Nara Lokesh: జూనియర్ ఎన్టీఆర్ తో ఉన్న గ్యాప్ ను తగ్గించుకునేందుకు నారా లోకేష్ ప్రయత్నాలు చేస్తున్నారని అర్థమవుతోంది. అటు జూనియర్ ఎన్టీఆర్ సైతం లోకేష్ విషయంలో తన మనసు మార్చుకున్నట్లు స్పష్టమవుతోంది. ముఖ్యంగా వారిద్దరి మధ్య ఉన్న గ్యాప్ క్రమేపి తగ్గుతున్నట్లు పరిస్థితి బట్టి అర్థం అవుతోంది. ఇటీవల అనంతపురం జిల్లా పర్యటనలో నారా లోకేష్ తన మామ నందమూరి హరికృష్ణ ను ఆకాశానికి ఎత్తేసారు. ఆపై జూనియర్ ఎన్టీఆర్ పార్టీలోకి వస్తే రెడ్ కార్పెట్ వేస్తామని ఓపెన్ గానే ప్రకటనలు ఇస్తున్నారు. అదే సమయంలో జూనియర్ ఎన్టీఆర్ చంద్రబాబు, లోకేష్, నందమూరి బాలకృష్ణ విషయంలో స్పందిస్తున్నారు. పుట్టినరోజు తో పాటు ప్రత్యేక దినాల సమయంలో పలకరిస్తున్నారు.
అప్పట్లో విభేదాలు..
నారా చంద్రబాబు, నందమూరి బాలకృష్ణతో జూనియర్ ఎన్టీఆర్కు విభేదాలు అనేవి ఎప్పటినుంచో ఉన్నట్లు వార్తలు వచ్చాయి. ప్రధానంగా 2009లో టిడిపికి మద్దతుగా ప్రచారం చేశారు జూనియర్ ఎన్టీఆర్. ఆ ఎన్నికల తర్వాత స్పష్టమైన మార్పు కనిపించింది. ముఖ్యంగా రాజ్యసభ సభ్యుడిగా ఉన్న నందమూరి హరికృష్ణ అప్పట్లో సమైక్యాంధ్రకు మద్దతుగా తన పదవికి రాజీనామా చేశారు. ఆ సమయంలో చంద్రబాబుకు కనీసం మాట కూడా చెప్పకుండా రాజీనామా చేసినట్లు ప్రచారం జరిగింది. అయితే సమైక్యవాదిగా చంద్రబాబు హరికృష్ణతో రాజీనామా చేయించారని అప్పట్లో తెగ ప్రచారం నడిచింది. చంద్రబాబును తెలంగాణ వ్యతిరేకిగా చూపించే క్రమంలో.. హరికృష్ణ కావాలనే ఆ పని చేశారన్న అనుమానం చంద్రబాబులో ఉంది. దీంతో హరికృష్ణ అప్పటినుంచి చంద్రబాబుతో దూరంగా ఉంటూ వచ్చారు. ఇంతలోనే ఆయన అకాల మరణం చెందారు.
హరికృష్ణ మరణం తర్వాత..
హరికృష్ణ మరణం తర్వాత జూనియర్ ఎన్టీఆర్కు అండగా నిలబడ్డారు చంద్రబాబు, బాలకృష్ణ. అయితే ఇంతలో లోకేష్ ఎంట్రీ తో సీన్ మారింది. జూనియర్ ఎన్టీఆర్ ప్రోత్సాహంతో రాజకీయాల్లోకి వచ్చి టిడిపి టికెట్ దక్కించుకున్న కొడాలి నాని.. వైసీపీలో చేరారు. దీంతో వారి మధ్య దూరం మరింత పెరిగింది. 2019లో టిడిపి తరఫున గెలిచి వైసీపీలోకి ఫిరాయించారు వల్లభనేని వంశీ మోహన్. ఆయనకు సైతం టిడిపిలో టిక్కెట్ ఇప్పించింది జూనియర్ ఎన్టీఆర్. పైగా కొడాలి నానితో పాటు వల్లభనేని వంశీ మోహన్ చంద్రబాబుతో పాటు లోకేష్ ను తిడుతుంటే కనీసం నియంత్రించలేదు. చివరకు స్వయంగా తన మేనత్త అయిన నారా భువనేశ్వరి పై అనుచిత వ్యాఖ్యలు చేసిన సీరియస్ గా స్పందించలేదు. తన తాత నందమూరి తారక రామారావు పేరు మీద ఉన్న హెల్త్ యూనివర్సిటీని.. రాజశేఖర్ రెడ్డి పేరుతో మార్చినా సీరియస్ గా తీసుకోలేదు. దీంతో టీడీపీ శ్రేణులు దీనిని తప్పు పట్టుతూ జూనియర్ ఎన్టీఆర్ విషయంలో పునరాలోచనలో పడ్డాయి.
గ్యాప్ పూరించే వ్యూహం..
అయితే అప్పట్లో ఏర్పడిన గ్యాప్ అలానే కొనసాగుతూ వస్తోంది. ఈ తరుణంలో లోకేష్ తన పరిణితి చూపారు. అటు జూనియర్ ఎన్టీఆర్ సైతం చంద్రబాబు, బాలకృష్ణ, లోకేష్ విషయంలో బాగానే స్పందిస్తున్నారు. అయితే ఏ లోకేష్ కోసం జూనియర్ ఎన్టీఆర్ను పక్కన పెట్టారు అనే ఆరోపణ వచ్చిన క్రమంలో.. అదే లోకేష్ జూనియర్ ఎన్టీఆర్ పార్టీలోకి వస్తే సాదరంగా ఆహ్వానిస్తామని చెబుతున్నారు. జూనియర్ ఎన్టీఆర్ సినిమాలకు సంబంధించి అన్ని విధాల సహాయ సహకారాలు అందిస్తున్నారు. పల్నాడు జిల్లా పర్యటనకు వెళ్ళినప్పుడు ఏకంగా జూనియర్ ఎన్టీఆర్ ఫ్లెక్సీ తో నారా లోకేష్ అలరించారు. పనిలో పనిగా హరి మామయ్య అంటూ హరికృష్ణ గురించి గొప్పగా చెబుతున్నారు. ఇవన్నీ చూస్తుంటే భవిష్యత్తులో జూనియర్ ఎన్టీఆర్ తో పని చేసేందుకు లోకేష్ సిద్ధంగా ఉన్నట్లు అర్థమవుతుంది. పవన్ కళ్యాణ్ ఇష్టమా? జూనియర్ ఎన్టీఆర్ ఇష్టమా? అని ఇంటర్వ్యూలో అడిగిన వారికి ఇద్దరూ ఇష్టమే అని తేల్చి చెప్పారు. తద్వారా జూనియర్ ఎన్టీఆర్ ఒక ఆప్షన్ గా ఉన్నారని.. ఆయన పార్టీలోకి వస్తే తప్పకుండా ఆహ్వానిస్తామని తేల్చి చెబుతున్నారు లోకేష్. కానీ జూనియర్ ఎన్టీఆర్ సినిమానే ప్రపంచంగా చూస్తున్నారు.. రాజకీయాల కోసం అస్సలు ఆలోచించడం లేదు.
