Shyam Singharoy: నేచురల్ స్టార్ నాని హీరోగా నటించిన తాజా సినిమా శ్యామ్సింగరాయ్.. ఈ సినిమాతోనే చాలా రోజుల తర్వాత థియేటర్లలో ప్రేక్షకులను పలకరించేందుకు సిద్ధమయ్యారు నాని. గతంలో నాని నటించిన వి, టక్జగదీశ్ సినిమాలు ఓటీటీలోనే విడుదలయ్యాయి. కానీ, ప్రేక్షకులను అంతగా ఆకట్టుకోలేకపోయాయి. దాంతో నాని అభిమానులు కాస్త నిరాశపడ్డారు. ఈ సారి మాత్రం ఎలాగైనా మంచి సాలిడ్ కొట్టాలనే కసితో రంగంలోకి దిగుతున్నాడు నాని. ఈ క్రమంలోనే రాహుల్ సాంకృత్యాన్ దర్శకత్వంలో ఓ పీరియాడికల్ స్టోరీ నేపథ్యంలో శ్యామ్ సింగరాయ్ను తెరకెక్కిస్తున్నారు. ఇందులో నాని రెండు విభిన్న పాత్రల్లో నటించనున్నారు. సాయి పల్లవి, కృతి శెట్టి, మడొన్నా సెబాస్టియన్లు హీరోయిన్లుగా నటిస్తున్నారు.
ఇప్పటికే ఈ సినిమా నుంచి విడుదలైన పాటలు, టీజర్లు ప్రేక్షకులను అమితంగా ఆకట్టుకున్నాయి. తాజాగా, ఈ సినిమా నుంచి రెండో సింగిల్ను విడుదల చేయనున్నట్లు మేకర్స్ తెలిపారు.
సిరివెన్నెల సీతారామశాస్త్రి రాసిన చివరి పాట కావడంతో.. శ్యామ్సింగరాయ్ టీమ్.. ఈ పాట వెనకున్న కష్టాన్ని తెలుపుతూ.. రిలీజ్ డేట్ను ప్రకటించారు. నాని, దర్శకుడు రాహుల్ మాట్లాడుతూ.. శాస్త్రి గారు ఈ సినిమాలో రెండు పాటలు రాశారని.. ఈ పాట ఆయన రాసిన చివరి పాటని.. చెప్పారు. ఇలా మరెన్నో విశేషాలు పంచుకుని.. ఈ పాట కోసం ప్రేక్షకులతో పాటు తాము కూడా ఎంతో ఆసక్తిగా ఎదురుచూస్తున్నామని దర్శకుడు రాహుల్ అన్నారు. కాగా, ఈ పాటను డిసెంబరు 7న విడుదల చేయనున్నట్లు తెలిపారు.
