Salaar: ఇట్స్ అఫీషియల్… సలార్ వాయిదా, నెక్స్ట్ డేట్ పై యూనిట్ సమాధానం ఇదే!

Salaar: సెప్టెంబర్ 28 లాంగ్ వీకెండ్ అన్ని అనుకున్నట్లు జరిగితే ఆ తేదీకి డైనోసార్ లాంటి సలార్ సినిమా మన ముందుకు రావాల్సింది. కానీ అనుకోని కారణాల వలన సినిమా ఆ తేదీకి రావడం లేదు అని కన్ఫర్మ్ అయ్యింది. ముందుగా సోషల్ మీడియా లో దీనికి సంబంధించిన న్యూస్ వైరల్ అయ్యింది. కానీ చాలా రోజుల వరకు నిర్మాణ సంస్థ నుంచి ఎలాంటి సమాధానం లేదు. తాజాగా ఇప్పుడు సలార్ విడుదల వాయిదా గురించి అధికారికంగా ప్రకటించింది చిత్ర యూనిట్ .

“సలార్ సినిమా పట్ల మీరు చూపిస్తున్న ప్రేమకు మేము మనస్ఫూర్తిగా కృతజ్ఞతలు తెలుపుతున్నాం. కొన్ని అనివార్య కారణాల వలన సెప్టెంబర్ 28 న చెప్పిన తేదికి రాలేకపోతున్నాం. మేము ఈ నిర్ణయం ఎందుకు తీసుకున్నామో మీరు అర్థం చేసుకుంటారు అనుకుంటున్నాము. ప్రేక్షకులకు మంచి సినిమాటిక్ అనుభూతిని పంచడానికి మా టీమ్ పనిచేస్తుంది. హై స్టాండర్డ్స్ తో మేము మీ ముందుకు రాబోతున్నాం. మరికొద్ది రోజుల్లోనే కొత్త విడుదల తేదీని ప్రకటిస్తాం. సలార్ సినిమాతో మీరందరూ భాగమైనందుకు ధన్యవాదాలు అంటూ” పోస్టర్ రిలీజ్ చేసింది చిత్ర యూనిట్.

నిజానికి ఈ సినిమా వాయిదా పడ్డ నాటి నుండి కొత్త విడుదల తేదీపై అందరి దృష్టి ఉంది. సలార్ టీం నుండి అప్డేట్ వస్తుందంటే కొత్త విడుదల తేదీని ప్రకటిస్తారేమో అని అనుకున్నారు కానీ వాయిదా పడిందని మాత్రమే చెప్పింది చిత్ర యూనిట్. దీనితో ఫ్యాన్స్ ఈ పోస్ట్ పై భగ్గుమంటున్నారు. విడుదల తేదీ ప్రకటించకుండా తెలిసిన విషయాన్ని కొత్తగా చెప్పడం ఏంటి అంటూ సోషల్ మీడియాలో కామెంట్స్ చేస్తున్నారు.

ఇప్పటివరకు వినిపిస్తున్న సమాచారం ప్రకారం సలార్ డిస్టిబ్యూటర్స్ తో ఆల్రెడీ ఒక హై లెవెల్ మీటింగ్ జరిగినట్లు తెలుస్తోంది. కొందరు ఈ సినిమాను సంక్రాంతికి విడుదల చేయాలని డిమాండ్ చేశారు. కాకపోతే సౌత్ లో తప్ప నార్త్ లో ఆ తేదీ అంత అనుకూలమైనది కాకపోవడం పైగా సౌత్ లో అదే తేదీకి ఇతర అగ్రహీరోల సినిమాలు కంఫర్మ్ కావడం వలన సలార్ కు ఆ తేదీ కరెక్ట్ కాదనే అభిప్రాయం వ్యక్తం అయ్యింది. దీనితో నవంబర్ రెండో వారంలో వస్తే ఎలా ఉంటుంది అనే దానిపై కూడా చర్చలు జరిగినట్లు తెలుస్తోంది. కాకపోతే దానిని కూడా ఫిక్స్ చేయలేదని సమాచారం.