Nikhil: ఇటీవల కాలంలో హిట్లు, ఫ్లాపులతో సంబంధం లేకుండా దూసుకెళ్లిపోతున్న కుర్ర హీరోల వరుసలో ముందున్నారు నిఖిల్. హ్యాపీడేస్ సినిమాతో ప్రేక్షకులకు పరిచయమైన నిఖిల్.. ఆ తర్వాత వరుసగా సోలో చిత్రాలు తీస్తూ.. హీరోగా మంచి గుర్తింపు తెచ్చుకున్నారు. ప్రస్తుతం బ్యాక్ టు బ్యాక్ సినిమాలతోొ షూటింగుల్లో ఫుల్ బిజీగా గడుపుతున్నారు నిఖిల్. ఇప్పటికే 18 పేజెస్, కార్తికేయ 2 సినిమాల షూటింగుల్లో పాల్గొంటున్నారు నిఖిల్. ఈ రెండు సినిమాల్లోనూ అనుపమ పరమేశ్వరన్ హీరోయిన్గా నటిస్తోంది.
కాగా, సుకుమార్ రైటింగ్స్లో నిఖిల్ 18 పేజెస్ సినిమా తీస్తున్నారు. ఇందులో నిఖిల్ ఎప్పుడూ కనిపించని భిన్నమైన పాత్రలో కనిపించనున్నట్లు పోస్టర్ చూస్తే తెలుస్తోంది. ఇందులో నిఖిల్ డ్యుయల్ రోల్ చేయనున్నట్లు సమాచారం. ఈ క్రమంలోనే మొండేటి దర్శకత్వంలో తెరకెక్కనున్న కార్తికేయ 2లోనూ నటిస్తున్నారు నిఖిల్. గతంలో వీరిద్దరి కాంబోలో వచ్చిన కార్తికేయ ఎంత హిట్ కొట్టిందో ప్రత్యేకంగా చెప్పనక్కర్లేదు. విభిన్న కథాంశంతో తెరకెక్కిన ఈ సినిమా ప్రేక్షకులను విపరీతంగా ఆకట్టుకుంది.
ఈ క్రమంలోనే మరోసారి ప్రేక్షకులను థ్రిల్ చేసేందుకు సిద్ధమయ్యారు నిఖిల్. వీటితో పాటు, మరో సినిమాను కూడా పట్టాలెక్కించేందుకు రెడీ అవుతున్నారు నిఖిల్. గ్యారీ బీహెచ్ దర్శకత్వంలో మరో సినిమా చేస్తున్నారు. రెడ్ సినిమాస్ ప‌తాకంపై కే రాజశేఖర్ రెడ్డి ఈ చిత్రాన్ని నిర్మిస్తున్నారు. వీటితో పాటు, మరో రెండు సినిమాలు కూడా నిఖిల్ చేతిలో ఉన్నాయి. ప్రస్తుతం షూటింగ్లో ఉన్న సినిమాలు విడుదలైన తర్వాతే ఈ రెండింటిని ఒకేసారి సెట్స్పైకి తీసుకెళ్లనున్నట్లు తెలుస్తోంది.
