Jana Sena Rajya Sabha Candidate: ఏపీ నుంచి జనసేన రాజ్యసభలో ప్రాతినిధ్యం దక్కించుకోనుంది. ఆ పార్టీకి ఒక రాజ్యసభ ఇచ్చేందుకు టిడిపి అధినేత చంద్రబాబు నిర్ణయించారు. రాష్ట్రం నుంచి నలుగురు సభ్యులు పదవీ విరమణ చేస్తుండగా ఆ నాలుగు పదవులు కూటమికి దక్కనున్నాయి. అయితే తీవ్ర తర్జన భర్జన నడుమ బిజెపికి ఈసారి ఛాన్స్ లేదని తేలిపోయింది. నాలుగు పదవుల్లో టిడిపికి మూడు, జనసేనకు ఒకటి కేటాయించారు. రెండుసార్లు బిజెపికి అవకాశం ఇవ్వడంతో ఈసారి ఛాన్స్ లేదని కేంద్ర పెద్దలకు చెప్పారు. వారు సైతం గ్రీన్ సిగ్నల్ ఇవ్వడంతో.. టిడిపి తో పాటు జనసేన తమ పార్టీ అభ్యర్థులను ఎంపిక చేసే పనిలో ఉన్నాయి. అయితే జనసేన రాజ్యసభ పదవిని ప్రతిష్టాత్మకంగా తీసుకుంటోంది.
* తొలిసారిగా ప్రాతినిధ్యం..
జనసేన ఇప్పటివరకు శాసనసభలో ప్రాతినిధ్యం దక్కించుకుంది. శాసనమండలిలో సైతం ప్రాతినిధ్యం దక్కించుకుంది. రాష్ట్రస్థాయి నామినేటెడ్ పదవుల్లో సైతం ఆ పార్టీ తన కోటాను దక్కించుకోగలిగింది. ఇప్పుడు రాజ్యసభలో ప్రాతినిధ్యం దక్కించుకోవడం ద్వారా పార్లమెంటులో సైతం ప్రాతినిధ్యం పెంచుకోనుంది. అయితే తొలిసారి రాజ్యసభ సీటు కావడంతో పవన్ కళ్యాణ్ ఆచితూచి వ్యవహరిస్తున్నారు. మంచి నేతను తొలిసారిగా రాజ్యసభకు పంపడం ద్వారా.. జాతీయ స్థాయిలో సైతం ఉనికి చాటుకోవాలని చూస్తున్నారు.
* మరో రెండు పదవులు సైతం..
అయితే జనసేన తరఫున రాజ్యసభకు ప్రముఖ పారిశ్రామికవేత్త లింగమనేని రమేష్ పేరును ఖరారు చేస్తారని అంతా భావించారు. అయితే ఇప్పటివరకు ఆయనే ముందు వరుసలో ఉన్నారు. చంద్రబాబుకు అత్యంత సన్నిహితుడిగా ముద్రపడిన లింగమనేని రమేష్ జనసేనకు అండగా నిలుస్తూ వచ్చారు. మరోవైపు మెగా బ్రదర్ నాగబాబు, బండారు నరసింహారావు తో పాటు తెలుగు చిత్ర ప్రముఖుడు పేరు వినిపిస్తోంది. అయితే ఇప్పటివరకు ఉన్న పరిస్థితుల్లో లింగమనేని రమేష్ కే ప్రాధాన్యమిస్తారు. ఒకవేళ తెలుగుదేశం పార్టీ అభ్యర్థుల సామాజిక అంశాలను పరిగణలోకి తీసుకొని జనసేనలో సైతం మార్పులు చేసే అవకాశం ఉంది. నాగబాబును పంపించిన ఆశ్చర్యపోనవసరం లేదన్న టాక్ వినిపిస్తోంది. ఇప్పటికే పవన్ రాష్ట్ర రాజకీయాల్లో ఉండగా నాగబాబు జాతీయ రాజకీయాల్లోకి వెళ్తే బాగుంటుందన్న అభిప్రాయం ఉంది. 2029 ఎన్నికల్లోగా రాజ్యసభలో జనసేనకు మూడు సీట్లు దక్కే అవకాశం ఉంది. ఈసారికి లింగమనేని రమేష్ ను పంపించి మిగతా వారికి తరువాత ఇస్తారన్న ప్రచారం కూడా ఉంది. మరి అందులో ఎంత వాస్తవం ఉందో చూడాలి.
