Chandramukhi 2 : చంద్రముఖి.. రజినీకాంత్ తనదైన మేనరిజంతో చేసిన ఈ మూవీ రికార్డులు కొల్లగొట్టింది. రజినీకాంత్ గ్రేస్, స్టైల్, జ్యోతిక యాక్టింగ్ కు ప్రేక్షకులు ఫిదా అయిపోయారు. అలాంటి క్లాసిక్ కు సీక్వెల్ అంటే అందరూ ఆలోచించాల్సిందే. ఇప్పుడు అదే టీంతో రజినీకాంత్ ప్లేసులో రాఘవ లారెన్స్ హీరోగా సినిమా వస్తోంది.
స్టార్ కొరియోగ్రాఫర్, యాక్టర్, ప్రొడ్యూసర్, డైరెక్టర్ రాఘవ లారెన్స్ హీరోగా, బాలీవుడ్ స్టార్ హీరోయిన్ కంగనా రనౌత్ టైటిల్ పాత్ర‌లో నటించిన భారీ బ‌డ్జెట్ మూవీ ‘చంద్రముఖి 2’. అగ్ర నిర్మాణ సంస్థ లైకా ప్రొడక్ష‌న్స్ బ్యాన‌ర్‌పై సుభాస్క‌ర‌న్ నిర్మించిన ఈ చిత్రాన్ని సీనియ‌ర్ డైరెక్టర్ పి.వాసు తెర‌కెక్కించారు. తెలుగు, త‌మిళ, హిందీ, కన్నడ, మలయాళ భాష‌ల్లో పాన్ ఇండియా మూవీగా సెప్టెంబ‌ర్ 28న ఈ సినిమా విడుద‌ల‌వుతుంది. తెలుగు రాష్ట్రాల్లో ‘చంద్రముఖి 2’ చిత్రాన్ని శ్రీ లక్ష్మీ మూవీస్ బ్యాన‌ర్‌పై రిలీజ్ చేస్తున్నారు. ఈ సంద‌ర్భంగా ఆదివారం ప్రీ రిలీజ్ ఈవెంట్‌ను యువి మీడియా నిర్వహించారు.
ఈ ఈవెంట్‌లో..రాఘవ లారెన్స్ మాట్లాడుతూ.. ‘రెబల్ తరువాత నాకు డైరెక్షన్ చేసే టైం కుదరలేదు. ఇలా చంద్రముఖి 2 సినిమాతో మీ ముందుకు వస్తున్నాను. తెలుగు ప్రేక్షకులు ఏమీ ఆశించకుండా ప్రేమిస్తుంటారు. నేను ఎప్పుడూ దేవుడ్ని చూడలేదు. ఈ ప్రేమ పేరే దేవుడని అనుకుంటున్నాను. నేను డ్యాన్స్ కంపోజ్ చేసిన ప్రతీ హీరో అభిమాని నాకు ఫ్యాన్ అయ్యారు. నాకు ఛాన్స్ ఇచ్చిన హీరోలందరికీ థాంక్స్. ఈ సినిమా విషయానికి వస్తే ఫస్ట్ థాంక్స్ సూపర్ స్టార్ రజినీకాంత్ గారికి చెప్పాలి. ఆయన నటించిన చిత్రంలో నేను నటించాను. వాసు గారు కథ చెప్పారు.. నేను చేయొచ్చా? అని అడిగాను. ఆల్ ది బెస్ట్ అని చెప్పారు. నా లైఫ్‌లో నేను ముగ్గురినీ ఎప్పుడూ మరిచిపోను. రజినీ కాంత్ గారు లేకపోతే నేను ఇక్కడ ఉండేవాడ్ని కాదు. మెగాస్టార్ చిరంజీవి గారు లేకపోతే మీ అభిమానం నాకు వచ్చేది కాదు. డైరెక్షన్ ఛాన్స్‌ను నాగార్జున గారు ఇచ్చారు. కీరవాణి గారికి మ్యూజిక్ తప్పితే ఇంకేం తెలియదు. అదే లోకంలో ఉంటారు. ఆయన సంగీత సారధ్యంతో మేం పని చేయడం ఆనందంగా ఉంది. నేను గ్రూప్ డ్యాన్సర్‌గా పని చేస్తున్నప్పటి నుంచీ పి. వాసు గారు ఇంకా దర్శకత్వం వహిస్తూనే ఉన్నారు. ఈ వయసులోనూ ఆయన చాలానే కష్టపడుతుంటారు. నా బాడీ లాంగ్వేజ్‌లో రజినీ సర్ స్టైల్, చిరంజీవి గారు డ్యాన్స్ ఉంటుంది. నా బాడీలోంచి రజినీ గారిని తీసేయడం వాసు గారికి పెద్ద టాస్క్ అయింది. ఎలా చేయాలా? అని అన్నయ్య రజినీకి ఫోన్ చేసి అడిగాను. ఆయన ఇచ్చిన సలహాతోనే కాస్త భయపడుతూ పని చేశాను. మీ అందరికీ నచ్చతుందని ఆశిస్తున్నాను. నిర్మాత సుభాస్కరణ్ గారు దివ్యాంగుల కోసం కోటి రూపాయల విరాళం ఇచ్చారు. నేను కూడా నా వంతు సాయం చేస్తున్నాను. ఇదంతా నా డబ్బు కాదు. ప్రేక్షకుల డబ్బులే. ప్రేక్షకుల నుంచే డిస్ట్రిబ్యూటర్లు, అక్కడి నుంచి నిర్మాతలు.. నిర్మాతల నుంచి మా వద్దకు వస్తుంది. కంగనా గారితో నటించాలని అందరికీ డ్రీమ్ ఉంటుంది. మహిమ గారు సెట్స్‌లో ఎప్పుడూ పాట పాడుతూనే ఉంటారు. నా సినిమాకు పని చేసిన ప్రతీ ఒక్కరికీ థాంక్స్’ అని అన్నారు.
నిర్మాత ఎన్వీ ప్రసాద్ మాట్లాడుతూ.. ‘లైకా నాకు సొంత బ్యానర్‌లాంటిది. చంద్రముఖి 2 సినిమాను తెలుగులో రిలీజ్ చేస్తున్నాను. ఈ సినిమా పెద్ద హిట్ అవుతుంది. మొదటి పార్ట్ కన్నా రెండో పార్ట్ పెద్ద హిట్ కావాలని కోరుకుంటున్నాను. ప్రేక్షకులంతా ఈ సినిమాను చూసి హిట్ చేయాలని కోరుకుంటున్నాను’ అని అన్నారు.
పి.వాసు మాట్లాడుతూ.. ‘మాకు ఈ సినిమాను ఇచ్చిన లైకా వారికి థ్యాంక్స్. నా సినిమాలో పని చేసిన ప్రతీ ఒక్కరికీ థాంక్స్. మా నాన్న పీతాంబరం గారు లేకపోయి ఉంటే మేం ఇక్కడ ఉండేవాళ్లం కాదు. మా గాడ్ ఫాదర్ ఎన్టీఆర్ గారే మాకు అన్నీ ఇచ్చారు. ప్రేక్షక దేవుళ్లు మా సినిమాను చూసి విజయవంతం చేయాల’ని అన్నారు.
కంగనా రనౌత్ మాట్లాడుతూ.. ‘ఏక్ నిరంజన్ తరువాత నేను తెలుగులో నటించిన చిత్రమిదే. చంద్రముఖి అనే ప్రయాణం నాకు ఎంతో స్పెషల్. నా దర్శకుడు పి వాసు గారికి థాంక్స్. నాకు ఛాన్స్ ఇచ్చిన నిర్మాతకు థాంక్స్’ అని అన్నారు.
ఎం ఎం కీరవాణి మాట్లాడుతూ.. ‘చంద్రముఖి 2లో దెయ్యాన్ని చూపించకుండానే అంతలా భయపెట్టారు. మాస్టర్‌తో పని చేయడం ఆనందంగా ఉంది. కంగనా గారు, లైకాతో మొదటి సారి పని చేశాను. మీ అందరికీ ఈ సినిమా నచ్చుతుందని భావిస్తున్నానునాకు అవకాశం ఇచ్చిన వాసు గారికి ధన్యవాదాలు’ అని అన్నారు.
మహిమా నంబియార్ , లిరిక్ రైటర్ చైతన్య ప్రసాద్ మాట్లాడి సినిమా బాగా వచ్చిందని అందరూ ఆదరించాలని కోరారు.
