Kannappa Re Release: టాలీవుడ్ లో మళ్లీ రీ రిలీజ్ ట్రెండ్ మొదలైంది. ‘పెద్ది’ బాక్స్ ఆఫీస్ జోరు ఇప్పుడిప్పుడే చల్లబడుతోంది, ఎక్సిభిటర్స్ థియేటర్స్ ని మూయకుండా ఉండాలంటే, కచ్చితంగా మనీ రొటేషన్ ఉండాలి. కానీ అక్కడ చూస్తే కొత్త సినిమాలు లేవు. రేపు సమంత నటించిన ‘మా ఇంటి బంగారం’ చిత్రం విడుదల కాబోతుంది. రేపు ఒక్క రోజు ఈ సినిమాకు మంచి వసూళ్లు రావొచ్చు , టాక్ బాగుంటే వీకెండ్ వరకు కూడా ఆ జోరు కొనసాగొచ్చు , కానీ ఆ తర్వాత వర్కింగ్ డేస్ లో ఈ చిత్రం నిలబడడం కష్టం. అందుకే ఇప్పుడు రీ రిలీజ్ సినిమాలు ఈ నెల 26 నుండి వరుసగా విడుదల కాబోతున్నాయి. 26 న పవన్ కళ్యాణ్ గబ్బర్ సింగ్, మహేష్ బాబు ఒక్కడు చిత్రాలు రీ రిలీజ్ కాబోతున్నాయి.
ఈ రెండు సినిమాలు విడుదలైన మరుసటి రోజే మంచు విష్ణు నటించిన ‘కన్నప్ప’ చిత్రం గ్రాండ్ గా రీ రిలీజ్ కాబోతుంది. మంచు విష్ణు ఎంతో ప్రతిష్టాత్మకంగా తీసుకొని నిర్మిస్తూ , నటించిన సినిమా ఇది. ఇందులో రెబల్ స్టార్ ప్రభాస్, బాలీవుడ్ సూపర్ స్టార్ అక్షయ్ కుమార్ మాలీవుడ్ సూపర్ స్టార్ మోహన్ లాల్ వంటి వారు కీలక పాత్రలు పోషించారు. ఇంతటి భారీ హంగులు , ఆర్భాటాల నడుమ విడుదలైన ఈ చిత్రం బాక్స్ ఆఫీస్ వద్ద అన్ని భాషలకు కలిపి 50 కోట్ల రూపాయిల రేంజ్ లో గ్రాస్ వసూళ్లు , 23 కోట్ల రూపాయిల రేంజ్ షేర్ వసూళ్లను రాబట్టింది. కమర్షియల్ గా పెద్ద డిజాస్టర్ ఫ్లాప్ అనుకోవచ్చు. కానీ మంచు విష్ణు మార్కెట్ కి అది చాలా ఎక్కువ కలెక్షన్స్. అయితే ఈ చిత్రాన్ని ఇప్పుడు ఈ నెల 27 న విడుదల చేయబోతున్నారు.
ఈ రీ రిలీజ్ ద్వారా కనీసం 3 కోట్ల రూపాయిల గ్రాస్ వసూళ్లను ఆశిస్తున్నారు మేకర్స్. స్టార్ హీరోలకు సైతం ఈ రేంజ్ గ్రాస్ వసూళ్లు ఒక రీ రిలీజ్ కి నమోదు అవ్వడం చాలా కష్టం ఈ రోజుల్లో , అలాంటిది మంచి విష్ణు సినిమాకు 3 కోట్ల గ్రాస్ అంటే మామూలు విషయం కాదు. ప్రభాస్ ఫ్యాన్స్ సహకరిస్తే ఇది సాధ్యం అవ్వొచ్చు , కానీ ప్రస్తుతానికి అది సాధ్యం అయ్యేలా లేదు , ఎందుకంటే ప్రభాస్ ఫ్యాన్స్ ఈ సినిమాని ప్రోత్సహించే మూడ్ లో లేరు , చూడాలి మరి ఈ చిత్రం రీ రిలీజ్ లో ఏ మేరకు వసూళ్లను రాబడుతుంది అనేది.
