Irumudi glimpse video: మన టాలీవుడ్ స్టార్ హీరోలలో టాలెంట్ కి చిరునామా లాంటి హీరో మాస్ మహారాజ రవితేజ. ఎలాంటి సినీ బ్యాక్ గ్రౌండ్ లేకుండా, ఒక అసిస్టెంట్ డైరెక్టర్ గా కెరీర్ ని మొదలు పెట్టి , ఆ తర్వాత కమెడియన్ గా , క్యారెక్టర్ ఆర్టిస్టుగా ఎన్నో సినిమాల్లో నటించి , తద్వారా వచ్చిన ఫేమ్ తో హీరో గా మారి , హిట్ మీద హిట్ కొడుతూ మాస్ , ఫ్యామిలీ , యూత్ అని తేడా లేకుండా అన్ని వర్గాల్లోనూ బలమైన ఫ్యాన్ ఫాలోయింగ్ ని సంపాదించుకున్నాడు. ప్రస్తుత ట్రెండ్ లో ఇండియన్ ఫిలిం ఇండస్ట్రీ లో ప్రతీ స్టార్ హీరో నటన లో విభిన్నమైన కోణాలను ఆవిష్కరిస్తూ బాక్స్ ఆఫీస్ వద్ద వండర్స్ క్రియేట్ చేస్తున్నారు. రవితేజ కి కూడా అలా అద్భుతాలు సృష్టించేంత టాలెంట్ ఉంది.
కానీ ఈమధ్య కాలం లో ఆయన ఒకే తరహా మూస కమర్షియల్ సినిమాలను తీస్తూ తన మార్కెట్ మొత్తాన్ని పోగొట్టుకునే పరిస్థితికి వచ్చేసాడు. అభిమానులు కూడా ‘ఎలా ఉండే రవితేజ, ఎలా అయిపోయాడు, ఇండియన్ సిల్వర్ స్క్రీన్ ని శాసించేంత సత్తా ఉన్న రవితేజ , నేడు మీడియం రేంజ్ మార్కెట్ ని కూడా కోల్పోవాల్సిన పరిస్థితి ఏర్పడింది’ అంటూ సోషల్ మీడియా లో బహిరంగంగానే వాపోయారు. సరిగ్గా అలాంటి సమయం లోనే రవితేజ తన మైండ్ సెట్ ని మార్చుకున్నాడు. ఇకపై కంటెంట్ ఓరియెంటెడ్ సినిమాలు , నటనకు ప్రాధాన్యత ఉన్న సినిమాలు మాత్రమే చెయ్యాలని ఫిక్స్ అయ్యాడు. అందులో భాగంగా ఆయన ప్రకటించిన చిత్రం ‘ఇరుముడి’. నిన్ను కోరి , మజిలీ వంటి చిత్రాలను తెరకెక్కించిన శివ నిర్వాణ ఈ చిత్రానికి దర్శకుడు. ఫస్ట్ లుక్ విడుదల అయ్యినప్పటి నుండే ఈ సినిమా పై అభిమానుల్లో , ప్రేక్షకుల్లో ఒక ప్రత్యేకమైన ఆసక్తి కలిగింది.
దానికి తోడు అయ్యప్ప స్వామి బ్యాక్ గ్రౌండ్ తో తెరకెక్కుతున్న సినిమా కావడంతో అంచనాలు అమాంతం పెరిగిపోయాయి. ఈ నేపథ్యం లో నేడు ఈ చిత్రానికి సంబంధించిన గ్లింప్స్ వీడియో ని విడుదల చేశారు మేకర్స్. ఈ వీడియో లో తండ్రి , కూతురు మధ్య ఉన్న ఎమోషన్ ని చాలా చక్కగా చూపించారు. భార్య చనిపోయిన తర్వాత డిప్రెషన్ లోకి వెళ్లి , ఆమెని మర్చిపోలేక ముందుకి బానిస అయినా రవితేజ ని , అతని కూతురు మందు మానెయ్ నాన్న అని కోరడం, రవితేజ తనకు ఉన్నటువంటి ఆ చెడు అలవాటు ని తన కూతురు కోసం త్యాగం చేయడం కోసం అయ్యప్ప మాల ని ధరించడం ఆ తర్వాత జరిగిన పరిణామాల ఆధారంగా ఈ సినిమాని తెరకెక్కించినట్టు తెలుస్తోంది. క్వాలిటీ పరంగా కూడా ఈ చిత్రాన్ని హై స్టాండర్డ్స్ తో తెరకెక్కిస్తున్నారు మైత్రీ మూవీ మేకర్స్. సోషల్ మీడియా ని ఊపేస్తున్న ఈ గ్లింప్స్ వీడియో ని మీరు కూడా చూసేయండి.
