Vasupalli Ganesh Kumar: బిజెపిలోకి వైసీపీ మాజీ ఎమ్మెల్యే.. విమర్శల వెనుక కారణం అదే!

Vasupalli Ganesh Kumar: విశాఖలో వైయస్సార్ కాంగ్రెస్ ( YSR Congress )పార్టీకి మరో షాక్ తగలనుందా? ఆ పార్టీకి చెందిన మాజీ ఎమ్మెల్యే వాసుపల్లి గణేష్ కుమార్ బిజెపిలో చేరనున్నారా? అందుకే తాజాగా వైసీపీ నేతలపై హాట్ కామెంట్స్ చేశారా? కొడాలి నాని తో పాటు వంశీని పార్టీ నుంచి బయటకు పంపాలని డిమాండ్ చేయడం వెనుక అసలు కారణం ఏంటి? కూటమి పాలన మెచ్చుకోవడం వెనుక వ్యూహం ఏంటి? ఇప్పుడు ఇదే హాట్ టాపిక్ అవుతోంది. అయితే వైసిపి పట్ల అసంతృప్తితో ఉన్న ఆయన బిజెపిలో చేరతారని స్థానికంగా ప్రచారం నడుస్తోంది. అందుకే ఈ వ్యాఖ్యలు చేసినట్లు తెలుస్తోంది. వల్లభనేని వంశీ అరెస్టుపై అధినేత జగన్ ఆందోళన వ్యక్తం చేయగా.. అదే సమయంలో ఆయనను పార్టీ నుంచి బయటకు పంపాలన్న సంచలన డిమాండ్ చేశారు వాసుపల్లి గణేష్ కుమార్.

* వరుస విజయాలు దక్కినా
ఎన్నికల్లో విశాఖ దక్షిణ నియోజకవర్గం నుంచి వైయస్సార్ కాంగ్రెస్ పార్టీ అభ్యర్థిగా పోటీ చేశారు గణేష్ కుమార్( vasupalli Ganesh Kumar ). కానీ భారీ ఓటమి మూటగట్టుకున్నారు. హ్యాట్రిక్ విజయం సాధించాలని కోరుకున్న ఆయనకు ఓటమి తప్పలేదు. 2009 ఎన్నికల నుంచి వరుసగా విశాఖ దక్షిణ నియోజకవర్గం నుంచి పోటీ చేస్తూ వచ్చారు గణేష్ కుమార్. 2014, 2019 ఎన్నికల్లో సైతం గెలిచారు. అయితే 2019లో వైయస్సార్ కాంగ్రెస్ పార్టీ అధికారంలోకి రావడంతో ఆ పార్టీలోకి ఫిరాయించారు గణేష్ కుమార్. కానీ ఈ ఎన్నికల్లో ఓటమి తప్పలేదు. అనవసరంగా వైయస్సార్ కాంగ్రెస్ పార్టీలో చేరి రాజకీయ జీవితానికి ఇబ్బందులు తెచ్చుకున్నానని గణేష్ కుమార్ బాధపడుతున్నారు.

* విజయసాయిరెడ్డి తో విభేదాలు
2019 ఎన్నికల తరువాత వైయస్సార్ కాంగ్రెస్ ( YSR Congress) పార్టీలో చేరారు గణేష్ కుమార్. కానీ నాడు సమన్వయకర్తగా ఉన్న విజయసాయిరెడ్డి తో ఇబ్బంది పడ్డారు. విజయసాయిరెడ్డి గణేష్ కుమార్ కు ప్రత్యామ్నాయంగా కొందరు నేతలను ప్రోత్సహించారు. ఈ ఎన్నికల్లో వారికి టిక్కెట్ ఇవ్వాలని సిఫార్సు చేశారు. కానీ జగన్మోహన్ రెడ్డి మాత్రం అనూహ్యంగా గణేష్ కుమార్ కు ఎమ్మెల్యే టికెట్ ఇచ్చారు. అయితే విజయసాయిరెడ్డి పెంచి పోషించిన నేతలు ఎవరు సహకరించలేదు. దాని ఫలితంగానే తనకు ఓటమి ఎదురైనట్లు గణేష్ కుమార్ భావిస్తున్నారు. అందుకే విజయసాయిరెడ్డి వైఖరితో పార్టీకి నష్టం జరిగిందని తాజాగా విమర్శలు చేశారు. మరోవైపు కూటమి ప్రభుత్వాన్ని పొగడడం ద్వారా బిజెపిలోకి వెళ్లేందుకు ప్లాన్ చేసుకుంటున్నట్లు తెలుస్తోంది.

* టిడిపిలో నో ఛాన్స్
ప్రస్తుతం ఆయన తెలుగుదేశం( Telugu Desam) పార్టీలో చేరేందుకు ప్రయత్నాలు చేశారు. కానీ అక్కడ నుంచి ఎటువంటి అనుమతి లేదు. పైగా దక్షిణ నియోజకవర్గ జనసేన చేతిలో ఉంది. అందుకే ఇప్పుడు గణేష్ కుమార్ అవసరం లేదు. మరోవైపు ఇక్కడ టిడిపికి ప్రత్యామ్నాయ నాయకత్వం ఉంది. అందుకే వాసుపల్లి గణేష్ కుమార్ బిజెపిలో చేరేందుకు ప్రయత్నాలు చేస్తున్నట్లు సమాచారం. అందులో భాగంగానే వైసీపీ పై ఆయన కీలక వ్యాఖ్యలు చేసినట్లు తెలుస్తోంది. మరి ఏం జరుగుతుందో చూడాలి.