బిగ్ బాస్ షోతో తెలుగు నాట పాపులర్ అయ్యింది మోనాల్ గజ్జర్. చిన్న సినిమాల్లో హీరోయిన్ గా నటించిన ఈ ముద్దుగుమ్మ బిగ్ బాస్ తోనే ఫేమస్ అయ్యింది. బిగ్ బాస్ లోకి వచ్చాక మోనాల్ గజ్జర్ దశ మారిపోయింది. అంతకుముందు రెండు, మూడు సినిమాల్లో హీరోయిన్ గా చేసినా రాని క్రేజ్.. ఒక్క బిగ్ బాస్ షోతో వచ్చేసింది.
ప్రస్తుతం ఈ గుజరాతీ భామ వరుస ఆఫర్లతో బిజీగా మారింది. బుల్లితెర షోలల్లో కూడా జడ్జిగా వ్యవహరిస్తూ అలరిస్తోంది. ఇప్పటికే ‘అల్లుడు అదుర్స్’ సినిమాలో ఐటెం సాంగ్ తో అదరగొట్టేసింది. ఇక వెబ్ సిరీస్ లలోనూ నటిస్తూ రెండు చేతులా సంపాదిస్తోంది.
ఇక బిగ్ బాస్ తో పాపులర్ అయిన మోనాల్ కు హోస్ట్ నాగార్జున కూడా ఆఫర్ ఇచ్చిన సంగతి తెలిసిందే. నాగార్జున హీరోగా.. కల్యాణ్ కృష్ణ దర్శకత్వంలో వచ్చిన ‘సోగ్గాడే చిన్ని నాయనా’ సినిమా ఎంత పెద్ద హిట్ అయ్యిందో అందరికీ తెలిసిందే. తాజాగా దానికి కొనసాగింపు వస్తున్న మూవీ ‘బంగార్రాజు’. పాత్ర పేరుతోనే ప్రీక్వెల్ ను కల్యాణ్ కృష్ణ ప్లాన్ చేశారు. ఈ చిత్రంలో నాగార్జునతోపాటు నాగచైతన్య కూడా మరో హీరోగా నటిస్తున్నారు. నాగార్జున జోడిగా రమ్యకృష్ణ, చైతన్యకు జోడీగా కృతిశెట్టిలను తీసుకున్నారు.
ఈ క్రమంలోనే ఈ సినిమాలో ఓ స్పెషల్ సాంగ్ కోసం మోనాల్ గజ్జర్ ను ఓకే చేశారంట.. కథ ప్రకారం సినిమాలో ‘స్వర్గం’ ఎపిసోడ్ ఉంటుందని.. ఇందులో ఐటెం సాంగ్ లో మోనాల్ గజ్జర్ తో నాగార్జున ఆడి పాడ బోతున్నట్టు సమాచారం. స్వర్గంలో రంభగా మోనాల్ ను నాగార్జున సెట్ చేశాడని సమాచారం. ఇలా బిగ్ బాస్ బ్యూటీని తన సినిమాలోనూ వాడేశాడట నాగార్జున. మోనాల్ తో చేసే ఐటెం సాంగ్ హైలెట్ అని అంటున్నారు.