Kurup Movie: మలయాళ సూపర్ స్టార్ దుల్కర్ సల్మాన్ నటించిన చిత్రం ‘కురుప్’. ఈ చిత్రంలో తెలుగమ్మాయి శోభితా ధూళిపాళ్ళ హీరోయిన్గా నటించింది. 1980-90 మధ్యకాలంలో కేరళ పోలీసులను ముప్పుతిప్పలు పెట్టి మూడు చెరువుల నీళ్లను తాగించిన సుకుమార కురప్పు అనే మోస్ట్ వాంటెడ్ క్రిమినల్ జీవిత చరిత్ర ఆధారంగా శ్రీనాథ్ రాజేంద్రన్ ఈ సినిమాను తెరకెక్కించారు. ఇప్పటికీ ఇతను పోలీసులకు దొరకకుండా ఓ మిస్టరీగానే మిగిలిపోవడం గమనార్హం. అలాగే అనుపమా పరమేశ్వరన్ కీలక పాత్రలో నటించింది. ఈ చిత్రం నవంబర్ 12న ప్రేక్షకుల ముందుకు వచ్చింది. మలయాళంతో పాటు తెలుగు, తమిళం, హిందీ, కన్నడ భాషల్లోనూ ఈసినిమా విడుదలై మంచి కలెక్షన్లను రాబట్టింది.
కాగా ఈ సినిమాలో దుల్కర్ సల్మాన్ కురప్, గోపీ కృష్ణన్ అనే రెండు పాత్రల్లో నటించి ఆకట్టుకున్నాడు. అతని ప్రేయసి శారదాంబ పాత్రలో శోభితా ఆకట్టుకుంది. వేఫేరర్ ఫిల్మ్స్, ఎం స్టార్ ఎంటర్టైన్మెంట్ బ్యానర్లపై 35 కోట్ల రూపాయల బడ్జెట్తో ఈ సినిమా రూపొందింది. ఇప్పుడీ క్రైమ్ థ్రిల్లర్ డిజిటల్ మాధ్యమంలోనూ సందడి చేసేందుకు ముస్తాబవుతోంది. ప్రముఖ ఓటీటీ ప్లాట్ఫామ్ నెట్ ఫ్లిక్స్ లో డిసెంబర్ 17 నుంచి ‘కురుప్’ స్ట్రీమింగ్ కానుంది. ఈ మేరకు సోషల్ మీడియా ద్వారా నెట్ఫ్లిక్స్ ఈ విషయాన్ని ప్రకటించింది. ఇంకా టొవినో థామస్, ఇంద్రజిత్ సుకుమారన్, సన్నీ వేన్ తదితరులు కీలక పాత్రలు పోషించారు. సుషిన్ శ్యామ్ నేపథ్య సంగీతం అందించారు. నిమిష్ రవి సినిమాటోగ్రాఫర్గా వ్యవహరించారు. ప్రస్తుతం ఈ వార్త సోషల్ మీడియా లో వైరల్ గా మారింది.
