Rajini Kanth: సూపర్స్టార్ రజనీకాంత్కు ఉన్న ఇమేజ్ గురించి ప్రత్యేకంగా చెప్పనక్కర్లేదు. చిత్రసీమకు ఆయన చేసిన సేవకుగానూ… దాదా సాహెబ్ ఫాల్కే అవార్డుతో కేంద్రం ఇటీవలే ఆయన్ను సత్కరించింది. ఆ అవార్డును తన మిత్రుడు రాజ్ బహదూర్కు అంకితమిస్తున్నట్లు రజనీ చెప్పిన విషయం అందరికీ తెలిసిందే. రజినీ సినిమాల్లోకి రాకముందు బెంగళూరులో కండక్టర్గా పనిచేశారు. ఆ బస్సుకు డ్రైవరే రాజ్ బహదూర్… అప్పుడు మొదలైన వీరి స్నేహం ఇప్పటికీ కొనసాగుతోంది. అయితే తాజాగా ఓ ప్రముఖ ఛానల్ కు ఇచ్చిన ఇంటర్వ్యూ లో రాజ్ బహదూర్… రజిని గురించి పలు ఆసక్తికర వ్యాఖ్యలు చేశారు.
రజనీకాంత్ మాతో కలిసి కండక్టర్గా పనిచేసే రోజుల్లో మేమంతా నాటకాలు వేసేవాళ్లం. రజనీ ప్రధాన పాత్రల్లో బాగా నటించేవాడు. అతడి ప్రతిభ చూసి, సినిమాల్లోక వెళ్లమని… గొప్ప నటుడివి అవుతావని చెప్పాను. చెన్నై ఫిల్మ్ ఇన్స్టిట్యూట్లో చేరమని సల్హ ఇవ్వగా… అలా రెండేళ్ల పాటు రజనీ శిక్షణ తీసుకున్నాడు. అనంతరం రజనీ ఓ నాటకం వేయగా.. అది చూడటానికి వచ్చిన ప్రముఖ దర్శకుడు బాలచందర్… సూపర్స్టార్ నటనకు ఫిదా అయ్యారని రాజ్ తెలిపారు.
బాల చందర్ తమిళం నేర్చుకోమని సలహా ఇవ్వడంతో… అప్పుడు మేమిద్దరం తమిళంలో మాట్లాడటం ప్రారంభించాం అన్నారు. రెండు నెలల్లోనే రజనీ పూర్తిగా తమిళం నేర్చుకున్నాడు. ఆ తర్వాత బాలచందర్ దగ్గరకు వెళ్లాడని… అలా రజినికి అపూర్వ రాగంగళ్లో అవకాశం వచ్చిందని రాజ్ బహదూర్ చెప్పారు. కాగా రజనీకాంత్ నటించిన ” అన్నాత్తే ” సినిమా నవంబర్ 4 న ప్రేక్షకుల ముందుకు రానుంది. ఇప్పటికే విడుదలైన ఈ చిత్రంలోని పాటలు, టీజర్ అభిమానులను విపరీతంగా ఆకట్టుకున్నాయి.
