UPSC 2025 Calender: పరీక్షల క్యాలెండర్ విడుదల.. ‘సివిల్స్’ ఎప్పుడంటే?

UPSC 2025 Calender: కేంద్ర ప్రభుత్వంలోని పలు విభాగాల్లో ఉద్యోగ ఖాళీలను భర్తీ చేసే యూనియన్‌ పబ్లిక్‌ సర్వీస్‌ కమిషన్‌(యూపీఎస్‌సీ) వచ్చే ఏడాది నిర్వహించే పరీక్షల క్యాలెండర్‌ను ప్రకటించింది. 2025లో చేపట్టే ఉద్యోగ నియామక పోటీ పరీక్షల తేదీలతో ప్రత్యేక చార్ట్‌ను గురువారం(ఏప్రిల్‌ 25న) విడుదల చేసింది. 2025 జనవరి నుంచి డిసెంబర్ వరకు నిర్వహించే పరీక్షల తేదీలను ఇందులో పేర్కొంది. యూపీఎస్‌సీ క్యాలెండర్‌ ప్రకారం.. 2025 జనవరి 22 నుంచి ఫిబ్రవరి 11 వరకు సివిల్స్ ప్రిలిమినరీ పరీక్షకు దరఖాస్తులు స్వీకరిస్తుంది. మే 25న పరీక్ష నిర్వహించనుంది. ఆగస్టు 22 నుంచి ఐదు రోజులపాటు యూపీఎస్సీ మెయిన్స్ పరీక్షలు జరగనున్నాయి.

ఇవి కూడా..
సివిల్స్ తోపాటు సీబీఐ (డీఎస్పీ), ఇంజినీరింగ్ సర్వీసెస్ (ప్రిలిమినరీ), సీఐఎస్ఎఫ్, ఎన్డీఏ, ఇండియన్ ఫారెస్ట్ సర్వీసెస్ ప్రిలిమినరీ, మెయిన్‌, సీడీఎస్, సెంట్రల్ ఆర్మ్‌డ్‌ ఫోర్సెస్, కంబైన్డ్ మెడికల్ సర్వీసెస్ తదితర ఉద్యోగ నియామక పరీక్షల షెడ్యూల్‌ను కూడా యూపీఎస్‌సీ ఈ చార్ట్‌లో వివరించింది. ఇక ఆయా పోస్టులకు సంబంధించిన నోటిఫికేషన్, దరఖాస్తుల స్వీకరణ, కంప్యూటర్ ఆధారిత పరీక్షలు నిర్వహించే తేదీలను 2025 క్యాలెండర్‌లో పొందుపర్చింది. అప్పటి పరిస్థితులను ఆధారంగా ఈ తేదీల్లో మార్పులు ఉండొచ్చని కూడా తెలిపింది.