Nagababu: కూటమి విడిపోవాలన్నది వైయస్సార్ కాంగ్రెస్ పార్టీ ఆలోచన. అందుకు ఆ పార్టీ చేయని ప్రయత్నం అంటూ లేదు. ఇటువంటి సమయంలో మూడు పార్టీల ఉమ్మడి కార్యాచరణ, పొత్తు సమన్వయంతో ముందుకు వెళ్లాల్సిన అవసరం ఉంది. ఈ విషయంలో సీఎం చంద్రబాబు తో పాటు డిప్యూటీ సీఎం పవన్ కళ్యాణ్ పరిణితితో వ్యవహరిస్తున్నారు. ఎక్కడ ఇబ్బందులు రాకుండా ముందుకు వెళుతున్నారు. క్షేత్రస్థాయిలో కొన్నిచోట్ల కూటమిలో విభేదాలు వచ్చినా.. వాటిని ఎంకరేజ్ చేయడం లేదు. కానీ మెగా బ్రదర్ నాగబాబు వల్ల మాత్రం ఇబ్బందికర పరిస్థితులు వస్తున్నాయి. జన సైనికులను ఉత్సాహపరిచే క్రమంలో ఆయన చేస్తున్న వ్యాఖ్యలు వికటిస్తున్నాయి.
* గతంలో చాలాసార్లు..
వాస్తవానికి నాగబాబు లో దూకుడు ఎక్కువ. గతంలో సినీ పరిశ్రమ విషయంలో జరిగిన పరిణామాలతో పాటు రాజకీయాల్లో ఆయన చేసిన ప్రకటనలు చాలాసార్లు వివాదాస్పదం అయ్యాయి. చిరంజీవి సౌమ్యుడు అనే పేరు ఉంది కానీ… నాగబాబు తీరుతో చిరంజీవి విమర్శలకు గురయ్యారన్న విమర్శలు కూడా ఉన్నాయి. జనసేనలో ఆయన క్రియాశీలక పాత్ర పోషించిన తర్వాత పవన్ కళ్యాణ్ నాగబాబుకు కీలక సూచనలు చేసినట్లు తెలుస్తోంది. అందుకే నాగబాబు కొన్ని ప్రకటనలు చేసే విషయంలో చాలా జాగ్రత్తలు తీసుకుంటూ వస్తున్నారు. కానీ నిన్న అరకు పార్లమెంటరీ నియోజకవర్గ సమీక్ష జరిగింది. వచ్చే ఎన్నికల్లో అన్ని నియోజకవర్గాల్లో జనసేన పోటీ చేస్తుందని ప్రకటన చేయడం హాట్ టాపిక్ అయ్యింది. జన సైనికులను ఉత్సాహపరిచే క్రమంలో ఆయన నోటి నుంచి ఈ కామెంట్స్ వచ్చాయి. ఇది విపరీతంగా వైరల్ కావడంతో దిద్దుబాటు చర్యలకు దిగారు. మేమే పోటీ చేస్తామనలేదని.. కూటమిపరంగా మేం పోటీ చేస్తాం అని చెప్పానని కవరింగ్ ఇచ్చుకున్నారు నాగబాబు.
* పవన్ ఆదేశాలతో తగ్గిన నాగబాబు..
వాస్తవానికి వైయస్సార్ కాంగ్రెస్ పార్టీ పై దూకుడుగా వ్యవహరించడం లేదు నాగబాబు. జనసేనతో పాటు పవన్ కళ్యాణ్ను టార్గెట్ చేసుకున్నప్పుడు మాత్రమే నాగబాబు బయటకు వస్తున్నారు. కూటమి ప్రభుత్వం పై విమర్శలు వచ్చిన క్రమంలో నాగబాబు సరైన రీతిలో స్పందించడం లేదన్న విమర్శ ఉంది. ఈ విషయాన్ని పవన్ కళ్యాణ్ తొలిసార్లు గుర్తు చేస్తూ జనసేన నేతలతో పాటు నాగబాబుకు హెచ్చరికలు జారీ చేశారు. ప్రభుత్వం అంటే టిడిపి మాత్రమే కాదని.. జనసేన సైతం ఉందన్న విషయాన్ని గ్రహించుకొని మాట్లాడాలన్నారు. చాలాసార్లు హితబోధ కూడా చేశారు.
* కూటమి జాగ్రత్త పడకపోతే..
కూటమి పార్టీలు సమన్వయంతో ముందుకు సాగుతూ ఉండడంతో.. వాటి మధ్య చీలిక ఎప్పుడు తెస్తామా అన్న ఆలోచనలో ఉంది వైయస్సార్ కాంగ్రెస్ పార్టీ. ఈ సమయంలో నాగబాబు లాంటివారు వారికి ఛాన్స్ ఇచ్చినట్టే. ఈ విషయంలో జాగ్రత్తగా ఉండకపోతే కూటమికి నష్టం. పైగా నాగబాబు లాంటివారు ప్రకటనలు చేస్తే తప్పకుండా కిందిస్థాయిలో సైతం విపరీతంగా ప్రభావం చూపుతుంది. అందుకే నాగబాబు లాంటి వారిని నియంత్రించాల్సిన అవసరం పవన్ కళ్యాణ్ పై ఉంది. నాగబాబు సైతం బాధ్యతగా వ్యవహరించాల్సి ఉంటుంది ఇకనుంచి. ఈ విషయంలో తప్పకుండా పవన్ అప్రమత్తం అవుతారు. దిద్దుబాటు చర్యలకు దిగుతారు అని కూటమి వర్గాలు ఆశిస్తున్నాయి.
