Kamal Haasan Birthday: విలక్షణ నటనకు ఆయన ఆలవాలం, నాట్య మయూరానికి ఆయన కొలమానం, వైవిధ్యమైన కథలకు ఆయన వైవిధ్య మానం, విభిన్న పాత్రలకు ఆయన విశేష బహుమానం. అందుకే, ఆయన విలక్షణ కథానాయకుడు. అన్నిటికీ మించి ఆయన వెండితెరకు ఓ నాయకుడు. నటనా నైపుణ్యంలో ఓ స్వచ్ఛమైన భారతీయుడు. నేటి తరంలో నటన విషయంలో ఆయనకు సాటి లేరు ఇంకెవరూ. పోటీకి రారు మరొకరు ఎవరూ. ఎందుకంటే అభినయాన్ని అనుభవాన్ని ఓ సాగర సంగమం లో కలిపి ఆ శుభసంకల్పం తోనే తన నటననూ, తన నాట్యాన్ని వెండితెర పై అద్భుతంగా అద్దగల ధీశాలి ఆయన. ఆయనే కమల్ హాసన్.
నేడు కమల్ హాసన్ పుట్టిన రోజు. ఈ సందర్భంగా ఆ లోకనాయకుడు గురించి ప్రత్యేక కథనం. కమల్ ఓ ప్రయోగాల పుట్ట. సినిమాలను ప్రేమించడంలో ఆయన ఓ స్వాతి ముత్యం. కొత్త రకం చిత్రాలకు అంతే కొత్త రీతిలో తెరమీద సాక్షాత్క రింపచేయడంలో కమల్ మహా దిట్ట. నేటికీ ఆయన నటన దాహం తీరనిది. నిత్యం సినిమా కోసం తపించిపోతుంటారు. ఎవరూ టచ్ చేయని నేపథ్యాలను ఎప్పుడూ కోరుకొనే ఆ అపురూప నటుడు సినీ ప్రస్థానంలో ఎన్నో గొప్ప సంఘటనలు ఉన్నాయి.
తమిళనాడులోని పరమకుడిలో 1954 నవంబర్ 7 వ తేదీన కమలహాసన్ జన్మించారు. కమల్ అసలు పేరు.. పార్థసారథి శ్రీనివాసన్. చిన్న తనంలో కమల్ ను అందరూ వాసన్ అని పిలిచేవారు. అయితే, సినిమాల్లోకి వచ్చాక.. తనకు మాత్రమే అంకితమైపోయే విభిన్న పేరు ఉండాలని ‘కమల్ హసన్’గా తన పేరును మార్చుకున్నారు కమల్ అలియాస్ పార్థసారథి శ్రీనివాసన్.
అది 1959 వ సంవత్సరం.. కమల్ హాసన్ ఇంట్లో ఓ సినిమా గురించి చర్చ జరుగుతుంది. సహజంగా సినిమా నేపథ్యం ఉన్న కుటుంబం కాబట్టి.. ఇలాంటి చర్చలు ఎప్పుడు జరుగుతూనే ఉంటాయి. కానీ ఈ సారి చర్చ కమల్ హాసన్ సినీ ఎంట్రీ పై. మొత్తానికి అందరూ కలిసి ఒక నిర్ణయానికి వచ్చారు. కట్ చేస్తే.. ‘కలతూర్ కన్నమ్మ’ అనే సినిమాతో బాలనటుడిగా సినిమాల్లోకి ఎంట్రీ ఇచ్చాడు చిన్న కమల్ హాసన్.
అయితే ఎంట్రీలో అద్భుతంగా నటించాడు. మొదటి సినిమాతోనే తన నటనకి గాను ఏకంగా రాష్ట్రపతి గోల్డ్మెడల్ ను సాధించాడు. ఆ తర్వాత ఇక కమల్ హాసన్ వెనక్కి తిరిగి చూసుకుంది లేదు. తమిళంలో పాటు తెలుగు, కన్నడ, మలయాళీ మరియు హిందీ ఇలా అన్ని భాషల్లోనూ సినిమాలు చేసి లోక నాయకుడు అయ్యాడు.
ప్రస్తుతం సినిమాలతో పాటు రాజకీయాల్లో కూడా కొనసాగుతున్నాడు. కమల్ హాసన్ ఇప్పటివరకూ వివిధ భాషల్లో దాదాపు 260 సినిమాల్లో ఎన్నో వైవిధ్యమైన పాత్రలు పోషించి తనకు తానే సాటి అనిపించుకున్నారు. అసలు కమల్ వేయని వేషం లేదు. కమల్ చేయని పాత్ర లేదు. అందుకే కమల్ హాసన్ ఎప్పటికీ కోమలమైన కథానాయకుడే.
అందుకే, తమిళనాడు ప్రభుత్వం కమల్ హాసన్ కు కలైమామణి బిరుదుతో సత్కరించగా, కేంద్ర ప్రభుత్వం పద్మశ్రీ పురస్కారంతో గౌరవించి సత్కరించింది. ఇక కమల్ తన సినీ ప్రస్థానంలో దాదాపు 170 వరకూ అవార్డులను అందుకుని రికార్డ్ క్రియేట్ చేశారు. పైగా ప్రజాక్షేమంలో, సమాజశ్రేయస్సులో అలాగే ప్రజల పట్ల చూపించే ఆప్యాయతలో ఆయన ఎంతో ప్రశంసనీయుడు.
కమల్ హాసన్ ఈ పుట్టిన రోజును మరింత సంతోషంగా జరుపుకోవాలని, ఆయన ఇలాగే మరెన్నో దశాబ్దాల పాటు ఆరోగ్యంగా ఉండాలని ఆకాంక్షిస్తూ.. కమల్ హాసన్ బర్త్ డే సందర్భంగా ఆయనకు మా ఓకే తెలుగు తరుపున ప్రత్యేక పుట్టినరోజు శుభాకాంక్షలు తెలియజేస్తున్నాం.
Also Read: నటనకు సరికొత్త నిర్వచనం.. కమల్ ‘విశ్వరూపం’
