Prakash raj: మా ఎన్నికలు ముగిసి రెండువారాలు గడిచినా.. సినీ పరిశ్రమలో వివాదాలు మాత్రం కొనసాగుతున్నాయి. తాజాగా, మా ఎన్నికల్లో వైకాపా జోక్యం ఉందంటూ.. నటుడు ప్రకాశ్రాజ్ ఆరోపణలు చేశారు. ఈ విషయంపై ఎన్నికల అధికారి కృష్ణమోహన్‌కు ఫిర్యాదు చేశారు. ఎలక్షన్స్లో అవకతవకలు జరిగాయంటూ.. సిసిటీవీ ఫొటేజీ పరిశీలించి కృష్ణ మోహన్కు లేఖ రాశారు ప్రకాశ్ రాజ్. ఈ క్రమంలోనే సాంబశివరావు ఎన్నికల హాలులోకి ప్రవేశించడం గమనించారు. అసలు వైకాపా కార్యకర్త నూకల సాంబశివరావుని ఎన్నికల హాలులోకి ఎలా అనుమతించారంటూ.. ప్రశ్నించారు. ఈ విషయంపై తక్షణమే చర్యలు తీసుకోవాలని ఈసీకి ఫిర్యాలు చేశారు.
సాంబశివరావు ఎన్నికల హాల్‌లోని ఓటర్లను బెదిరించారని.. ప్రకాశ్రాజ్ ఆరోపించారు. ఈ క్రమంలోనే ఎన్నికల సమయంలో మంచు విష్ణుతో సాంబశివరావు ఉన్న కొన్ని ఫొటోలను కృష్ణమోహన్‌కు పంపించారు. జగ్గయ్యపేటకు చెందిన సాంబశివరావుపై క్రిమినల్‌ కేసులు కూడా ఉన్నాయని ప్రకాశ్రాజ్ వివరించారు. అతి త్వరలోనే ఇందుకు సంబంధించిన వీడియోలను బయటపెడతానని ప్రకాశ్రాజ్ వెల్లడించారు. ఈ విషయాన్ని ట్విట్టర్ వేదికగా పంచుకున్నారు ప్రకాశ్రాజ్.
ఎంతో ఉత్కంఠంగా సాగిన మా ఎన్నికల్లో మంచు విష్ణు గెలుపొందిన సంగతి తెలిసిందే. ఓటమిపాలైన ప్రకాశ్రాజ్ మా సభ్యత్వానికి రాజీనామా చేస్తున్నట్లు ప్రకటించారు. అనంతరం ప్రకాశ్రాజ్ ప్యానెల్ నుంచి గెలుపొందిన వారు కూడా తమ పదవులకు రాజీనామా చేస్తున్నట్లు స్పష్టం చేశారు. ఈ క్రమంలోనే ఎన్నికల్లో జరిగిన అంశాలపై మాట్లాడుతూ.. పలు ఆసక్తికర విషయాలు పంచుకున్నారు. ఎన్నికల్లో అవకతవకలు జరిగాయని, మోహన్ బాబు అనుచితంగా ప్రవర్తించారని బెనర్జీ అన్నారు. తనపై చేయి చేసుకోవడానికి ప్రయత్నించారని ఆవేదన వ్యక్తం చేశారు.