Kethireddy Pedda Reddy: తాడిపత్రి.. నిత్యం ఏదో ఒక వివాదం ఉండనే ఉంటుంది. తాజాగా వైసీపీ నేత కేతిరెడ్డి పెద్దారెడ్డి బహిరంగ నిరసనకు దిగుతానని స్పష్టం చేయడంతో.. టిడిపి నుంచి అభ్యంతరాలు వచ్చాయి. దీంతో ముందు జాగ్రత్త చర్యగా పోలీసులు పెద్దారెడ్డిని హౌస్ అరెస్ట్ చేశారు. అయితే ఎన్నికల ఫలితాలు వచ్చిన నాటి నుంచి కేతిరెడ్డి పెద్దారెడ్డి తాడిపత్రికి వచ్చి చేయని ప్రయత్నం అంటూ లేదు. ప్రతిసారి ఆయనను పోలీసులు నిలువరిస్తూనే ఉన్నారు. కానీ ఆయన మాత్రం రెచ్చగొట్టే ప్రకటనలు చేస్తూనే ఉన్నారు. తాడిపత్రిలో జెసి ఫ్యామిలీ వర్సెస్ కేతిరెడ్డి ఫ్యామిలీ అన్నట్టు పరిస్థితి మారిపోయింది. కూటమి సర్కార్ అక్రమ అరెస్టులకు నిరసిస్తూ తాడిపత్రిలో ఆందోళనకు దిగుతానని ప్రకటించారు పెద్దారెడ్డి. దీంతో పరిణామాలు మరింత తీవ్రమవుతాయని భావించిన పోలీసులు పెద్దారెడ్డిని హౌస్ అరెస్ట్ చేశారు. పెద్ద ఎత్తున ఆయన నివాసం చుట్టూ మోహరించారు.
* హై టెన్షన్ నియోజకవర్గం..
ఏపీలో హై టెన్షన్ నియోజకవర్గాల్లో తాడిపత్రి ఒకటి. 2019లో తొలిసారి తాడిపత్రిలో వైసీపీ తరఫున పెద్దారెడ్డి విజయం దక్కించుకున్నారు. అదే సమయంలో వైసీపీ అధికారంలోకి వచ్చింది. దీంతో తనకు తిరుగులేదని భావించారు. అందుకే టిడిపి సీనియర్ నేత, తాడిపత్రి మున్సిపల్ చైర్మన్ ప్రభాకర్ రెడ్డితో వివాదానికి దిగేవారు. జెసి కుటుంబాన్ని ఎంతగానో టార్గెట్ చేశారు. వారి ట్రాన్స్పోర్ట్ వ్యాపారాన్ని కూడా దెబ్బతీశారు అనే ఆరోపణలు ఉన్నాయి. ఆ ఫ్యామిలీని జైల్లో పెట్టిన సందర్భాలు కూడా ఉన్నాయి. ఏకంగా జెసి ఇంటికి వెళ్లి బెదిరింపులకు పాల్పడ్డారు. సవాళ్లకు దిగారు. కానీ మొన్నటి ఎన్నికల్లో మళ్ళీ జెసి ఫ్యామిలీ విజయం సాధించింది. దీంతో అక్కడ సీన్ రివర్స్ అయింది. కానీ ఇప్పటికీ తనదే పై చేయి అన్నట్టు కేతిరెడ్డి వ్యవహరిస్తూనే ఉన్నారు. తాడిపత్రిలో తన పరివారంతో పైచేయి సాధించాలని చూస్తున్నారు.
* బహిష్కరణ వేటు..
కేతిరెడ్డి పెద్దారెడ్డి మూలంగా తాడిపత్రిలో శాంతిభద్రతలు అదుపు తప్పుతున్నాయని భావించిన పోలీసులు.. ఆయనపై బహిష్కరణ వేటు వేశారు. నియోజకవర్గం లోకి రాకుండా ఆంక్షలు విధించారు. అయినా సరే అప్పుడప్పుడు రాజకీయ ప్రకటనలు చేస్తున్నారు. తాడిపత్రిలో పర్యటనలకు ప్రయత్నం చేస్తూనే ఉన్నారు. తాజాగా మరోసారి తాడిపత్రిలో ఆందోళనకు దిగుతానని స్పష్టం చేశారు. అయితే వైసిపి అధికారంలో ఉన్నప్పుడు టిడిపి నేతల పై పెట్టిన కేసులు సంగతి ఏంటని వారు ప్రశ్నించారు. దీంతో పరిస్థితి మరోసారి అదుపు తప్పుతుందని పోలీసులు అంచనా వేశారు. అందుకే హౌస్ అరెస్ట్ చేశారు.
