తం అత‌నిపైనే అంట!
లైగర్ : డాషింగ్ డైరెక్టర్ పూరీ జగన్నాథ్, హీరో విజయ్ దేవరకొండ కాంబోలో వ‌స్తున్న క్రేజీ మూవీ ‘లైగర్’. ఈ చిత్రం కూడా క్రీడా నేప‌థ్యంలోనే రాబోతోంది. మిక్స్ డ్ మార్ష‌ల్ ఆర్ట్స్ ప‌వ‌ర్ చూపించ‌బోతున్నాడు విజయ్. ‘సాలా క్రాస్ బ్రీడ్‌’ అంటూ వ‌చ్చిన ఫ‌స్ట్ లుక్ ఆడియ‌న్స్ ను ఫుల్లుగా అట్రాక్ట్ చేసింది. దీంతో.. ఈ చిత్రంపై అంచ‌నాలు ఒక్క‌సారిగా పెరిగిపోయాయి. సుమారు 120 కోట్ల భారీ బ‌డ్జెట్ తో తెరకెక్కిస్తున్న ఈ సినిమాను సెప్టెంబర్ 9న రిలీజ్ చేయ‌బోతున్నారు.
సీటీ మార్ : దర్శకుడు సంపత్ నంది – గోపీచంద్ కాంబోలో రాబోతున్న మూవీ సీటీ మార్. ఈ సినిమాలో తమన్నా హీరోయిన్. శ్రీనివాస్ చిట్టూరి నిర్మాత. స్పోర్ట్స్ బేస్డ్ మూవీకి కమర్షియల్ అంశాలు జోడించి తెర‌కెక్కించారు. మహిళల కబడ్డీ జట్టు కోచ్‌‌‌‌లుగా గోపీచంద్, తమన్నా కనిపించనున్నారు. ‘కబడ్డీ.. మైదానంలో ఆడితే ఆట.. బ‌‌‌‌య‌‌‌‌ట ఆడితే వేట’ అంటూ రాబోతున్న ఈ మూవీ ఎలాంటి రిజల్ట్ నమోదు చేస్తుందోననే ఆసక్తి నెలకొంది. ఏప్రిల్‌ 2న ఈ సినిమా విడుదల కానుంది.
ఇవేకాకుండా.. ఇంకా పుల్లెల గోపీచంద్ బయోపిక్ కూడా తెరకెక్కుతోంది. ఈ సినిమాలో సుధీర్ బాబు నటిస్తున్నాడు. సుధీర్ బాబు కూడా ఒకప్పటి బ్యాడ్మింటన్ క్రీడాకారుడు కావడం విశేషం. అదేవింగా.. బాలీవుడ్‌లో ‘83’ సినిమా రూపొందుతోంది. కపిల్ దేవ్ బయోపిక్ గా తెరకెక్కుతున్న ఈ సినిమాలో.. రణ్ వీర్ సింగ్ ప్రధాన పాత్రలో నటిస్తున్నాడు. మరోవైపు.. అజయ్ దేవ్ గన్ ప్రధాన పాత్రలో ఫుట్ బాల్ బ్యాక్ డ్రాప్ లో ‘మైదాన్’ రూపొందుతోంది. ఈ విధంగా సినిమాలన్నీ వెండి తెరపై ఆట మొదలు పెట్టడానికి సిద్ధమవుతున్నాయి. మరి, ఎన్ని సినిమాలు టైటిల్ ఎగరేసుకుపోతాయో చూడాలి.
మరిన్ని సినిమా వార్తల కోసం టాలీవుడ్ న్యూస్
